ਤੂੜੀ ਵਾਲੇ ਕੋਠੇ ’ਚੋਂ ਨੌਜਵਾਨ ਦੀ ਲਾਸ਼ ਮਿਲੀ

ਨਿੱਜੀ ਪੱਤਰ ਪ੍ਰੇਰਕ

ਬਠਿੰਡਾ, 4 ਜੂਨ

ਇੱਥੇ ਰਿੰਗ ਰੋਡ ‘ਤੇ ਸਥਿਤ ਪਿੰਡ ਬਾਦਲ ਵਾਲੇ ਹਵਾਈ ਪੁਲ ਨੇੜੇ ਖੇਤ ‘ਚ ਇਕ ਤੂੜੀ ਵਾਲੇ ਕੋਠੇ ‘ਚੋਂ ਅਣਪਛਾਤੇ ਨੌਜਵਾਨ ਦੀ ਲਾਸ਼ ਬਰਾਮਦ ਹੋਈ ਹੈ। ਖੇਤ ਗਏ ਖੇਤ ਮਾਲਕ ਨੇ ਲਾਸ਼ ਵੇਖਣ ਬਾਰੇ ਜਾਣਕਾਰੀ ਥਾਣਾ ਕੈਨਾਲ ਵਿੱਚ ਦਿੱਤੀ ਤਾਂ ਮੌਕੇ ‘ਤੇ ਐਸਪੀ (ਡੀ) ਅਜੈ ਗਾਂਧੀ, ਡੀਐਸਪੀ ਵਿਸ਼ਵਜੀਤ ਸਿੰਘ ਅਤੇ ਹੋਰ ਅਧਿਕਾਰੀ ਪਹੁੰਚੇ। ਨਿਰੀਖ਼ਣ ਮਗਰੋਂ ਲਾਸ਼ ਨੂੰ ਸਹਾਰਾ ਕਲੱਬ ਦੇ ਵਾਲੰਟੀਅਰਾਂ ਦੀ ਮਦਦ ਨਾਲ ਮੁਰਦਾ ਘਰ ‘ਚ ਪਹੁੰਚਾਇਆ ਗਿਆ। ਸਮਝਿਆ ਜਾ ਰਿਹਾ ਹੈ ਕਿ ਲਾਸ਼ 2-3 ਦਿਨ ਪੁਰਾਣੀ ਹੈ ਅਤੇ ਨੌਜਵਾਨ ਦਾ ਕਿਸੇ ਹੋਰ ਜਗ੍ਹਾ ‘ਤੇ ਕਤਲ ਕਰਕੇ, ਉਕਤ ਸਥਾਨ ‘ਤੇ ਸੁੱਟਿਆ ਗਿਆ ਹੋਵੇ। ਪ੍ਰਤੱਖਦਰਸ਼ੀਆਂ ਮੁਤਾਬਿਕ ਕਤਲ ਤੇਜ਼ਧਾਰ ਹਥਿਆਰਾਂ ਨਾਲ ਹੋਇਆ ਜਾਪ ਰਿਹਾ ਸੀ। ਪੁਲੀਸ ਵੱਲੋਂ ਮ੍ਰਿਤਕ ਦੀ ਪਛਾਣ ਲਈ ਯਤਨ ਕਰਨ ਤੋਂ ਇਲਾਵਾ ਵਾਰਦਾਤ ਨੂੰ ਵੱਖ-ਵੱਖ ਪਹਿਲੂਆਂ ਤੋਂ ਘੋਖਿਆ ਜਾ ਰਿਹਾ ਹੈ।