ਚੋਰੀ ਦੇ ਮੋਬਾਈਲਾਂ ਤੇ ਵਾਹਨਾਂ ਸਮੇਤ ਛੇ ਗ੍ਰਿਫ਼ਤਾਰ

ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 22 ਅਕਤੂਬਰ
ਪੁਲੀਸ ਨੇ ਚੋਰੀ ਦੇ ਮੋਬਾਈਲਾਂ ਅਤੇ ਵਾਹਨਾਂ ਸਮੇਤ ਛੇ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਥਾਣਾ ਸਲੇਮ ਟਾਬਰੀ ਦੇ ਥਾਣੇਦਾਰ ਹਰਮੇਸ਼ ਲਾਲ ਨੇ ਦੱਸਿਆ ਕਿ ਪੁਲੀਸ ਪਾਰਟੀ ਨੇ ਗਸ਼ਤ ਦੌਰਾਨ ਬੀਕਾਨੇਰ ਸਵੀਟ ਨੇੜੇ ਪੈਟਰੋਲ ਪੰਪ ਸਲੇਮ ਟਾਬਰੀ ਮੌਜੂਦ ਸੀ ਤਾਂ ਪਵਨ ਸਿੰਘ, ਕਮਲ ਵਾਸੀ ਭਾਈ ਮੰਨਾ ਸਿੰਘ ਨਗਰ, ਕਾਨਦੇਵ ਵਾਸੀ ਮੁਹੱਲਾ ਪੀਰੂ ਬੰਦਾ ਸਲੇਮ ਟਾਬਰੀ ਅਤੇ ਕ੍ਰਿਸ਼ਨ ਕੁਮਾਰ ਮੁੱਖਿਆ ਵਾਸੀ ਕੁੰਦਨਪੁਰੀ ਨੂੰ ਜੁਪੀਟਰ ਸਕੂਟਰ ਅਤੇ ਬਿਨਾਂ ਨੰਬਰੀ ਐਕਟਿਵਾ ਸਕੂਟਰ ’ਤੇ ਆਉਂਦਿਆਂ ਕਾਬੂ ਕਰਕੇ ਉਨ੍ਹਾਂ ਪਾਸੋਂ ਜੁਪੀਟਰ, ਐਕਟਿਵਾ ਅਤੇ ਖੋਹੇ ਗਏ ਤਿੰਨ ਮੋਬਾਈਲ ਫੋਨ ਵੱਖ-ਵੱਖ ਮਾਰਕਾ ਬਰਾਮਦ ਕੀਤੇ ਗਏ ਹਨ।
ਇਸੇ ਤਰ੍ਹਾਂ ਥਾਣਾ ਜੋਧੇਵਾਲ ਦੀ ਪੁਲੀਸ ਨੂੰ ਵਿਸ਼ਾਲ ਰਾਜ ਵਾਸੀ ਨਿਊ ਮਾਧੋਪੁਰੀ ਨੇ ਦੱਸਿਆ ਕਿ ਉਹ ਬਸਤੀ ਜੋਧੇਵਾਲ ਚੌਕ ਤੋਂ ਪੈਦਲ ਹੀ ਕੈਲਾਸ਼ ਨਗਰ ਰੋਡ ਵੱਲ ਜਾ ਰਿਹਾ ਸੀ ਤਾਂ ਬੱਗਾ ਸਿੰਘ ਦੇ ਗੁਰਦੁਆਰਾ ਨਜ਼ਦੀਕ ਪਿੱਛੋਂ ਦੋ ਨੌਜਵਾਨ ਪੈਦਲ ਆਏ ਜਿਨ੍ਹਾਂ ਉਸਨੂੰ ਘੇਰ ਕੇ ਉਸਦੀ ਗਰਦਨ ’ਤੇ ਦਾਹ ਰੱਖ ਕੇ ਉਸਦਾ ਮੋਬਾਈਲ ਟੈਕਨੋ ਖੋਹ ਲਿਆ ਅਤੇ ਬਸਤੀ ਜੋਧੇਵਾਲ ਚੌਕ ਸਾਈਡ ਵੱਲ ਭੱਜ ਗਏ। ਥਾਣੇਦਾਰ ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਪੁਲੀਸ ਵੱਲੋਂ ਤਫ਼ਤੀਸ਼ ਦੌਰਾਨ ਬਲਰਾਮ ਵਾਸੀ ਬਾਵਾ ਕਲੋਨੀ ਅਤੇ ਲਖਵੀਰ ਸਿੰਘ ਵਾਸੀ ਬਜਰੰਗ ਵਿਹਾਰ ਨੂੁੰ ਗ੍ਰਿਫ਼ਤਾਰ ਕਰ ਕੇ ਉਨ੍ਹਾਂ ਪਾਸੋਂ ਤਿੰਨ ਮੋਬਾਈਲ ਅਤੇ ਇੱਕ ਦਾਹ ਬਰਾਮਦ ਕੀਤਾ ਗਿਆ ਹੈ।