ਸਰੀਏ ਦਾ ਟਰੱਕ ਲੁੱਟਣ ਵਾਲੇ ਛੇ ਕਾਬੂ

ਪੱਤਰ ਪ੍ਰੇਰਕ
ਜਲੰਧਰ, 30 ਸਤੰਬਰ
ਕਮਿਸ਼ਰੇਟ ਪੁਲੀਸ ਨੇ ਸਰੀਏ ਦਾ ਟਰੱਕ ਲੁੱਟਣ ਦੇ ਦੋਸ਼ ਹੇਠ ਛੇ ਜਣਿਆਂ ਨੂੰ ਕਾਬੂ ਕੀਤਾ ਹੈ। ਪੁਲੀਸ ਨੇ ਇਸ ਮਾਮਲੇ ਵਿੱਚ ਵਰਤੀ ਕਾਰ ਵੀ ਬਰਾਮਦ ਕੀਤੀ ਹੈ। ਪੁਲੀਸ ਕਮਿਸ਼ਨਰ ਕੁਲਦੀਪ ਚਾਹਲ ਨੇ ਦੱਸਿਆ ਕਿ ਸੰਜੀਵ ਕੁਮਾਰ ਪੁੱਤਰ ਸਰਵਨ ਰਾਮ ਨੇ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਲੰਮਾ ਪਿੰਡ ਚੌਕ ਜੀਟੀ ਰੋਡ ਜਲੰਧਰ ਤੋਂ ਕੁਝ ਵਿਅਕਤੀਆਂ ਨੇ ਪਿਸਤੋਲ ਦੀ ਨੋਕ ’ਤੇ ਸਰੀਏ ਦਾ ਭਰਿਆ ਟਰੱਕ ਖੋਹ ਲਿਆ। ਇਸ ਤੋਂ ਬਾਅਦ ਡੀਸੀਪੀ ਹਰਵਿੰਦਰ ਸਿੰਘ ਵਿਰਕ ਦੀ ਨਿਗਰਾਨੀ ਹੇਠ ਟੀਮਾਂ ਬਣਾਈਆਂ ਜਨਿ੍ਹਾਂ ਗੁਪਤ ਸੂਚਨਾ ਦੇ ਆਧਾਰ ’ਤੇ ਫਗਵਾੜਾ-ਜਲੰਧਰ ਹਾਈਵੇਅ ਰਾਮਾਂਮੰਡੀ ਪੁਲ ਤੋਂ ਪਹਿਲਾਂ ਨਾਕਾਬੰਦੀ ਕੀਤੀ। ਇਸ ਦੌਰਾਨ ਇਕ ਟਰੱਕ ਪਿੱਛੇ ਹੀ ਰੁਕ ਗਿਆ। ਪੁਲੀਸ ਦੀ ਸਖਤੀ ਤੋਂ ਬਾਅਦ ਚਾਰ ਨੌਜਵਾਨਾਂ ਨੇ ਟਰੱਕ ਲੁੱਟਣ ਦੀ ਜੁਰਮ ਕਬੂਲਿਆ ਤੇ ਨਿਸ਼ਾਨਦੇਹੀ ’ਤੇ ਵਾਰਦਾਤ ਦੌਰਾਨ ਵਰਤੀ ਕਾਰ ਬਰਾਮਦ ਹੋਈ।