‘ਰੌਕੀ ਔਰ ਰਾਨੀ ਕੀ ਪ੍ਰੇਮ ਕਹਾਨੀ’ ਨੇ ਸੌ ਕਰੋੜ ਕਮਾਏ

ਮੁੰਬਈ: ਲੋਕਾਂ ਵਿੱਚ ਕਰਨ ਜੌਹਰ ਦੀ ਫ਼ਿਲਮ ‘ਰੌਕੀ ਔਰ ਰਾਨੀ ਕੀ ਪ੍ਰੇਮ ਕਹਾਨੀ’ ਦੇਖਣ ਦਾ ਉਤਸ਼ਾਹ ਅਜੇ ਖ਼ਤਮ ਨਹੀਂ ਹੋਇਆ। ਰਣਵੀਰ ਸਿੰਘ, ਆਲੀਆ ਭੱਟ, ਧਰਮਿੰਦਰ, ਜਯਾ ਬੱਚਨ ਅਤੇ ਸ਼ਬਾਨਾ ਆਜ਼ਮੀ ਵਰਗੇ ਅਦਾਕਾਰਾਂ ਵਾਲੀ ਫ਼ਿਲਮ ਨੇ ਹੁਣ ਬਾਕਸ ਆਫਿਸ ’ਤੇ ਸੈਂਕੜਾ ਬਣਾ ਲਿਆ ਹੈ। ਬੀਤੇ ਦਿਨ ਫਿਲਮ ਨੇ 13.50 ਕਰੋੜ ਰੁਪਏ ਦੀ ਕਮਾਈ ਕੀਤੀ ਜਿਸ ਨਾਲ ਇਸ ਦੀ ਕੁੱਲ ਆਮਦਨ 105.08 ਕਰੋੜ ਰੁਪਏ ਹੋ ਗਈ। ਇੰਸਟਾਗ੍ਰਾਮ ’ਤੇ ਵਪਾਰ ਵਿਸ਼ਲੇਸ਼ਕ ਤਰੁਣ ਆਦਰਸ਼ ਨੇ ਲਿਖਿਆ ਕਿ ਦੂਜੇ ਵੀਕੈਂਡ ’ਤੇ ਫ਼ਿਲਮ ਨੇ 31.75 ਕਰੋੜ ਕਮਾਏ। ਉਸ ਨੇ ਲਿਖਿਆ 2023 ਵਿੱਚ ਬਾਕਸ ਆਫਿਸ ’ਤੇ ਸੌ ਕਰੋੜ ਰੁਪਏ ਕਮਾਉਣ ਵਾਲੀ ਇਹ ਛੇਵੀਂ ਹਿੰਦੀ ਫ਼ਿਲਮ ਹੈ। ਫ਼ਿਲਮ ਨੂੰ ਦਰਸ਼ਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ ਹੈ ਅਤੇ ਪੂਰੀ ਟੀਮ ਨੇ ਹਾਲ ਹੀ ਵਿੱਚ ਫਿਲਮ ਦੀ ਕਾਮਯਾਬੀ ਦੀ ਪਾਰਟੀ ਕੀਤੀ ਸੀ। ਜ਼ਿਕਰਯੋਗ ਹੈ ਕਿ ਕਰਨ ਜੌਹਰ ਨੇ ਆਪਣੀ ਪਿਛਲੀ ਫ਼ਿਲਮ ‘ਐ ਦਿਲ ਹੈ ਮੁਸ਼ਕਿਲ’ ਦੇ ਸੱਤ ਸਾਲਾਂ ਮਗਰੋਂ ਇਸ ਫ਼ਿਲਮ ਦਾ ਨਿਰਦੇਸ਼ਨ ਕੀਤਾ ਹੈ। -ਏਐੱਨਆਈ