ਨਗਰ ਕੌਂਸਲ ਨੇ ਉਸਾਰੀ ਅਧੀਨ ਹੋਟਲ ਢਾਹਿਆ

ਨਿੱਜੀ ਪੱਤਰ ਪ੍ਰੇਰਕ
ਅੰਬਾਲਾ, 5 ਅਗਸਤ
ਅੰਬਾਲਾ ਛਾਉਣੀ ਨਗਰ ਕੌਂਸਲ ਨੇ ਬੀਤੀ ਦੇਰ ਰਾਤ ਅੰਬਾਲਾ-ਦਿੱਲੀ ਰੋਡ ’ਤੇ ਨਿਰਮਾਣ ਅਧੀਨ ਹੋਟਲ ਢਾਹ ਦਿੱਤਾ। ਜਾਣਕਾਰੀ ਮੁਤਾਬਕ ਇਹ ਹੋਟਲ ਉਸੇ ਵਿਸ਼ਾਲ ਬਤਰਾ ਵੱਲੋਂ ਬਣਾਇਆ ਜਾ ਰਿਹਾ ਸੀ ਜਿਸ ਦੇ ਪਹਿਲੇ ਦੋ ਹੋਟਲ ‘ਦਿੱਲੀ ਦਰਬਾਰ’ ਅਤੇ ‘ਹੋਟਲ ਦੀਪ’ ਸੀਲ ਕਰ ਦਿੱਤੇ ਗਏ ਸਨ। ਨਗਰ ਕੌਂਸਲ ਨੇ ਲੀਜ਼ ਖ਼ਤਮ ਹੋਣ ਦਾ ਹਵਾਲਾ ਦੇ ਕੇ ਹੋਟਲ ਸੀਲ ਕੀਤੇ ਸਨ ਅਤੇ ਹੁਣ ਬਿਨਾ ਸੀਐੱਲਯੂ ਦੇ ਹੋਟਲ ਬਣਾਉਣ ਦਾ ਹਵਾਲਾ ਦਿੱਤਾ ਗਿਆ ਹੈ। ਵਿਸ਼ਾਲ ਬਤਰਾ ਦਾ ਕਹਿਣਾ ਹੈ ਕਿ ਪਤਾ ਨਹੀਂ ਕਿਉਂ ਨਗਰ ਕੌਂਸਲ ਉਸ ਦੇ ਪਿੱਛੇ ਪਈ ਹੋਈ ਹੈ ਜਦੋਂ ਕਿ ਸ਼ਹਿਰ ਵਿਚ ਹੋਰ ਵੀ ਬਹੁਤ ਨਾਜਾਇਜ਼ ਉਸਾਰੀਆਂ ਹਨ। ਨਗਰ ਕੌਂਸਲ ਦੇ ਸਕੱਤਰ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਨਾਜਾਇਜ਼ ਉਸਾਰੀਆਂ ਢਾਹੁਣ ਦੀ ਕਾਰਵਾਈ ਅੱਜ ਵੀ ਜਾਰੀ ਰਹੀ ਹੈ।