ਗੁਰੂ ਨਾਨਕ ਜੰਗਲ ਨੂੰ ਅੱਗ ਲੱਗਣ ਕਾਰਨ ਛੇ ਸੌ ਰੁੱਖ ਤੇ ਬੂਟੇ ਸੜੇ

ਸ਼ਾਹਕੋਟ (ਪੱਤਰ ਪ੍ਰੇਰਕ):

ਖੇਤਾਂ ਵਿੱਚ ਲਾਈ ਗਈ ਅੱਗ ਨੇ ਵਾਤਾਵਰਨ ਮਿੱਤਰਤਾ ਸੁਸਾਇਟੀ ਲੋਹੀਆਂ ਖਾਸ ਵੱਲੋਂ ਕਾਕੜ ਕਲਾਂ ਦੇ ਨਜ਼ਦੀਕ 2 ਕਨਾਲਾਂ ਵਿੱਚ ਲਾਏ ਗੁਰੂ ਨਾਨਕ ਜੰਗਲ ਨੂੰ ਵੀ ਆਪਣੀ ਲਪੇਟ ਵਿੱਚ ਲੈ ਲਿਆ, ਜਿਸ ਕਾਰਨ ਕਰੀਬ 600 ਦਰੱਖਤ ਤੇ ਬੂਟੇ ਸੜ ਕੇ ਸੁਆਹ ਹੋ ਗਏ। ਵਾਤਾਵਰਨ ਮਿੱਤਰਤਾ ਸੁਸਾਇਟੀ ਦੇ ਆਗੂ ਗੁਰਦੀਪ ਸਿੰਘ, ਦਾਰਾ ਜਲਾਲਪੁਰ, ਫੁੰਮਣ ਸਿੰਘ, ਜਗਮੋਹਨ ਸਿੰਘ, ਡਾ. ਜਿੰਦਰ, ਫੁੰਮਨ ਸਿੰਘ, ਚਰਨ ਕਮਲ, ਜਸਕੰਵਲ ਸਵੀਟੀ ਅਤੇ ਹਰਜਿੰਦਰ ਸਿੰਘ ਨੇ ਦੱਸਿਆ ਕਿ ਤਿੰਨ ਸਾਲ ਪਹਿਲਾਂ ਲਾਏ ਉਕਤ ਜੰਗਲ ਨੂੰ ਉਨ੍ਹਾਂ ਸਖ਼ਤ ਮਿਹਨਤ ਨਾਲ ਕਾਮਯਾਬ ਕੀਤਾ ਸੀ, ਪਰ ਹੁਣ ਇੱਕ ਕਿਸਾਨ ਵੱਲੋਂ ਖੇਤਾਂ ਵਿੱਚ ਲਾਈ ਅੱਗ ਕਾਰਨ ਇਹ ਸੜ ਕੇ ਸਵਾਹ ਗਿਆ। ਉਨ੍ਹਾਂ ਦੱਸਿਆ ਕਿ ‘ਆਪ’ ਦੇ ਸਾਬਕਾ ਹਲਕਾ ਸ਼ਾਹਕੋਟ ਦੇ ਇੰਚਾਰਜ ਮਰਹੂਮ ਰਤਨ ਸਿੰਘ ਕਾਕੜ ਕਲਾਂ ਦੀ ਪਤਨੀ ਰਣਜੀਤ ਕੌਰ ਨੇ ਪੰਚਾਇਤ ਅਤੇ ਸੁਸਾਇਟੀ ਦੇ ਆਗੂਆਂ ਦੀ ਹਾਜ਼ਰੀ ਵਿੱਚ ਖੇਤਾਂ ਨੂੰ ਅੱਗ ਲਗਾਉਣ ਵਾਲੇ ਕਿਸਾਨ ਨੂੰ ਬੁਲਾ ਕੇ 10 ਹਜ਼ਾਰ ਰੁਪਏ ਦੇ ਨਵੇਂ ਬੂਟੇ ਲਗਾਉਣ ਅਤੇ ਬਚੇ ਬੂਟਿਆਂ ਨੂੰ ਹਫ਼ਤੇ ਵਿੱਚ 2 ਵਾਰ ਪਾਣੀ ਲਗਾਉਣ ਲਈ ਪਾਬੰਦ ਕੀਤਾ।