ਗਾਇਕ ਸੁਲਤਾਨਾ ਨੂਰਾ ਨੇ ਗੀਤਾਂ ਨਾਲ ਸਰੋਤੇ ਕੀਲੇ

ਪੱਤਰ ਪ੍ਰੇਰਕ
ਯਮੁਨਾਨਗਰ, 21 ਅਕਤੂਬਰ
ਡੀਏਵੀ ਗਰਲਜ਼ ਕਾਲਜ ਵਿੱਚ ਸ੍ਰੀ ਗਣੇਸ਼ ਐਂਟਰਟੇਨਮੈਂਟ ਵੱਲੋਂ ਦੀਵਾਲੀ ਦੇ ਤਿਉਹਾਰ ਨੂੰ ਸਮਰਪਿਤ ਸੂਫੀ ਨਾਈਟ ਕਰਵਾਈ ਗਈ ਜਿਸ ਵਿੱਚ ਗਾਇਕਾ ਨੇ ਸੁਲਤਾਨਾ ਨੂਰਾ ਸ਼ਿਰਕਤ ਕੀਤੀ। ਸਮਾਗਮ ਵਿੱਚ ਯਮੁਨਾਨਗਰ ਦੇ ਵਿਧਾਇਕ ਘਣਸ਼ਿਆਮ ਦਾਸ ਅਰੋੜਾ ਮੁੱਖ ਮਹਿਮਾਨ ਵਜੋਂ ਹਾਜ਼ਰ ਹੋਏ ਜਿਨ੍ਹਾਂ ਦਾ ਪ੍ਰਬੰਧਕ ਪੰਕਜ ਅਰੋੜਾ ਨੇ ਗੁਲਦਸਤਾ ਦੇ ਕੇ ਸਵਾਗਤ ਕੀਤਾ। ਅਰੋੜਾ ਨੇ ਦੱਸਿਆ ਕਿ ਯਮੁਨਾਨਗਰ ਦੇ ਅੰਦਰ ਪਹਿਲੀ ਵਾਰ ਸੂਫੀ ਨਾਈਟ ਕਰਵਾਈ ਗਈ ਹੈ, ਜਿਸ ਵਿੱਚ ਕਰਨਾਲ, ਅੰਮ੍ਰਿਤਸਰ ਅਤੇ ਲਾਡਵਾ ਦੇ ਦਰਸ਼ਕਾਂ ਨੇ ਵੀ ਸ਼ਿਰਕਤ ਕੀਤੀ। ਸੂਫੀ ਗਾਇਕ ਸੁਲਤਾਨਾ ਨੇ ਸਰੋਤਿਆਂ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਉਨ੍ਹਾਂ ਨੂੰ ਯਮੁਨਾਨਗਰ ਆ ਕੇ ਬਹੁਤ ਖੁਸ਼ੀ ਹੋਈ ਹੈ ਅਤੇ ਇੱਥੋਂ ਬਹੁਤ ਪਿਆਰ ਮਿਲਿਆ। ਇਸ ਦੌਰਾਨ ਉਨ੍ਹਾਂ ਆਪਣੇ ਗੀਤਾਂ ‘ਮਤਲਬ ਦੇ ਰਿਸ਼ਤੇ ਨੇ’ ਸਣੇ ਹੋਰਾਂ ਨਾਲ ਸਰੋਤਿਆਂ ਨੂੰ ਕੀਲ ਕੇ ਰੱਖ ਦਿੱਤਾ। ਯਮੁਨਾਨਗਰ ਦੇ ਵਿਧਾਇਕ ਘਣਸ਼ਿਆਮ ਦਾਸ ਅਰੋੜਾ ਨੇ ਕਿਹਾ ਕਿ ਪੰਕਜ ਅਰੋੜਾ ਬਹੁਤ ਵਧੀਆ ਕੰਮ ਕਰ ਰਹੇ ਹਨ, ਹਰ ਸਾਲ ਉਹ ਯਮੁਨਾਨਗਰ ਦੇ ਮਨੋਰੰਜਨ ਲਈ ਕੁਝ ਨਾ ਕੁਝ ਕਰਦੇ ਹਨ। ਮੁਹੰਮਦ ਰਫੀ ਨਾਈਟ ਮਨਾਊਣ ਤੋਂ ਇਲਾਵਾ ਉਹ ਯਮੁਨਾਨਗਰ ਦੀ ਟਰੈਫ਼ਿਕ ’ਤੇ ਇਕ ਛੋਟੀ ਫਿਲਮ ਬਣਾ ਰਹੇ ਹਨ ਜਿਸ ਵਿਚ ਯਮੁਨਾਨਗਰ ਦੇ ਕਈ ਕਲਾਕਾਰਾਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਸੁਲਤਾਨਾ ਨੂਰਾ ਨੇ ਬਾਲੀਵੁੱਡ ਗੀਤ ਮਤਲਬ ਦੇ ਰਿਸ਼ਤੇ ਨੇ ਗਾ ਕੇ ਦਰਸ਼ਕਾਂ ਦਾ ਮਨ ਮੋਹ ਲਿਆ।