ਪ੍ਰਭ ਆਸਰਾ ਦੇ ਬੱਚਿਆਂ ਨੇ ਕੀਤੀ ਕੌਮੀ ਮਾਰਗ ਦੀ ਸਫ਼ਾਈ

ਮਿਹਰ ਸਿੰਘ
ਕੁਰਾਲੀ, 5 ਨਵੰਬਰ
ਸ਼ਹਿਰ ਦੇ ਬਾਈਪਾਸ ਉੱਤੇ ਦੀਵਾਲੀ ਮੌਕੇ ਲੱਗੀਆਂ ਪਟਾਕਿਆਂ ਦੀਆਂ ਸਟਾਲਾਂ ਕਾਰਨ ਖਿੱਲਰਿਆ ਕੂੜਾ ਪ੍ਰਸ਼ਾਸਨ ਵੱਲੋਂ ਨਾ ਚੁੱਕੇ ਜਾਣ ਮਗਰੋਂ ਅੱਜ ਸਮਾਜ ਸੇਵੀ ਸੰਸਥਾ ‘ਪ੍ਰਭ ਆਸਰਾ’ ਅੱਗੇ ਆਈ ਹੈ। ਸੰਸਥਾ ਵਿੱਚ ਰਹਿ ਰਹੇ ਬੱਚਿਆਂ ਨੇ ਬਾਈਪਾਸ ਦੇ ਕਈ ਕਿਲੋਮੀਟਰ ਹਿੱਸੇ ਦੀ ਸਫ਼ਾਈ ਕੀਤੀ।
ਪਟਾਕਿਆਂ ਦੀ ਮੰਡੀ ਵਜੋਂ ਜਾਣੇ ਜਾਂਦੇ ਸ਼ਹਿਰ ਕੁਰਾਲੀ ਦੇ ਬਾਈਪਾਸ ’ਤੇ ਪਡਿਆਲਾ ਤੋਂ ਲੈ ਕੇ ਬੰਨ੍ਹਮਾਜਰਾ ਤੱਕ ਪ੍ਰਸ਼ਾਸਨ ਨੇ ਨਾ ਅਣ-ਅਧਿਕਾਰਤ ਲੱਗੀਆਂ ਸਟਾਲਾਂ ਖ਼ਿਲਾਫ਼ ਕਾਰਵਾਈ ਕੀਤੀ ਅਤੇ ਨਾ ਹੀ ਇੱਥੇ ਖਿਲਾਰੇ ਕੂੜੇ ਦਾ ਨਿਬੇੜਾ ਕੀਤਾ।
ਸੰਸਥਾ ਦੇ ਪ੍ਰਬੰਧਕ ਰਜਿੰਦਰ ਕੌਰ ਦੀ ਅਗਵਾਈ ਹੇਠ ਬੱਚਿਆਂ ਤੇ ਸੇਵਾਦਾਰਾਂ ਨੇ ਉੱਦਮ ਕਰਦਿਆਂ ਸੰਸਥਾ ਵਿੱਚ ਰਹਿ ਰਹੇ ਬੱਚਿਆਂ ਦੀ ਮਦਦ ਨਾਲ ਪਟਾਕਿਆਂ ਦੀਆਂ ਸਟਾਲਾਂ ਵਲੋਂ ਪਾਇਆ ਖਿਲਾਰਾ ਤੇ ਕੂੜਾ ਕਰਕਟ ਸਮੇਟਿਆ। ਬੱਚਿਆਂ ਨੇ ਕੂੜੇ ਕਰਕਟ ਇਕੱਠਾ ਕਰ ਕੇ ਸਹੀ ਨਿਬੇੜਾ ਕੀਤਾ। ਰਜਿੰਦਰ ਕੌਰ ਨੇ ਦੱਸਿਆ ਕਿ ਪਟਾਕਿਆਂ ਦੀ ਰਹਿੰਦ-ਖੂੰਹਦ ਕਾਰਨ ਲੋਕਾਂ ਦੀ ਪ੍ਰੇਸ਼ਾਨੀ ਤੇ ਵਾਤਾਵਰਨ ਨੂੰ ਦੇਖਦਿਆਂ ਉਨ੍ਹਾਂ ਵਲੋਂ ਪਡਿਆਲਾ ਤੋਂ ਸਿੰਘਪੁਰਾ ਚੌਕ ਤੱਕ ਸਫ਼ਾਈ ਕੀਤੀ ਗਈ ਹੈ।