ਰੇਲਵੇ ਦੀਆਂ ਨੀਤੀਆਂ ਅਮੀਰਾਂ ਨੂੰ ਧਿਆਨ ’ਚ ਰੱਖ ਕੇ ਬਣਾਈਆਂ ਜਾ ਰਹੀਆਂ ਨੇ: ਰਾਹੁਲ ਗਾਂਧੀ

ਨਵੀਂ ਦਿੱਲੀ, 3 ਮਾਰਚ
ਕਾਂਗਰਸੀ ਆਗੂ ਰਾਹੁਲ ਗਾਂਧੀ ਨੇ ਦੋਸ਼ ਲਗਾਇਆ ਕਿ ਸਰਕਾਰ ਭਾਰਤੀ ਰੇਲਵੇ ਲਈ ਨੀਤੀਆਂ ਸਿਰਫ਼ ਅਮੀਰਾਂ ਨੂੰ ਧਿਆਨ ’ਚ ਰੱਖ ਕੇ ਬਣਾ ਰਹੀ ਹੈ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ’ਤੇ ਵਿਸ਼ਵਾਸ ‘ਧੋਖੇ ਦੀ ਗਾਰੰਟੀ’ ਹੈ। ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਨੇ ਐਤਵਾਰ ਨੂੰ ਰੇਲਵੇ ਦੀਆਂ ਨੀਤੀਆਂ 'ਤੇ ਕੇਂਦਰ ਸਰਕਾਰ ਦੀ ਆਲੋਚਨਾ ਕਰਦੇ ਹੋਏ ਕਿਹਾ ਕਿ ਲੋਕਾਂ ਨੂੰ 'ਇਲੀਟ ਟ੍ਰੇਨ' ਦੀ ਤਸਵੀਰ ਦਿਖਾ ਕੇ ਭਰਮਾਇਆ ਜਾ ਰਿਹਾ ਹੈ, ਜਿਸ 'ਤੇ ਗਰੀਬ ਪੈਰ ਵੀ ਨਹੀਂ ਰੱਖ ਸਕਦਾ। ਐਕਸ 'ਤੇ ਇਕ ਪੋਸਟ _ਚ ਰਾਹੁਲ ਗਾਂਧੀ ਨੇ ਕਿਹਾ ਕਿ ਗਰੀਬ ਅਤੇ ਮੱਧ ਵਰਗ ਦੇ ਯਾਤਰੀ ਰੇਲਵੇ ਨੂੰ ਤਰਜੀਹ ਤੋਂ ਕੰਨੀ ਕਤਰਾਉਣ ਲੱਗੇ ਹਨ। ਨਰਿੰਦਰ ਮੋਦੀ ਉਨ੍ਹਾਂ ਤੋਂ 'ਗਰੀਬਾਂ ਦੀ ਰੇਲਵੇ' ਖੋਹ ਰਹੇ ਹਨ। ਹਰ ਸਾਲ ਕਿਰਾਏ ’ਚ 10 ਫੀਸਦੀ ਵਾਧੇ ਦੇ ਨਾਂ ’ਤੇ ਲੋਕਾਂ ਦੀ ਲੁੱਟ, ਵੱਧ ਰਹੇ ਹੋਰ ਚਾਰਜ ਅਤੇ ਮਹਿੰਗੀਆਂ ਪਲੇਟਫਾਰਮ ਟਿਕਟਾਂ ਕਾਰਨ ਗਰੀਬ ਰੇਲ ’ਚ ਪੈਰ ਵੀ ਨਹੀਂ ਰੱਖ ਸਕਦਾ। ਉਨ੍ਹਾਂ ਇਹ ਵੀ ਦੋਸ਼ ਲਾਇਆ ਕਿ ਸਰਕਾਰ ਨੇ ਪਿਛਲੇ ਤਿੰਨ ਸਾਲਾਂ ਵਿੱਚ ਬਜ਼ੁਰਗਾਂ ਨੂੰ ਦਿੱਤੀਆਂ ਛੋਟਾਂ ਖੋਹ ਕੇ ਉਨ੍ਹਾਂ ਤੋਂ 3700 ਕਰੋੜ ਰੁਪਏ ਇਕੱਠੇ ਕੀਤੇ ਹਨ।