ਛੇ ਮੁਲਜ਼ਮ ਨਸ਼ੀਲੇ ਪਦਾਰਥਾਂ ਸਮੇਤ ਕਾਬੂ

ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 12 ਅਕਤੂਬਰ
ਵੱਖ ਵੱਖ ਥਾਣਿਆਂ ਦੀ ਪੁਲੀਸ ਨੇ ਅੱਜ ਛੇ ਵਿਅਕਤੀਆਂ ਨੂੰ ਅਫ਼ੀਮ, ਗਾਂਜੇ, ਹੈਰੋਇਨ ਅਤੇ ਨਸ਼ੀਲੇ ਪਾਊਡਰ ਸਮੇਤ ਗ੍ਰਿਫ਼ਤਾਰ ਕੀਤਾ ਹੈ। ਸੀਆਈਏ-1 ਲੁਧਿਆਣਾ ਦੀ ਥਾਣੇਦਾਰ ਗੁਰਸ਼ਿਦਰ ਕੌਰ ਨੇ ਦੱਸਿਆ ਕਿ ਗਸ਼ਤ ਦੌਰਾਨ ਪੁਲੀਸ ਨੇ ਕਬਾੜੀਆ ਮਾਰਕੀਟ ਸਮਰਾਲਾ ਚੌਕ ਮੇਨ ਰੋਡ ’ਤੇ ਰਵਿੰਦਰ ਪਿੰਡ ਪਾਰਾਪੁਰ ਨਵਾਂਸ਼ਹਿਰ ਨੂੰ 2 ਕਿੱਲੋ 100 ਗ੍ਰਾਮ ਅਫ਼ੀਮ ਸਮੇਤ ਗ੍ਰਿਫ਼ਤਾਰ ਕੀਤਾ ਹੈ। ਥਾਣਾ ਡਿਵੀਜ਼ਨ ਨੰਬਰ 3 ਦੀ ਪੁਲੀਸ ਨੇ ਇਸ ਸਬੰਧ ਵਿੱਚ ਕੇਸ ਦਰਜ ਕੀਤਾ ਹੈ। ਕਰਾਈਮ ਬ੍ਰਾਂਚ-1 ਲੁਧਿਆਣਾ ਦੇ ਥਾਣੇਦਾਰ ਜਸਵਿੰਦਰ ਸਿੰਘ ਨੇ ਦੱਸਿਆ ਕਿ ਰੇਲਵੇ ਕਲੋਨੀ ਨੰਬਰ 7 ਕੋਲ ਪੁਲੀਸ ਨੇ ਅਜੈ ਕੁਮਾਰ ਅਤੇ ਉਤਕਰਸਨ ਵਾਸੀ ਲੇਬਰ ਕਲੋਨੀ ਕੋਚਰ ਮਾਰਕੀਟ ਨੂੰ ਸ਼ੱਕ ਦੇ ਆਧਾਰ ’ਤੇ ਰੋਕ ਕੇ ਤਲਾਸ਼ੀ ਲਈ ਤਾਂ ਉਨ੍ਹਾਂ ਕੋਲੋਂ 270 ਗ੍ਰਾਮ ਹੈਰੋਇਨ ਬਰਾਮਦ ਹੋਈ। ਇਸੇ ਤਰ੍ਹਾਂ ਥਾਣਾ ਸਾਹਨੇਵਾਲ ਦੇ ਥਾਣੇਦਾਰ ਰਾਮ ਮੂਰਤੀ ਨੇ ਦੱਸਿਆ ਕਿ ਮੁਹੱਲਾ ਸਤਿਗੁਰੂ ਨਗਰ ਕੋਲੀ ਪੁਲੀਸ ਨੇ ਰੋਸ਼ਨ ਬੀਨ ਵਾਸੀ ਅੰਬ ਵਾਲੀ ਗਲੀ ਸਤਿਗੁਰੂ ਨਗਰ ਦੀ ਤਲਾਸ਼ੀ ਲਈ ਤਾਂ 180 ਗ੍ਰਾਮ ਗਾਂਜਾ ਬਰਾਮਦ ਹੋਇਆ। ਇਕ ਹੋਰ ਮਾਮਲੇ ਵਿੱਚ ਥਾਣਾ ਡਿਵੀਜ਼ਨ ਨੰਬਰ 3 ਦੀ ਪੁਲੀਸ ਨੇ ਵਿਸ਼ੂ ਕੁਮਾਰ ਵਾਸੀ ਜਨਕਪੁਰੀ ਤੇ ਦੀਪਕ ਵਾਸੀ ਘੋੜਾ ਕਲੋਨੀ ਨੂੰ ਕਿਰਪਾਲ ਨਗਰ ਪੁਲੀ ਵੱਲੋਂ ਮੋਟਰਸਾਈਕਲ ’ਤੇ ਆਉਂਦਿਆਂ ਵੇਖ ਕੇ ਤਲਾਸ਼ੀ ਲਈ ਤਾਂ ਉਨ੍ਹਾਂ ਕੋਲੋਂ 9 ਗ੍ਰਾਮ ਨਸ਼ੀਲਾ ਪਾਊਡਰ ਬਰਾਮਦ ਹੋਇਆ।