ਸ਼ਾਹਰੁਖ਼ ਤੇ ਪ੍ਰੀਤੀ ਦੀ ਫਿਲਮ ‘ਕਲ ਹੋ ਨਾ ਹੋ’ ਮੁੜ ਹੋਵੇਗੀ ਰਿਲੀਜ਼

ਮੁੰਬਈ:

ਸ਼ਾਹਰੁਖ ਖਾਨ ਅਤੇ ਪ੍ਰੀਤੀ ਜ਼ਿੰਟਾ ਦੀ ਫਿਲਮ ‘ਕਲ ਹੋ ਨਾ ਹੋ’ ਮੁੜ ਰਿਲੀਜ਼ ਹੋਵੇਗੀ। ਇਸ ਦੀ ਜਾਣਕਾਰੀ ਧਰਮਾ ਪ੍ਰੋਡਕਸ਼ਨ ਨੇ ਇੰਸਟਾਗ੍ਰਾਮ ’ਤੇ ਅੱਜ ਨਸ਼ਰ ਕੀਤੀ ਹੈ। ਇਹ ਫਿਲਮ ਰੁਮਾਂਟਿਕ ਤੇ ਡਰਾਮਾ ਭਰਪੂਰ ਸੀ, ਜੋ 15 ਨਵੰਬਰ ਨੂੰ ਰਿਲੀਜ਼ ਹੋਵੇਗੀ। ਧਰਮਾ ਪ੍ਰੋਡਕਸ਼ਨ ਨੇ ਸੋਸ਼ਲ ਮੀਡੀਆ ’ਤੇ ਲਿਖਿਆ,‘ਲਾਲ ਅਬ ਸਬ ਕੇ ਦਿਲ ਕਾ ਹਾਲ ਹੈ, ਹੋਨੇ ਵਾਲਾ ਅਬ ਕਮਾਲ ਹੈ! #ਕਲ ਹੋ ਨਾ ਹੋ 15 ਨਵੰਬਰ ਨੂੰ।’ ਇਸ ਫਿਲਮ ਦੀ ਕਹਾਣੀ ਕਰਨ ਜੌਹਰ ਨੇ ਲਿਖੀ ਸੀ। ਉਨ੍ਹਾਂ ਵੀ ਅੱਜ ਇੰਸਟਾਗ੍ਰਾਮ ’ਤੇ ਇਸ ਫਿਲਮ ਦੇ ਮੁੜ ਰਿਲੀਜ਼ ਹੋਣ ਦੀ ਜਾਣਕਾਰੀ ਸਾਂਝੀ ਕੀਤੀ ਹੈ। ਇਹ ਜਾਣਕਾਰੀ ਮਿਲਣ ਤੋਂ ਬਾਅਦ ਫ਼ਿਲਮ ਦੇਖਣ ਵਾਲੇ ਉਤਸ਼ਾਹਿਤ ਹੋ ਗਏ ਹਨ। ਜ਼ਿਕਰਯੋਗ ਹੈ ਕਿ ਇਸ ਫਿਲਮ ਵਿੱਚ ਸੈਫ ਅਲੀ ਖਾਨ ਨੇ ਮੁੱਖ ਕਿਰਦਾਰ ਨਿਭਾਇਆ ਸੀ। ਇਸ ਫਿਲਮ ਵਿੱਚ ਜਯਾ ਬੱਚਨ, ਸੁਸ਼ਮਾ ਸੇਠ, ਰੀਮਾ ਲਾਗੂ ਸਹਿ ਅਦਾਕਾਰ ਸਨ। ਇਹ ਫਿਲਮ 28 ਨਵੰਬਰ, 2003 ਨੂੰ ਰਿਲੀਜ਼ ਹੋਈ ਸੀ ਤੇ ਇਸ ਦੇ ਸ਼ਾਨਦਾਰ ਟਰੈਕਾਂ ਅਤੇ ਪ੍ਰੀਤੀ ਦੇ ਨਾਲ ਸ਼ਾਹਰੁਖ ਦੀ ਸ਼ਾਨਦਾਰ ਕੈਮਿਸਟਰੀ ਕਾਰਨ ਇਹ ਫਿਲਮ ਕਲਾਸਿਕ ਬਣ ਗਈ ਸੀ। -ਆਈਏਐੱਨਐੱਸ