ਰਾਣੀਆਂ: ਪੋਤੇ ਨੇ ਦਾਦੇ ਨੂੰ ਹਰਾਇਆ, ਇਨੈਲੋ ਦੇ ਅਰਜੁਨ ਚੌਟਾਲਾ ਜਿੱਤੇ

ਏਲਨਾਬਾਦ: ਰਾਣੀਆ ਵਿਧਾਨ ਸਭਾ ਹਲਕੇ ਤੋਂ ਇਨੈਲੋ ਦੇ ਅਰਜੁਨ ਚੌਟਾਲਾ ਨੇ ਜਿੱਤ ਹਾਸਲ ਕਰਦਿਆਂ ਆਪਣੇ ਵਿਰੋਧੀ ਕਾਂਗਰਸ ਦੇ ਸਰਵ ਮਿੱਤਰ ਕੰਬੋਜ ਨੂੰ 4,228 ਵੋਟਾਂ ਦੇ ਫਰਕ ਨਾਲ ਹਰਾਇਆ। ਇਸ ਸੀਟ ’ਤੇ ਦਸਵੇਂ ਗੇੜ ਦੀ ਗਿਣਤੀ ਤੱਕ ਦਾਦੇ-ਪੋਤੇ (ਰਣਜੀਤ ਚੌਟਾਲਾ ਅਤੇ ਅਰਜੁਨ ਚੌਟਾਲਾ) ਵਿਚਕਾਰ ਮੁਕਾਬਲਾ ਬਣਿਆ ਰਿਹਾ ਪਰ ਅੰਤਿਮ ਚਾਰ ਗੇੜ ਦੀ ਗਿਣਤੀ ਦੌਰਾਨ ਆਜ਼ਾਦ ਉਮੀਦਵਾਰ ਰਣਜੀਤ ਸਿੰਘ ਚੌਟਾਲਾ ਪਛੜ ਗਏ ਅਤੇ ਕਾਂਗਰਸ ਉਮੀਦਵਾਰ ਸਰਵ ਮਿੱਤਰ ਕੰਬੋਜ ਦੂਜੇ ਸਥਾਨ ’ਤੇ ਆਏ। ਇਸ ਮੁਕਾਬਲੇ ਦੌਰਾਨ ਇਨੈਲੋ ਦੇ ਅਰਜੁਨ ਚੌਟਾਲਾ ਨੂੰ 43,719 , ਕਾਂਗਰਸ ਉਮੀਦਵਾਰ ਸਰਵ ਮਿੱਤਰ ਕੰਬੋਜ ਨੂੰ 39,491, ਆਜ਼ਾਦ ਉਮੀਦਵਾਰ ਰਣਜੀਤ ਸਿੰਘ ਚੌਟਾਲਾ ਨੂੰ 36,313, ਭਾਜਪਾ ਉਮੀਦਵਾਰ ਸ਼ੀਸਪਾਲ ਕੰਬੋਜ ਨੂੰ 15,622, ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਹੈਪੀ ਰਾਣੀਆਂ ਨੂੰ 4,680 ਵੋਟਾਂ ਮਿਲੀਆਂ, ਜਦੋਂਕਿ 655 ਲੋਕਾਂ ਨੇ ਨੋਟਾ ਦੀ ਵਰਤੋਂ ਕੀਤੀ। -ਪੱਤਰ ਪ੍ਰੇਰਕ