ਹਲਕੇ ਲੜਾਕੂ ਜਹਾਜ਼ ‘ਪ੍ਰਚੰਡ’ ਦਾ ਸਫਲ ਪ੍ਰੀਖਣ

ਨਵੀਂ ਦਿੱਲੀ, 30 ਅਕਤੂਬਰ
ਭਾਰਤੀ ਸੈਨਾ ਨੇ ਅੱਜ ਦਿਨ ਤੇ ਰਾਤ ਦੋਵਾਂ ਸਥਤਿੀਆਂ ਵਿੱਚ 70 ਐੱਮਐੱਮ ਦੇ ਰਾਕੇਟ ਦਾਗ਼ ਕੇ ਹਲਕੇ ਲੜਾਕੂ ਹੈਲੀਕਾਪਟਰ (ਐੱਲਸੀਐੱਚ) ‘ਪ੍ਰਚੰਡ’ ਦਾ ਸਫਲ ਪ੍ਰੀਖਣ ਕੀਤਾ ਹੈ। ਫੌਜ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਪ੍ਰੀਖਣ ਅਸਾਮ ਵਿੱਚ ਲੀਕਾਬਾਲੀ ਨੇੜੇ ਫਾਇਰਿੰਗ ਰੇਂਜ ਵਿੱਚ ਕੀਤਾ ਗਿਆ। ਫੌਜ ਨੇ ‘ਐਕਸ’ ਉੱਤੇ ਕਿਹਾ, ‘‘ਐੱਲਸੀਐੱਚ ਪ੍ਰਚੰਡ ਤੋਂ 70 ਐੱਮਐੱਮ ਦੇ ਰਾਕੇਟ ਅਤੇ 20ਐੱਮਐੱਮ ਦੇ ਗੋਲੇ ਦਾਗ਼ੇ ਗਏ, ਜੋ ਦਿਨ ਅਤੇ ਰਾਤ ਦੋਵਾਂ ਸਥਤਿੀਆਂ ਵਿੱਚ ਨਿਸ਼ਾਨਾ ਬਿੰਨ੍ਹਣ ਵਿੱਚ ਸਫਲ ਰਹੇ।’’ ਇਸ ਮੌਕੇ ਫੌਜੀ ਹਵਾਬਾਜ਼ੀ ਦੇ ਡੀਜੀ ਲੈਫਟੀਨੈਂਟ ਜਨਰਲ ਏ ਕੇ ਸੂਰੀ ਵੀ ਮੌਜੂਦ ਸਨ। ਹਿੰਦੁਸਤਾਨ ਏਰੋਨੌਟਿਕਸ ਲਿਮਟਡ (ਐੱਚਏਐੱਲ) ਨੇ 5.8 ਟਨ ਦੇ ਦੋ ਇੰਜਣਾਂ ਵਾਲੇ ਇਸ ਹੈਲੀਕਾਪਟਰ ਦਾ ਨਿਰਮਾਣ ਕੀਤਾ ਹੈ। -ਪੀਟੀਆਈ