ਸੰਤ ਕਬੀਰ ਜੈਅੰਤੀ: ਸ਼ੋਭਾ ਯਾਤਰਾ ਦੌਰਾਨ ਸੈਂਕੜੇ ਪੌਦੇ ਵੰਡੇ
ਪਵਨ ਗੋਇਲ
ਭੁੱਚੋ ਮੰਡੀ, 23 ਜੂਨ
ਧਾਨਕ ਸਮਾਜ ਵੱਲੋਂ ਸੰਤ ਕਬੀਰ ਦਾਸ ਦਾ ਪ੍ਰਕਾਸ਼ ਦਿਹਾੜਾ ਸ਼ਰਧਾ ਨਾਲ ਮਨਾਇਆ ਗਿਆ। ਇਸ ਮੌਕੇ ਪ੍ਰਬੰਧਕਾਂ ਨੇ ਸ਼ਹਿਰ ਵਿੱਚ ਵਿਸ਼ਾਲ ਸ਼ੋਭਾ ਯਾਤਰਾ ਕੱਢੀ। ਇਸ ਨੂੰ ਨਗਰ ਕੌਂਸਲ ਦੇ ਪ੍ਰਧਾਨ ਜੋਨੀ ਬਾਂਸਲ ਦੀ ਪਤਨੀ ਨੀਨਾ ਬਾਂਸਲ ਨੇ ਰਿਬਨ ਕੱਟ ਕੇ ਰਵਾਨਾ ਕੀਤਾ। ਇਸ ਸ਼ੋਭਾ ਯਾਤਰਾ ਵਿੱਚ ਵਾਤਾਵਰਨ ਨੂੰ ਬਚਾਉਣ ਸਬੰਧੀ ਤਿਆਰ ਕੀਤੀ ਝਾਕੀ ਖਿੱਚ ਦਾ ਕੇਂਦਰ ਰਹੀ। ਇਸ ਝਾਕੀ ਵਿੱਚ ਨੌਜਵਾਨਾਂ ਨੇ ਆਕਸੀਜਨ ਮਾਸਕ ਪਹਿਨ ਕੇ ਅਤੇ ਹੱਥਾਂ ਵਿੱਚ ਪੌਦੇ ਫੜ੍ਹ ਕੇ ਲੋਕਾਂ ਨੂੰ ਵੱਧ ਤੋਂ ਵੱਧ ਪੌਦੇ ਲਗਾਉਣ ਦਾ ਸੰਦੇਸ਼ ਦਿੱਤਾ। ਬੱਚਿਆਂ ਦੇ ਹੱਥਾਂ ਵਿੱਚ ‘ਰੁੱਖ ਮੀਂਹ ਲਿਆਂਉਦੇ ਨੇ, ਸਾਨੂੰ ਗਰਮੀ ਤੋਂ ਬਚਾਉਂਦੇ ਨੇ’ ਆਦਿ ਮਾਟੋਆਂ ਵਾਲੀਆਂ ਤਖਤੀਆਂ ਫੜ੍ਹੀਆਂ ਹੋਈਆਂ ਸਨ। ਨੌਜਵਾਨਾਂ ਨੇ ਸ਼ੋਭਾ ਯਾਤਰਾ ਵਿੱਚ ਸ਼ਾਮਲ ਪੌਦਿਆਂ ਦੀ ਭਰੀ ਟਰਾਲੀ ਵਿੱਚੋਂ ਲੋਕਾਂ ਨੂੰ ਖੂਬ ਪੌਦੇ ਵੰਡੇ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਸ਼ਾਮਲ ਸ਼ਰਧਾਲੂ ਬੀਬੀਆਂ ਨੇ ਸੰਤ ਕਬੀਰ ਜੀ ਦੇ ਦੋਹੇ ਗਾਏ। ਇਸ ਮੌਕੇ ਮਾਸਟਰ ਸੰਦੀਪ ਕੁਮਾਰ, ਡਾ. ਰਾਮ ਕੁਮਾਰ, ਰਾਜੂ ਲਡਵਾਲ, ਸਤੀਸ਼ ਕੁਮਾਰ, ਮਦਨ ਪੇਂਟਰ, ਸ਼ਾਮ ਲਾਲ ਅਤੇ ਕੌਸਲਰ ਪ੍ਰੇਮ ਕੁਮਾਰ ਆਦਿ ਹਾਜ਼ਰ ਸਨ।