ਝਾੜੀਆਂ ’ਚੋਂ ਨੌਜਵਾਨ ਦੀ ਲਾਸ਼ ਬਰਾਮਦ

ਨਿੱਜੀ ਪੱਤਰ ਪ੍ਰੇਰਕ
ਗੁਰਾਇਆ, 15 ਨਵੰਬਰ
ਬਟਾਲੇ ਦੇ ਨੌਜਵਾਨ ਦੀ ਇਥੇ ਮੁੱਖ ਸੜਕ ਤੋਂ ਝਾੜੀਆਂ ਵਿਚੋਂ ਲਾਸ਼ ਮਿਲੀ ਹੈ। ਮ੍ਰਿਤਕ ਦੀ ਪਛਾਣ ਸੰਚਿਤ ਕੁਮਾਰ (26 ਸਾਲ) ਪੁੱਤਰ ਭੁਪੇਸ਼ ਕੁਮਾਰ ਵਾਸੀ ਪ੍ਰੇਮ ਨਗਰ ਬਟਾਲਾ ਵਜੋਂ ਹੋਈ ਹੈ। ਸੰਚਿਤ 14 ਨਵੰਬਰ ਨੂੰ ਯਮੁਨਾਨਗਰ ਤੋਂ ਮੋਟਰਸਾਈਕਲ ’ਤੇ ਬਟਾਲਾ ਆ ਰਿਹਾ ਸੀ ਕਿ ਗੁਰਾਇਆ ਪੁੱਜਣ ’ਤੇ ਕਿਸੇ ਅਣਪਛਾਤੇ ਵਾਹਨ ਨੇ ਉਸ ਨੂੰ ਫੇਟ ਮਾਰ ਦਿੱਤੀ। ਅੱਜ ਹਾਈਵੇਅ ’ਤੇ ਮੋਟਰਸਾਈਕਲ ਦੇਖਣ ਮਗਰੋਂ ਜਦੋਂ ਆਲਾ-ਦੁਆਲਾ ਦੇਖਿਆ ਤਾਂ ਲਾਸ਼ ਝਾੜੀਆਂ ਵਿੱਚ ਪਈ ਸੀ। ਜਾਣਕਾਰੀ ਮੁਤਾਬਕ ਸੰਚਿਤ ਦਾ ਪਰਿਵਾਰ ਰਾਤ ਤੋਂ ਹੀ ਉਸ ਦੀ ਭਾਲ ਕਰ ਰਿਹਾ ਸੀ। ਫੋਨ ਦੀ ਲੋਕੇਸ਼ਨ ਗੁਰਾਇਆ ਸ਼ਹਿਰ ਦੀ ਆ ਰਹੀ ਸੀ ਪਰ ਨੌਜਵਾਨ ਦਾ ਪਤਾ ਨਹੀਂ ਲੱਗ ਰਿਹਾ ਸੀ। ਪੁਲੀਸ ਨੇ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਅਣਪਛਾਤੇ ਵਾਹਨ ਚਾਲਕ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।