ਗਿਰਦਾਵਰੀ ਮੌਕੇ ਚੱਲੀ ਗੋਲੀ

ਸੁਭਾਸ਼ ਚੰਦਰ
ਸਮਾਣਾ, 21 ਨਵੰਬਰ
ਪਿੰਡ ਰਾਜਲਾ ਵਿੱਚ ਜ਼ਮੀਨ ਦੀ ਗਿਰਦਾਵਰੀ ਦੌਰਾਨ ਦੋ ਧਿਰਾਂ ਵਿੱਚ ਹੋਈ ਲੜਾਈ ਮੌਕੇ ਗੋਲੀ ਚੱਲੀ ਹੈ। ਸਦਰ ਪੁਲੀਸ ਨੇ ਮੌਕੇ ’ਤੇ ਪਹੁੰਚ ਕੇ ਸਥਿਤੀ ਦਾ ਜਾਇਜ਼ਾ ਲੈਣ ਮਗਰੋਂ ਘਟਨਾ ਵਿੱਚ ਵਰਤਿਆ ਗਿਆ ਰਿਵਾਲਵਰ ਬਰਾਮਦ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਥਾਣਾ ਸਦਰ ਮੁਖੀ ਅਵਤਾਰ ਸਿੰਘ ਨੇ ਦੱਸਿਆ ਕਿ ਪਿੰਡ ਰਾਜਲਾ ਵਿੱਚ ਮਾਲ ਅਧਿਕਾਰੀ ਆਪਣੀ ਟੀਮ ਨਾਲ, ਪੂਜਾ ਰਾਣੀ ਵੱਲੋਂ ਗਿਰਦਾਵਰੀ ਦੇ ਪਾਏ ਕੇਸ ਦਾ ਮੌਕਾ ਵੇਖ ਕੇ ਵਾਪਸ ਆ ਰਹੇ ਸਨ ਕਿ ਪਲਵਿੰਦਰ ਸਿੰਘ ਵਗੈਰਾ ਦਾ ਪੂਜਾ ਰਾਣੀ ਧਿਰ ਦੇ ਨਾਲ ਝਗੜਾ ਹੋ ਗਿਆ। ਇਸ ਦੌਰਾਨ ਕਿਸੇ ਵਿਅਕਤੀ ਨੇ ਹਵਾਈ ਫਾਇਰ ਕਰ ਦਿੱਤੇ। ਉਨ੍ਹਾਂ ਦੱਸਿਆ ਕਿ ਇੱਕ ਧਿਰ ਨੇ ਉਨ੍ਹਾਂ ਨੂੰ ਘਟਨਾ ਵਿੱਚ ਵਰਤਿਆ ਰਿਵਾਲਵਰ ਦਿੱਤਾ ਹੈ, ਜਿਸ ਦੇ ਖੋਲ੍ਹਾਂ ਦੀ ਭਾਲ ਕਰਕੇ ਕਥਿਤ ਮੁਲਜ਼ਮਾਂ ਖਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ। ਝਗੜੇ ਦੌਰਾਨ ਚਾਰ ਵਿਅਕਤੀ ਜ਼ਖਮੀ ਹੋਏ ਹਨ ਜੋ ਸਿਵਲ ਹਸਪਤਾਲ ਸਮਾਣਾ ਅਤੇ ਰਜਿੰਦਰਾ ਹਸਪਤਾਲ ਪਟਿਆਲਾ ਵਿੱਚ ਜ਼ੇਰੇ ਇਲਾਜ ਹਨ।