ਮੀਨਾ ਕੁਮਾਰੀ ਨਾਲ ਕੰਮ ਨਾ ਕਰ ਸਕਣ ਦਾ ਮਲਾਲ: ਅਮਿਤਾਭ

ਮੁੰਬਈ: ਅਦਾਕਾਰ ਅਮਿਤਾਭ ਬੱਚਨ ਨੇ ‘ਕੌਨ ਬਨੇਗਾ ਕਰੋੜਪਤੀ’ ਦੇ ਐਪੀਸੋਡ ਵਿੱਚ ਆਪਣੇ ਫਿਲਮੀ ਕਰੀਅਰ ’ਤੇ ਚਾਨਣਾ ਪਾਇਆ ਅਤੇ ਅਦਾਕਾਰਾ ਮੀਨਾ ਕੁਮਾਰੀ ਨਾਲ ਕੰਮ ਨਾ ਕਰਨ ’ਤੇ ਅਫਸੋਸ ਵੀ ਜਤਾਇਆ। ਵਿੱਦਿਆ ਬਾਲਨ ਅਤੇ ਕਾਰਤਿਕ ਆਰੀਅਨ ਨਾਲ ਗੱਲਬਾਤ ਦੌਰਾਨ ਅਮਿਤਾਭ ਨੇ 1962 ਵਿੱਚ ਰਿਲੀਜ਼ ਹੋਈ ਫਿਲਮ ‘ਸਾਹਿਬ ਬੀਵੀ ਔਰ ਗੁਲਾਮ’ ਬਾਰੇ ਗੱਲਬਾਤ ਕਰਦਿਆਂ ਮੀਨਾ ਕੁਮਾਰੀ ਨਾਲ ਕੰਮ ਨਾ ਕਰਨ ’ਤੇ ਅਫਸੋਸ ਜ਼ਾਹਿਰ ਕੀਤਾ। ਉਸ ਨੇ ਕਿਹਾ, ‘ਮੈਨੂੰ ਮੀਨਾ ਕੁਮਾਰੀ ਨਾਲ ਕੰਮ ਕਰਨ ਦਾ ਕਦੇ ਮੌਕਾ ਨਹੀਂ ਮਿਲਿਆ। ਫਿਲਮ ‘ਸਾਹਿਬ ਬੀਵੀ ਔਰ ਗੁਲਾਮ’ ਵਿਚਲੇ ਗੀਤ ‘ਨਾ ਜਾਓ ਸਈਆਂ’ ਵਿੱਚ ਉਨ੍ਹਾਂ ਇੰਨੀ ਸ਼ਾਨਦਾਰ ਅਦਾਕਾਰੀ ਕੀਤੀ ਕਿ ਮੈਂ ਉਸ ਗੀਤ ਨੂੰ ਲਗਾਤਾਰ ਕਈ ਵਾਰ ਦੇਖਿਆ।’ ਇਸੇ ਤਰ੍ਹਾਂ ਉਨ੍ਹਾਂ ਦੱਸਿਆ ਕਿ ਵਹੀਦਾ ਰਹਿਮਾਨ ਉਸ ਦੀ ਪਸੰਦੀਦਾ ਅਦਾਕਾਰਾ ਹੈ। ਅਮਿਤਾਭ ਦੇ ਕਿੱਸਿਆਂ ਨੇ ਵਿੱਦਿਆ ਨੂੰ ਹੈਰਾਨ ਕਰ ਦਿੱਤਾ ਅਤੇ ਉਸ ਨੇ ਕਿਹਾ, ‘ਜੇ ਮੈਂ ਉਸ ਦੌਰ ਵਿੱਚ ਪੈਦਾ ਹੁੰਦੀ ਤਾਂ ਤੁਹਾਡੇ ਨਾਲ ਕੰਮ ਕਰਨਾ ਪਸੰਦ ਕਰਦੀ।’ -ਆਈਏਐੱਨਐੱਸ