ਭਾਜਪਾ ਸਰਕਾਰ ਬਣਦੀ ਦੇਖ ਕਾਂਗਰਸੀ ਬੌਖਲਾਏ: ਸੈਣੀ

ਸਤਨਾਮ ਸਿੰਘ
ਸ਼ਾਹਬਾਦ ਮਾਰਕੰਡਾ, 24 ਸਤੰਬਰ
ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਨਰਾਇਣਗੜ੍ਹ ਹਲਕੇ ਤੋਂ ਭਾਜਪਾ ਉਮੀਦਵਾਰ ਡਾ. ਪਵਨ ਸੈਣੀ ਦੇ ਘਿਰਾਉ ਦੀ ਸਖ਼ਤ ਸ਼ਬਦਾਂ ਵਿੱਚ ਨਿੰਦਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਘਿਰਾਉ ਕਰਨ ਵਾਲੇ ਕਿਸਾਨ ਨਹੀਂ ਸਨ, ਬਲਕਿ ਕਿਸਾਨਾਂ ਦੇ ਭੇਸ ਵਿਚ ਕਾਂਗਰਸੀ ਸਨ।
ਉਨ੍ਹਾਂ ਕਿਹਾ ਕਿ ਸੂਬੇ ਵਿਚ ਤੀਜੀ ਵਾਰ ਭਾਜਪਾ ਦੀ ਸਰਕਾਰ ਬਣਦੀ ਦੇਖ ਕਾਂਗਰਸ ਨੇਤਾ ਬੁਖਲਾ ਗਏ ਹਨ ਤੇ ਘਟੀਆ ਤੇ ਮਾੜੀ ਰਾਜਨੀਤੀ ’ਤੇ ਉਤਾਰੂ ਹੋ ਗਏ ਹਨ।
ਉਨ੍ਹਾਂ ਅੱਜ ਬਾਬੈਨ ਹਲਕੇ ਦੇ ਪਿੰਡ ਊਂਟਸਾਲ, ਜਾਲ ਖੇੜਾ ਵਿਚ ਜਨ ਸਭਾਵਾਂ ਨੂੰ ਸੰਬੋਧਨ ਕੀਤਾ। ਇਸ ਦੌਰਾਨ ਕਈ ਪਿੰਡਾਂ ਵਿੱਚ ਉਨ੍ਹਾਂ ਨੂੰ ਸਨਮਾਨ ਦਾ ਪ੍ਰਤੀਕ ਪੱਗ ਬੰਨ੍ਹੀ ਗਈ। ਉਨ੍ਹਾਂ ਕਿਹਾ ਕਿ ਸੂਬੇ ਦੇ ਲੋਕ ਕਾਂਗਰਸ ਦੀ ਘਟੀਆ ਹਰਕਤਾਂ ਨੂੰ ਬਰਦਾਸ਼ਤ ਨਹੀਂ ਕਰਨਗੇ ਤੇ ਵਿਧਾਨ ਸਭਾ ਚੋਣਾਂ ਵਿੱਚ ਕਾਂਗਰਸ ਨੂੰ ਬਾਹਰ ਦਾ ਰਾਹ ਦਿਖਾਉਣਗੇ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਪਾਰਟੀ ਦਾ ਚੋਣ ਮਨੋਰਥ ਪੱਤਰ ਝੂਠ ਦਾ ਪੁਲੰਦਾ ਹੈ, ਜਿਸ ਦੇ ਸਹਾਰੇ ਉਹ ਚੋਣਾਂ ਜਿੱਤਣ ਦਾ ਭਰਮ ਮਨਾਂ ਵਿਚ ਪਾਲ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਭਾਜਪਾ ਦੇ ਸੰਕਲਪ ਪੱਤਰ ਲਈ ਇਕ ਲੱਖ 37 ਹਜ਼ਾਰ 566 ਲੋਕਾਂ ਦੇ ਸੁਝਾਅ ਆਏ ਸਨ ਤੇ ਸਾਰੇ ਸੁਝਾਆਂ ਦਾ ਮੰਥਨ ਕਰ ਕੇ ਭਾਜਪਾ ਨੇ ਨਾਨ ਸਟਾਪ ਹਰਿਆਣਾ ਦਾ ਸੰਕਲਪ ਪੱਤਰ ਜਾਰੀ ਕੀਤਾ ਸੀ।