ਤਾਮਿਲਨਾਡੂ: ਬਾਲਾਜੀ ਸਣੇ ਚਾਰ ਵਿਧਾਇਕ ਮੰਤਰੀ ਬਣੇ

ਚੇਨੱਈ, 29 ਸਤੰਬਰ
ਤਾਮਿਲਨਾਡੂ ਦੇ ਰਾਜਪਾਲ ਆਰਐੱਨ ਰਵੀ ਨੇ ਅੱਜ ਇੱਥੇ ਦ੍ਰਾਵਿੜ ਮੁਨੇਤਰ ਕਡਗਮ (ਡੀਐੱਮਕੇ) ਦੇ ਸੀਨੀਅਰ ਆਗੂ ਵੀ ਸੈਂਥਿਲ ਬਾਲਾਜੀ ਨੂੰ ਮੰਤਰੀ ਦੇ ਅਹੁਦੇ ਦੀ ਸਹੁੰ ਚੁਕਵਾਈ। ਬਾਲਾਜੀ ਨੂੰ ਕੁਝ ਦਿਨ ਪਹਿਲਾਂ ਹੀ ਮਨੀ ਲਾਂਡਰਿੰਗ ਨਾਲ ਸਬੰਧਤ ਇੱਕ ਮਾਮਲੇ ’ਚ ਸੁਪਰੀਮ ਕੋਰਟ ਤੋਂ ਜ਼ਮਾਨਤ ਮਿਲੀ ਸੀ। ਡੀਐੱਮਕੇ ਦੇ ਤਿੰਨ ਹੋਰ ਵਿਧਾਇਕਾਂ ਆਰ ਰਾਜੇਂਦਰਨ (ਸੇਲਮ-ਉੱਤਰ), ਗੋਵੀ ਚੇਜ਼ੀਆਨ (ਤਿਰੂਵਿਦਾਈਮਾਰੂਦਰ) ਅਤੇ ਐੱਸਐੱਮ ਨਾਸਰ (ਅਵਾੜੀ) ਨੇ ਵੀ ਰਾਜ ਭਵਨ ’ਚ ਕਰਵਾਏ ਗਏ ਇੱਕ ਸਾਦੇ ਸਮਾਗਮ ’ਚ ਅਹੁਦੇ ਦਾ ਭੇਤ ਗੁਪਤ ਰੱਖਣ ਦੀ ਸਹੁੰ ਚੁੱਕੀ। ਉਨ੍ਹਾਂ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਐੱਮਕੇ ਸਟਾਲਿਨ ਦੀ ਮੌਜੂਦਗੀ ’ਚ ਸਹੁੰ ਚੁੱਕੀ। ਇਸ ਮੌਕੇ ਉਨ੍ਹਾਂ ਦੇ ਪੁੱਤਰ ਉਦੈਨਿਧੀ ਸਟਾਲਿਨ ਵੀ ਹਾਜ਼ਰ ਸਨ ਜਿਨ੍ਹਾਂ ਨੂੰ ਪਹਿਲਾਂ ਹੀ ਸੂਬੇ ਦਾ ਉਪ ਮੁੱਖ ਮੰਤਰੀ ਬਣਾਇਆ ਜਾ ਚੁੱਕਾ ਹੈ। ਇਸ ਸਬੰਧੀ ਜਾਰੀ ਅਧਿਕਾਰਤ ਸੂਚਨਾ ਅਨੁਸਾਰ ਸੈਂਥਿਲ ਬਾਲਾਜੀ ਬਿਜਲੀ ਤੇ ਗ਼ੈਰ-ਰਵਾਇਤੀ ਊਰਜਾ ਵਿਕਾਸ ਤੇ ਆਬਕਾਰੀ ਵਿਭਾਗ ਦਾ ਕੰਮਕਾਰ ਦੇਖਣਗੇ। -ਏਐੱਨਆਈ