ਮੁਹੰਮਦ ਕੁਲੀ ਖਾਨ ਦੇ ਮਕਬਰੇ ਦੀ ਪੁਰਾਣੀ ਦਿੱਖ ਬਹਾਲ

ਨਵੀਂ ਦਿੱਲੀ: ਮਹਿਰੌਲੀ ਪੁਰਾਤੱਤਵ ਪਾਰਕ ਵਿੱਚ ਮੁਹੰਮਦ ਕੁਲੀ ਖਾਨ ਦਾ ਮਕਬਰਾ ਅਤੇ ਜਮਾਲੀ-ਕਮਾਲੀ ਮਸਜਿਦ ਦੀ ਪੁਰਾਣੀ ਸ਼ਾਨ ਬਹਾਲ ਕੀਤੀ ਗਈ ਹੈ। ਦਿੱਲੀ ਦੇ ਉਪ ਰਾਜਪਾਲ ਵਿਨੈ ਕੁਮਾਰ ਸਕਸੈਨਾ ਨੇ ਦੱਸਿਆ ਕਿ ਡੀ.ਡੀ.ਏ ਅਤੇ ਏ.ਐਸ.ਆਈ. ਨੇ ਉਨ੍ਹਾਂ ਦੇ ਦੌਰੇ ਅਤੇ ਇਸ ਬਾਰੇ ਜਾਰੀ ਕੀਤੇ ਨਿਰਦੇਸ਼ਾਂ ਤੋਂ ਬਾਅਦ ਬਹਾਲੀ ਦਾ ਸ਼ਲਾਘਾਯੋਗ ਕੰਮ ਕੀਤਾ ਹੈ। ਜ਼ਿਕਰਯੋਗ ਹੈ ਕਿ ਪੁਰਾਤੱਤਵ ਪਿੰਡ ਕੰਪਲੈਕਸ ਵਿੱਚ ਜਮਾਲੀ ਤੇ ਕਮਾਲੀ ਦੀ ਮਸਜਿਦ ਹੈ। ਮਸਜਿਦ ਅਤੇ ਮਕਬਰੇ ਦਾ ਨਿਰਮਾਣ 1528-1529 ਵਿੱਚ ਕੀਤਾ ਗਿਆ ਸੀ ਤੇ ਜਮਾਲੀ ਨੂੰ 1535 ਵਿੱਚ ਉਸਦੀ ਮੌਤ ਤੋਂ ਬਾਅਦ ਕਬਰ ਵਿੱਚ ਦਫ਼ਨਾਇਆ ਗਿਆ ਸੀ। ਜਾਣਕਾਰੀ ਅਨੁਸਾਰ ਐਲਜੀ ਦੀਆਂ ਹਦਾਇਤਾਂ ਮਗਰੋਂ ਪੁਰਾਤਤੱਵ ਵਿਭਾਗ ਵੱਲੋਂ ਮਕਬਰੇ ਦੀ ਪੁਰਾਣੀ ਦਿੱਖ ਬਹਾਲ ਕੀਤੀ ਗਈ ਹੈ। -ਪੱਤਰ ਪ੍ਰੇਰਕ