ਠੇਕੇ ਦੀ ਛੱਤ ਵਿੱਚ ਸੰਨ੍ਹ ਲਾ ਕੇ ਸ਼ਰਾਬ ਚੋਰੀ

ਪੱਤਰ ਪ੍ਰੇਰਕ
ਅਮਰਗੜ੍ਹ, 16 ਜੂਨ
ਇੱਥੇ ਨਿਆਮਤਪੁਰ ਸਥਿਤ ਮਨੀਸ਼ ਕੁਮਾਰ ਐਂਡ ਕੰਪਨੀ ਦੇ ਸ਼ਰਾਬ ਦੇ ਠੇਕੇ ਵਿੱਚ ਲੁੱਟ-ਖੋਹ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਠੇਕੇ ਦੇ ਕਾਰਿੰਦੇ ਵਿਕਾਸ ਕੁਮਾਰ ਨੇ ਦੱਸਿਆ ਕਿ ਦੇਰ ਰਾਤ ਲੁਟੇਰੇ ਛੱਤ ਵਿੱਚ ਸੰਨ੍ਹ ਲਾ ਕੇ ਅੰਦਰ ਦਾਖ਼ਲ ਹੋ ਗਏ ਅਤੇ ਉਸ ਦੀ ਕੁੱਟਮਾਰ ਕੀਤੀ।
ਉਸ ਨੇ ਦੱਸਿਆ ਕਿ ਲੁਟੇਰੇ ਇੱਕ ਮੋਟਰਸਾਈਕਲ ਅਤੇ ਇੱਕ ਮੋਟਰਸਾਈਕਲ ਰੇਹੜੀ ’ਤੇ ਆਏ ਸਨ ਜਿਨ੍ਹਾਂ ਨੇ ਠੇਕੇ ’ਚੋਂ ਸ਼ਰਾਬ ਦੀਆਂ ਬੋਤਲਾਂ ਤੇ ਡੱਬੇ ਲੁੱਟ ਕੇ ਰੇਹੜੀ ਵਿਚ ਰੱਖ ਲਏ। ਜਾਂਦੇ ਹੋਏ ਉਸ ਦਾ ਮੋਬਾਈਲ ਖੋਹ ਕੇ ਉਸ ਨੂੰ ਠੇਕੇ ਅੰਦਰ ਬੰਦ ਕਰ ਦਿੱਤਾ। ਠੇਕੇਦਾਰ ਗੁਰਮੇਲ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰੇ ਜਦੋਂ ਉਹ ਠੇਕੇ ’ਤੇ ਗਏ ਤਾਂ ਬਾਹਰੋਂ ਕੁੰਡਾ ਖੋਲ੍ਹ ਕੇ ਵੇਖਿਆ ਕਿ ਲੁਟੇਰੇ ਛੱਤ ਪਾੜ ਕੇ ਡੇਢ ਲੱਖ ਰੁਪਏ ਦੀ ਅੰਗਰੇਜ਼ੀ ਤੇ ਦੇਸੀ ਸ਼ਰਾਬ ਚੋਰੀ ਕਰਕੇ ਲੈ ਗਏ। ਪੁਲੀਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।