ਸਵਦੇਸ਼ੀ ਟੈਂਕ ‘ਜ਼ੋਰਾਵਰ’ ਦੀ ਪਰਖ

ਨਵੀਂ ਦਿੱਲੀ

ਭਾਰਤ ਨੇ ਚੀਨ ਨਾਲ ਲੱਗਦੀ ਅਸਲ ਕੰਟਰੋਲ ਰੇਖਾ (ਐੱਲਓਸੀ) ’ਤੇ ਫੌਜ ਦੀਆਂ ਜੰਗੀ ਸਮਰੱਥਾਵਾਂ ਦੀ ਮਜ਼ਬੂਤੀ ਲਈ ਦੇਸ਼ ’ਚ ਹੀ ਬਣੇ ‘ਜ਼ੋਰਾਵਰ’ ਨਾਮੀ ਹਲਕੇ ਟੈਂਕ ਦੀ ਅਜ਼ਮਾਇਸ਼ ਸ਼ੁਰੂ ਕਰ ਦਿੱਤੀ ਹੈ। ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ (ਡੀਆਰਡੀਓ) ਅਤੇ ਲਾਰਸਨ ਐਂਡ ਟੁਬਰੋ (ਐੱਲਐਂਡਟੀ) ਡਿਫੈਂਸ ਵੱਲੋਂ 25 ਟਨ ਭਾਰ ਵਾਲੇ ਹਲਕੇ ਟੈਂਕ ਵਿਕਸਿਤ ਕੀਤੇ ਜਾ ਰਹੇ ਹਨ ਜਿਨ੍ਹਾਂ ਦੀ ਢੋਆ-ਢੁਆਈ ਹਵਾਈ ਆਵਾਜਾਈ ਰਾਹੀਂ ਕੀਤੀ ਜਾ ਸਕਦੀ ਹੈ ਅਤੇ ਇਨ੍ਹਾਂ ਨੂੰ ਵੱਡੇ ਪੈਮਾਨੇ ’ਤੇ ਚੀਨ ਨਾਲ ਲੱਗਦੀ ਸਰਹੱਦ ’ਤੇ ਤੇਜ਼ੀ ਨਾਲ ਤਾਇਨਾਤ ਕਰਨ ਲਈ ਡਿਜ਼ਾਈਨ ਕੀਤਾ ਗਿਆ ਹੈ। ਟੈਂਕ ਦੀ ਪਰਖ ਗੁਜਰਾਤ ਦੇ ਹਜ਼ੀਰਾ ਵਿੱਚ ਇੱਕ ਟਿਕਾਣੇ ’ਤੇ ਕੀਤੀ ਗਈ। ਫੌਜ ਨੇ ਪੂਰਬੀ ਲੱਦਾਖ ਦੀ ਗਲਵਾਨ ਘਾਟੀ ’ਚ ਹੋਈ ਝੜਪ ਮਗਰੋਂ ਆਪਣੀ ਲੜਾਕੂ ਸਮਰੱਥਾ ਵਧਾਉਣ ਲਈ ਕਈ ਕਦਮ ਚੁੱਕੇ ਹਨ। -ਪੀਟੀਆਈ