ਛੋਟਾ ਪਰਦਾ

ਧਰਮਪਾਲ
ਕਰਨਵੀਰ ਨੇ ਮਾਂ ਦੀ ਇੱਛਾ ’ਤੇ ਫੁੱਲ ਚੜ੍ਹਾਏ

ਮਸ਼ਹੂਰ ਟੈਲੀਵਿਜ਼ਨ ਅਦਾਕਾਰ ਕਰਨਵੀਰ ਬੋਹਰਾ ਆਪਣੇ ਕਿਰਦਾਰ ਵਿਰਾਜ ਡੋਬਰੀਆਲ ਲਈ ਦਰਸ਼ਕਾਂ ਵਿੱਚ ਬਹੁਤ ਮਸ਼ਹੂਰ ਹੈ। ਫਿਲਹਾਲ ਉਹ ਡਿਜ਼ਨੀ ਹੌਟਸਟਾਰ ਦੇ ਸ਼ੋਅ ‘ਸੌਭਾਗਯਵਤੀ ਭਵ: ਨਿਯਮ ਔਰ ਸ਼ਰਤੇਂ ਲਾਗੂ’ ਦੇ ਨਵੇਂ ਸੀਜ਼ਨ ’ਚ ਵੀ ਨਜ਼ਰ ਆ ਰਿਹਾ ਹੈ। ਭਾਵੇਂ ਕਰਨਵੀਰ ਆਪਣੇ ਨਕਾਰਾਤਮਕ ਕਿਰਦਾਰ ਵਿੱਚ ਬਹੁਤ ਜ਼ਾਲਮ ਨਜ਼ਰ ਆਉਂਦਾ ਹੈ, ਪਰ ਆਪਣੀ ਨਿੱਜੀ ਜ਼ਿੰਦਗੀ ਵਿੱਚ ਉਹ ਬਹੁਤ ਉਦਾਰ ਅਤੇ ਸਹਿਜ ਸੁਭਾਅ ਵਾਲਾ ਵਿਅਕਤੀ ਹੈ। ਹਾਲ ਹੀ ’ਚ ਆਪਣੇ ਸ਼ੋਅ ਦੇ ਸੈੱਟ ’ਤੇ ਉਸ ਨੇ ਆਪਣੀ ਮਾਂ ਦੀ ਇੱਛਾ ਮੁਤਾਬਕ ਸਾਰਿਆਂ ਲਈ ਖਾਣੇ ਦਾ ਇੰਤਜ਼ਾਮ ਕੀਤਾ। ਇੰਨਾ ਹੀ ਨਹੀਂ ਉਸ ਨੇ ਸੈੱਟ ’ਤੇ ਮੌਜੂਦ ਸਾਰੀ ਕਾਸਟ ਅਤੇ ਕਰੂ ਮੈਂਬਰਾਂ ਨੂੰ ਆਪਣੇ ਹੱਥਾਂ ਨਾਲ ਖਾਣਾ ਪਰੋਸਿਆ ਵੀ।
ਕਰਨਵੀਰ ਬੋਹਰਾ ਨੇ ਇਸ ਨਿੱਜੀ ਪਲ ਨੂੰ ਆਪਣੇ ਸੋਸ਼ਲ ਮੀਡੀਆ ਪਲੈਟਫਾਰਮ ’ਤੇ ਆਪਣੇ ਪ੍ਰਸ਼ੰਸਕਾਂ ਨਾਲ ਸਾਂਝਾ ਕੀਤਾ, ਜਿਸ ’ਚ ਉਸ ਨੇ ਆਪਣੀ ਮਾਂ ਨਾਲ ਆਪਣੇ ਖੂਬਸੂਰਤ ਰਿਸ਼ਤੇ ਦਾ ਖੁਲਾਸਾ ਕੀਤਾ ਅਤੇ ਲਿਖਿਆ, ‘‘ਹਰ ਵੀਰਵਾਰ ਨੂੰ ਮੇਰੀ ਮਾਂ ਘਰ ’ਚ ਆਪਣੇ ਹੱਥਾਂ ਨਾਲ ਪ੍ਰਸ਼ਾਦ ਬਣਾਉਂਦੀ ਹੈ ਅਤੇ ਮੈਨੂੰ ਦਿੰਦੀ ਹੈ। ਉਨ੍ਹਾਂ ਨੇ ‘ਸੌਭਾਗਯਵਤੀ ਭਵ: ਨਿਯਮ ਔਰ ਸ਼ਰਤੇਂ ਲਾਗੂ’ ਦੀ ਪੂਰੀ ਟੀਮ ਲਈ ਪ੍ਰਸ਼ਾਦ ਬਣਾਇਆ ਅਤੇ ਵਿਸ਼ੇਸ਼ ਤੌਰ ’ਤੇ ਮੈਨੂੰ ਆਪਣੇ ਹੱਥਾਂ ਨਾਲ ਹਰ ਕਿਸੇ ਨੂੰ ਇਸ ਦੀ ਸੇਵਾ ਕਰਨ ਲਈ ਕਿਹਾ। ਮੈਨੂੰ ਇਹ ਬਹੁਤ ਪਸੰਦ ਹੈ ਕਿ ਮਾਵਾਂ ਸਾਡੇ ਨਾਲ ਬੱਚਿਆਂ ਵਾਂਗ ਕਵਿੇਂ ਪੇਸ਼ ਆਉਂਦੀਆਂ ਹਨ ਅਤੇ ਸਾਨੂੰ ਹਦਾਇਤਾਂ ਦਿੰਦੀਆਂ ਹਨ। ਮੈਂ ਕਦੇ ਨਹੀਂ ਚਾਹੁੰਦਾ ਕਿ ਇਹ ਰਿਸ਼ਤਾ ਬਦਲੇ।’’ ਬੋਹਰਾ ਦੁਆਰਾ ਲਿਖਿਆ ਇਹ ਸੁੰਦਰ ਸੰਦੇਸ਼ ਇੱਕ ਮਾਂ ਤੋਂ ਪ੍ਰਾਪਤ ਪਿਆਰ, ਦੇਖਭਾਲ ਅਤੇ ਪ੍ਰਸ਼ੰਸਾ ਨੂੰ ਦਰਸਾਉਂਦਾ ਹੈ ਅਤੇ ਮਾਂ ਅਤੇ ਉਸ ਦੇ ਬੱਚੇ ਵਿਚਕਾਰ ਸਥਾਈ ਬੰਧਨ ਦੀ ਕਦਰ ਕਰਨ ਦੀ ਮਹੱਤਤਾ ’ਤੇ ਜ਼ੋਰ ਦਿੰਦਾ ਹੈ।

ਨਾਸਿਰ ਅਤੇ ਪ੍ਰਨੀਤ ‘ਚਾਂਦ ਜਲਨੇ ਲਗਾ’ ਦਾ ਹਿੱਸਾ ਬਣੇ

ਕਲਰਜ਼ ਦੇ ਨਵੇਂ ਸ਼ੋਅ ‘ਚਾਂਦ ਜਲਨੇ ਲਗਾ’ ਦੀ ਕਾਸਟ ਵਿੱਚ ਤਜਰਬੇਕਾਰ ਅਦਾਕਾਰ ਨਾਸਿਰ ਖਾਨ ਅਤੇ ਪ੍ਰਨੀਤ ਭੱਟ ਸ਼ਾਮਲ ਹੋ ਗਏ ਹਨ। ਇਹ ਸ਼ੋਅ ਬਚਪਨ ਦੇ ਪ੍ਰੇਮੀ ਦੇਵ ਅਤੇ ਤਾਰਾ ਦੇ ਰੁਮਾਂਟਿਕ ਸਫ਼ਰ ਨੂੰ ਦਰਸਾਉਂਦਾ ਹੈ ਜੋ ਜੀਵਨ ਦੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਹਨ।
ਕਨਿਕਾ ਮਾਨ ਅਤੇ ਵਿਸ਼ਾਲ ਆਦਿਤਿਆ ਸਿੰਘ ਇਸ ਸ਼ੋਅ ਦੀ ਸਟਾਰ ਕਾਸਟ ਵਿੱਚ ਸ਼ਾਮਲ ਹਨ ਜਨਿ੍ਹਾਂ ਵਿੱਚ ਹੁਣ ਨਾਸਿਰ ਖਾਨ ਅਤੇ ਪ੍ਰਨੀਤ ਭੱਟ ਸ਼ਾਮਲ ਹੋਣਗੇ ਜੋ ਕ੍ਰਮਵਾਰ ਵਨਰਾਜ ਸਹਿਗਲ ਅਤੇ ਸਰਤਾਜ ਸਹਿਗਲ ਦੀਆਂ ਭੂਮਿਕਾਵਾਂ ਨਿਭਾਉਣਗੇ। ਵਨਰਾਜ ਤਾਰਾ ਦੇ ਪਿਤਾ ਹਨ, ਜੋ ਪ੍ਰਤਿਭਾ ਅਤੇ ਮਿਹਨਤ ਦੀ ਕਦਰ ਕਰਦੇ ਹਨ। ਜਦੋਂ ਕਿ ਸਰਤਾਜ ਸਹਿਗਲ ਵਨਰਾਜ ਦਾ ਭਰਾ ਹੈ ਜੋ ਹਮੇਸ਼ਾਂ ਆਪਣੇ ਭਰਾ ਦੀ ਦੌਲਤ ਤੋਂ ਈਰਖਾ ਕਰਦਾ ਹੈ।

ਵਨਰਾਜ ਸਹਿਗਲ ਦੀ ਭੂਮਿਕਾ ਬਾਰੇ ਗੱਲ ਕਰਦੇ ਹੋਏ ਨਾਸਿਰ ਖਾਨ ਨੇ ਕਿਹਾ, ‘‘ਮੈਂ ਇਸ ਸ਼ੋਅ ਰਾਹੀਂ ਕਲਰਜ਼ ਨਾਲ ਦੁਬਾਰਾ ਜੁੜ ਕੇ ਉਤਸ਼ਾਹਿਤ ਹਾਂ। ਮੈਂ ਵਨਰਾਜ ਸਹਿਗਲ ਦਾ ਕਿਰਦਾਰ ਨਿਭਾ ਰਿਹਾ ਹਾਂ, ਜੋ ਤਾਰਾ ਦੇ ਪਿਤਾ ਹਨ। ਉਹ ਪ੍ਰਤਿਭਾ ਅਤੇ ਮਿਹਨਤ ਦੋਵਾਂ ਦੀ ਕਦਰ ਕਰਦਾ ਹੈ। ਮੇਰੇ 30 ਸਾਲ ਦੇ ਕਰੀਅਰ ਵਿੱਚ ਇਹ ਪਹਿਲੀ ਵਾਰ ਹੈ ਜਦੋਂ ਮੈਂ ਵਨਰਾਜ ਵਰਗਾ ਕਿਰਦਾਰ ਨਿਭਾ ਰਿਹਾ ਹਾਂ ਜੋ ਬਰਾਬਰ ਦਾ ਭਾਵੁਕ, ਦੇਖਭਾਲ ਕਰਨ ਵਾਲਾ ਅਤੇ ਲਾਚਾਰ ਹੈ। ਮੈਨੂੰ ਉਮੀਦ ਹੈ ਕਿ ਦਰਸ਼ਕ ਸ਼ੋਅ ਵਿੱਚ ਮੇਰੇ ਇਸ ਸਫ਼ਰ ਦਾ ਆਨੰਦ ਲੈਣਗੇ।’’
ਸਰਤਾਜ ਸਹਿਗਲ ਦੀ ਭੂਮਿਕਾ ਨਿਭਾਉਂਦੇ ਹੋਏ ਪ੍ਰਨੀਤ ਭੱਟ ਨੇ ਕਿਹਾ, “ਕਲਰਜ਼ ਵਿੱਚ ਵਾਪਸੀ ਮੇਰੇ ਲਈ ਘਰ ਵਾਪਸੀ ਵਰਗਾ ਹੈ। ਮੈਂ ਇਸ ਰੁਮਾਂਟਿਕ ਡਰਾਮੇ ਵਿੱਚ ਇਹ ਭੂਮਿਕਾ ਨਿਭਾਉਣ ਲਈ ਬਹੁਤ ਉਤਸ਼ਾਹਿਤ ਹਾਂ। ਮੇਰਾ ਕਿਰਦਾਰ ਸਰਤਾਜ ਸਹਿਗਲ ਹੈ, ਜੋ ਵਨਰਾਜ ਦਾ ਚਲਾਕ ਭਰਾ ਹੈ। ਇਹ ਮੇਰੇ ਵੱਲੋਂ ਪਹਿਲਾਂ ਨਿਭਾਏ ਗਏ ਕਿਰਦਾਰਾਂ ਤੋਂ ਬਹੁਤ ਵੱਖਰਾ ਹੈ ਅਤੇ ਇਹੀ ਮੈਨੂੰ ਇਸ ਕਹਾਣੀ ਦਾ ਹਿੱਸਾ ਬਣਨ ਲਈ ਉਤਸ਼ਾਹਿਤ ਕਰਦਾ ਹੈ। ਮੈਂ ਇਸ ਸ਼ੋਅ ਨਾਲ ਆਪਣੇ ਪ੍ਰਸ਼ੰਸਕਾਂ ਦਾ ਮਨੋਰੰਜਨ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹਾਂ। ਮੈਨੂੰ ਉਮੀਦ ਹੈ ਕਿ ਦਰਸ਼ਕ ਮੈਨੂੰ ਇਸ ਭੂਮਿਕਾ ਵਿੱਚ ਸਵੀਕਾਰ ਕਰਨਗੇ। ਅਸੀਂ ਸਾਰੇ ਸ਼ੋਅ ਵਿੱਚ ਇੱਕ ਮਨੋਰੰਜਕ ਕਹਾਣੀ ਪੇਸ਼ ਕਰਨ ਦੀ ਪੂਰੀ ਕੋਸ਼ਿਸ਼ ਕਰ ਰਹੇ ਹਾਂ।”

ਨਿਸ਼ਠਾ ਅਤੇ ਸਨੇਹਾ ਨੇ ਗਾਇਆ ਟਾਈਟਲ ਟਰੈਕ

ਜ਼ੀ ਟੀਵੀ ਨੇ ਹਾਲ ਹੀ ਵਿੱਚ ਆਪਣੇ ਗਾਇਕੀ ਰਿਐਲਿਟੀ ਸ਼ੋਅ ‘ਸਾਰੇਗਾਮਾਪਾ’ ਦੇ ਨਵੇਂ ਸੀਜ਼ਨ ਨਾਲ ਵਾਪਸੀ ਕੀਤੀ ਹੈ। ਸ਼ੋਅ ਨੇ ਸੰਗੀਤ ਦੀ ਦੁਨੀਆ ਦੇ ਕੁਝ ਸਭ ਤੋਂ ਕੀਮਤੀ ਰਤਨਾਂ ਨੂੰ ਲੱਭਿਆ ਹੈ, ਜਿਸ ਵਿੱਚ ਸ਼੍ਰੇਆ ਘੋਸ਼ਾਲ, ਕੁਨਾਲ ਗੰਜਾਵਾਲਾ, ਕਮਾਲ ਖਾਨ ਅਤੇ ਅਮਾਨਤ ਅਲੀ ਵਰਗੇ ਪ੍ਰਤਿਭਾਵਾਨ ਗਾਇਕ ਸ਼ਾਮਲ ਹਨ।
ਇਸ ਸੀਜ਼ਨ ਨੇ ਪਹਿਲਾਂ ਹੀ ਸ਼ਾਨਦਾਰ ਸ਼ੁਰੂਆਤ ਕੀਤੀ ਹੈ। ਇਸ ਵਿੱਚ ਪੱਛਮੀ ਬੰਗਾਲ ਤੋਂ ਐਲਬਰਟ ਲੇਪਚਾ ਪਹਿਲੇ ਅਸਲੀ ਕਲਾਕਾਰ ਬਣੇ ਜਨਿ੍ਹਾਂ ਨੂੰ ਜ਼ੀ ਮਿਊਜ਼ਿਕ ਕੰਪਨੀ ਰਾਹੀਂ ਆਪਣੇ ਇੱਕ ਮੂਲ ਗੀਤ ਨੂੰ ਰਿਲੀਜ਼ ਕਰਨ ਦਾ ਮੌਕਾ ਮਿਲਿਆ। ਹੁਣ ਤਾਜ਼ਾ ਖ਼ਬਰ ਇਹ ਹੈ ਕਿ ਇਸ ਸ਼ੋਅ ਦੀਆਂ ਪ੍ਰਤੀਯੋਗੀਆਂ ਨਿਸ਼ਠਾ ਸ਼ਰਮਾ ਅਤੇ ਸਨੇਹਾ ਭੱਟਾਚਾਰੀਆ ਨੂੰ ਵੀ ਜ਼ੀ ਟੀਵੀ ਦੇ ਨਵੇਂ ਸ਼ੋਅ ‘ਕਿਉਂਕਿ... ਸਾਸ ਮਾਂ, ਬਹੂ ਬੇਟੀ ਹੋਤੀ ਹੈ’ ਦਾ ਟਾਈਟਲ ਟਰੈਕ ਗਾਉਣ ਦਾ ਵਧੀਆ ਮੌਕਾ ਮਿਲਿਆ ਹੈ। ਇਸ ਸ਼ੋਅ ਦਾ ਦਿਲਚਸਪ ਪ੍ਰੋਮੋ ਪਹਿਲਾਂ ਹੀ ਸਾਰਿਆਂ ਦਾ ਧਿਆਨ ਆਪਣੇ ਵੱਲ ਖਿੱਚ ਚੁੱਕਾ ਹੈ ਅਤੇ ਇਸ ਦਾ ਟਾਈਟਲ ਟਰੈਕ ਲੋਕਾਂ ’ਤੇ ਗਹਿਰਾ ਪ੍ਰਭਾਵ ਛੱਡੇਗਾ। ਇਸ ਗੀਤ ਨੂੰ ਸਾਰੇਗਾਮਾ ਦੀਆਂ ਪ੍ਰਤਿਭਾਸ਼ਾਲੀ ਗਾਇਕਾਵਾਂ ਨਿਸ਼ਠਾ ਅਤੇ ਸਨੇਹਾ ਨੇ ਖੂਬਸੂਰਤੀ ਨਾਲ ਗਾਇਆ ਹੈ, ਜੋ ਸੱਸ ਅਤੇ ਨੂੰਹ ਦੇ ਡੂੰਘੇ ਰਿਸ਼ਤੇ ਨੂੰ ਬਿਆਨ ਕਰਦਾ ਹੈ।
ਨਿਸ਼ਠਾ ਸ਼ਰਮਾ ਨੇ ਕਿਹਾ, “ਜ਼ੀ ਟੀਵੀ ਦੇ ਆਗਾਮੀ ਸ਼ੋਅ ਦੇ ਟਾਈਟਲ ਟਰੈਕ ਨਾਲ ਪਲੇਬੈਕ ਕਰੀਅਰ ਦੀ ਸ਼ੁਰੂਆਤ ਕਰਨਾ ਮੇਰੇ ਲਈ ਸਨਮਾਨ ਦੀ ਗੱਲ ਹੈ। ਆਪਣੀ ਜ਼ਿੰਦਗੀ ਵਿੱਚ ਪਹਿਲੀ ਵਾਰ ਮੈਂ ਇੱਕ ਪ੍ਰੋਫੈਸ਼ਨਲ ਸੈੱਟਅੱਪ ਵਿੱਚ ਇੱਕ ਗੀਤ ਰਿਕਾਰਡ ਕੀਤਾ ਅਤੇ ਇਹ ਕਿਸੇ ਸੁਪਨੇ ਤੋਂ ਘੱਟ ਨਹੀਂ ਸੀ। ਗੀਤ ਰਿਕਾਰਡ ਕਰਨ ਤੋਂ ਪਹਿਲਾਂ ਮੈਂ ਬਹੁਤ ਉਤਸ਼ਾਹਿਤ ਅਤੇ ਘਬਰਾਈ ਹੋਈ ਸੀ, ਪਰ ਸਾਰਿਆਂ ਨੇ ਮੇਰੇ ਲਈ ਇਸ ਨੂੰ ਬਹੁਤ ਆਸਾਨ ਬਣਾ ਦਿੱਤਾ।’’
ਸਨੇਹਾ ਭੱਟਾਚਾਰੀਆ ਨੇ ਕਿਹਾ, “ਜਦੋਂ ਮੈਨੂੰ ਇਹ ਗੀਤ ਗਾਉਣ ਲਈ ਸੰਪਰਕ ਕੀਤਾ ਗਿਆ ਤਾਂ ਮੈਂ ਬਹੁਤ ਉਤਸ਼ਾਹਿਤ ਹੋ ਗਈ। ਇਹ ਮੇਰੇ ਲਈ ਸੱਚਮੁੱਚ ਆਪਣੀ ਕਿਸਮ ਦਾ ਪਹਿਲਾ ਤਜਰਬਾ ਸੀ ਅਤੇ ਮੈਂ ਉਸ ਪਲ ਨੂੰ ਕਦੇ ਨਹੀਂ ਭੁੱਲਾਂਗੀ ਜਦੋਂ ਮੈਂ ਸਟੂਡੀਓ ਵਿੱਚ ਕਦਮ ਰੱਖਿਆ ਅਤੇ ਰਿਕਾਰਡਿੰਗ ਦੀਆਂ ਗੁੰਝਲਾਂ ਸਿੱਖੀਆਂ। ਮੈਨੂੰ ਖੁਸ਼ੀ ਹੈ ਕਿ ਮੇਰੀ ਮਿਹਨਤ ਰੰਗ ਲਿਆ ਰਹੀ ਹੈ। ਮੈਂ ਆਪਣੀ ਪ੍ਰਤਿਭਾ ਦਿਖਾਉਣ ਦਾ ਮੌਕਾ ਦੇਣ ਲਈ ‘ਸਾਰੇਗਾਮਾਪਾ’ ਦਾ ਧੰਨਵਾਦ ਕਰਨਾ ਚਾਹਾਂਗੀ। ਮੈਨੂੰ ਲੱਗਦਾ ਹੈ ਕਿ ਮੈਂ ਇਸ ਕੰਮ ਨਾਲ ਪੂਰਾ ਇਨਸਾਫ਼ ਕੀਤਾ ਹੈ।’’