ਸੂਰਿਆ ਨੇ ਜਨਮ ਦਨਿ ਮੌਕੇ ਸਾਂਝੀ ਕੀਤੀ ਫ਼ਿਲਮ ‘ਕੰਗੁਵਾ’ ਦੀ ਪਹਿਲੀ ਝਲਕ

ਮੁੰਬਈ: ਅਦਾਕਾਰ ਸੂਰਿਆ ਨੇ ਅੱਜ ਜਨਮ ਦਨਿ ਮੌਕੇ ਆਪਣੀ ਆਉਣ ਵਾਲੀ ਫਿਲਮ ‘ਕੰਗੁਵਾ’ ਦੀ ਪਹਿਲੀ ਝਲਕ ਸਾਂਝੀ ਕੀਤੀ ਹੈ। ਫਿਲਮ ਵਿੱਚ ਉਸ ਨੇ ਇੱਕ ਯੋਧੇ ਦਾ ਕਿਰਦਾਰ ਅਦਾ ਕੀਤਾ ਹੈ। ਸ਼ਿਵਾ ਦੇ ਨਿਰਦੇਸ਼ਨ ਹੇਠ ਬਣੀ ਇਸ ਫਿਲਮ ਦਾ ਸੰਗੀਤ ਦੇਵੀ ਸ੍ਰੀ ਪ੍ਰਸਾਦ ਨੇ ਦਿੱਤਾ ਹੈ। ਇਹ ਫਿਲਮ 3ਡੀ ਫਾਰਮੈਟ ਵਿੱਚ 10 ਭਾਸ਼ਾਵਾਂ ਵਿੱਚ ਰਿਲੀਜ਼ ਹੋਵੇਗੀ। ਇਸ ਦੀ ਪਹਿਲੀ ਝਲਕ ਤਮਿਲ, ਤੇਲਗੂ, ਮਲਿਆਲਮ, ਕੰਨੜ, ਹਿੰਦੀ ਅਤੇ ਅੰਗਰੇਜ਼ੀ ਵਿੱਚ ਜਾਰੀ ਕੀਤੀ ਗਈ ਹੈ। ਸੂਰਿਆ ਅਤੇ ਦਿਸ਼ਾ ਪਟਾਨੀ ਦੀ ਇਸ ਫਿਲਮ ਦਾ ਨਿਰਮਾਣ ‘ਸਟੂਡੀਓ ਗਰੀਨ’ ਵੱਲੋਂ ‘ਯੂਵੀ ਕ੍ਰਿਏਸ਼ਨਜ਼’ ਦੇ ਸਹਿਯੋਗ ਨਾਲ ਕੀਤਾ ਗਿਆ ਹੈ। ਇਹ ਐਕਸ਼ਨ ਫਿਲਮ 2024 ਵਿੱਚ ਰਿਲੀਜ਼ ਹੋਵੇਗੀ। ਨਿਰਮਾਤਾਵਾਂ ਨੇ ਇਸ ਤੋਂ ਪਹਿਲਾਂ ਇੱਕ ਦਿਲਚਸਪ ਵੀਡੀਓ ਰਾਹੀਂ ਫਿਲਮ ਦੇ ਨਾਮ ਦਾ ਐਲਾਨ ਕੀਤਾ ਸੀ। ਇਸ ਵੀਡੀਓ ਵਿੱਚ ਹਨੇਰੀ ਰਾਤ ’ਚ ਇੱਕ ਬਾਜ਼, ਕੁੱਤਾ ਅਤੇ ਇੱਕ ਨਕਾਬਪੋਸ਼ ਯੋਧਾ ਘੋੜੇ ’ਤੇ ਸਵਾਰ ਨਜ਼ਰ ਆਉਂਦਾ ਹੈ। ਇਸ ਦੌਰਾਨ ਦਿਸ਼ਾ ਨੇ ਵੀ ਇੰਸਟਾਗ੍ਰਾਮ ’ਤੇ ਫਿਲਮ ਦੀ ਪਹਿਲੀ ਝਲਕ ਸਾਂਝੀ ਕੀਤੀ ਹੈ। ਇਸ ਦੀ ਕੈਪਸ਼ਨ ਵਿੱਚ ਉਸ ਨੇ ਲਿਖਿਆ, ‘‘ਅੱਗ ਦੀ ਸ਼ਕਤੀ ਵਾਲੇ ਇੱਕ ਆਦਮੀ ਤੇ ਬਹਾਦਰ ਯੋਧੇ ਦੀ ਗਾਥਾ।’’ -ਏਐੱਨਆਈ