ਜਿਊਲਰ ਦੀ ਕਾਰ ’ਤੇ ਫਾਇਰਿੰਗ

ਨਿੱਜੀ ਪੱਤਰ ਪ੍ਰੇਰਕ
ਅੰਬਾਲਾ, 24 ਜਨਵਰੀ
ਇੱਥੇ ਕੱਲ੍ਹ ਸ਼ਾਮ ਨਕਾਬਪੋਸ਼ ਵਿਅਕਤੀਆਂ ਵੱਲੋਂ ਨਹੌਣੀ-ਕਾਲਪੀ ਸੜਕ ’ਤੇ ਨਹੌਣੀ ਵਿੱਚ ਆਪਣੀ ਦੁਕਾਨ ਬੰਦ ਕਰ ਕੇ ਘਰ ਵਾਪਸ ਜਾ ਰਹੇ ਜਿਊਲਰ ਵਿਕਰਮਜੀਤ ਵਰਮਾ ਦੀ ਕਾਰ ’ਤੇ ਗੋਲੀਆਂ ਚਲਾਈਆਂ ਗਈਆਂ। ਗੋਲੀਆਂ ਕਾਰ ਦੇ ਬੋਨਟ ’ਤੇ ਲੱਗੀਆਂ ਜਿਸ ਕਰਕੇ ਉਸ ਦਾ ਬਚਾਅ ਹੋ ਗਿਆ। ਵਿਕਰਮਜੀਤ ਵਰਮਾ ਨੇ ਦੱਸਿਆ ਕਿ ਉਸ ਦੀ ਨਹੌਣੀ ਵਿੱਚ ਨਿਊ ਫੈਂਸੀ ਜਿਊਲਰ ਨਾਂ ਦੀ ਦੁਕਾਨ ਹੈ। ਕੱਲ੍ਹ ਸ਼ਾਮ ਨੂੰ ਜਦੋਂ ਉਹ ਦੁਕਾਨ ਬੰਦ ਕਰਕੇ ਕਾਰ ਰਾਹੀਂ ਆਪਣੇ ਘਰ ਸਾਹਾ ਜਾ ਰਿਹਾ ਸੀ ਤਾਂ ਨਹੌਣੀ-ਕਾਲਪੀ ਸੜਕ ’ਤੇ ਕਾਲਪੀ ਕੋਲ ਕਾਰ ਵਿਚ ਸਵਾਰ ਬਦਮਾਸ਼ਾਂ ਨੇ ਪਹਿਲਾਂ ਉਸ ਦੀ ਕਾਰ ਨੂੰ ਪਿੱਛੋਂ ਟੱਕਰ ਮਾਰੀ ਅਤੇ ਫਿਰ ਆਪਣੀ ਕਾਰ ਉਸ ਦੀ ਕਾਰ ਦੇ ਅੱਗੇ ਅੜਾ ਦਿੱਤੀ। ਅਜੇ ਉਹ ਕਾਰ ਵਿਚੋਂ ਉੱਤਰਨ ਹੀ ਲੱਗਾ ਸੀ ਕਿ ਸਿਲਵਰ ਰੰਗ ਦੀ ਕਾਰ ਵਿਚੋਂ ਮੂੰਹ-ਸਿਰ ਢਕੀ ਤਿੰਨ ਬਦਮਾਸ਼ ਉੱਤਰੇ ਅਤੇ ਉਨ੍ਹਾਂ ਵਿੱਚੋਂ ਇਕ ਨੇ ਉਸ ਦੀ ਕਾਰ ’ਤੇ ਗੋਲੀਆਂ ਵਰ੍ਹਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਵਿਕਰਮ ਅਨੁਸਾਰ ਉਸ ਦੀ ਕਾਰ ਦੇ ਬੋਨਟ ’ਤੇ ਤਿੰਨ-ਚਾਰ ਗੋਲੀਆਂ ਲੱਗੀਆਂ। ਉਸ ਨੇ ਕਾਰ ਬੈਕ ਕਰਕੇ ਹਾਈਵੇ ਵੱਲ ਮੋੜ ਲਈ ਅਤੇ ਕੁਝ ਦੂਰ ਜਾ ’ਕੇ ਡਾਇਲ 112 ਗੱਡੀ ਵਿਚ ਸਵਾਰ ਪੁਲੀਸ ਮੁਲਾਜ਼ਮਾਂ ਨੂੰ ਸਾਰੀ ਗੱਲ ਦੱਸੀ। ਮੁਲਾਣਾ ਪੁਲੀਸ ਨੇ ਮੌਕੇ ਦਾ ਮੁਆਇਨਾ ਕਰਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਵਿਕਰਮ ਅਨੁਸਾਰ ਪਹਿਲਾਂ ਉਸ ਦੀ ਰੈਕੀ ਕੀਤੀ ਗਈ ਹੈ।