ਗੁਰਸ਼ਰਨ ਭਾਅ ਜੀ ਦੇ ਪੁਸ਼ਤੀ ਰੈਣ ਬਸੇਰੇ ਦੀ ਸਫ਼ਾਈ

ਖੇਤਰੀ ਪ੍ਰਤੀਨਿਧ
ਅੰਮ੍ਰਿਤਸਰ, 17 ਅਪਰੈਲ
ਨਾਟਕਕਾਰ ਗੁਰਸ਼ਰਨ ਭਾਅ ਜੀ (ਭਾਈ ਮੰਨਾ ਸਿੰਘ) ਦੀਆਂ ਧੀਆਂ ਡਾ. ਨਵਸ਼ਰਨ, ਡਾ. ਅਰੀਤ, ਜਵਾਈ ਡਾ. ਅਤੁਲ, ਡਾ. ਅਜੈ, ਡਾ. ਅਰੀਤ ਦੀ ਧੀ ਬੁੱਗੂ ਤੇ ਉਸ ਦੇ ਜੀਵਨ ਸਾਥੀ ਅਤੇ ਨੰਨ੍ਹੀ ਧੀ, ਵਿਦਵਾਨ ਡਾ. ਪਰਮਿੰਦਰ ਸਿੰਘ ਅਤੇ ਪਲਸ ਮੰਚ ਦੇ ਪ੍ਰਧਾਨ ਅਮੋਲਕ ਸਿੰਘ ਨੇ ਲੋਕ ਹਿੱਤਾਂ ਨੂੰ ਪ੍ਰਣਾਏ ਪਰਿਵਾਰ ਦੇ ਜੱਦੀ ਪੁਸ਼ਤੀ ਵਿਰਾਸਤੀ ਰੈਣ ਬਸੇਰੇ ਦੀ ਸਫ਼ਾਈ ਕੀਤੀ।
ਡਾ. ਨਵਸ਼ਰਨ ਤੇ ਡਾ. ਅਰੀਤ ਨੇ ਆਖਿਆ ਕਿ ਇਸ ਘਰ ਵਿੱਚ ਗੁਰਸ਼ਰਨ ਭਾਅ ਜੀ ਦੇ ਪਿਤਾ ਡਾ. ਗਿਆਨ ਸਿੰਘ ਡਾਕਟਰੀ ਪ੍ਰੈਕਟਿਸ ਕਰਦੇ ਰਹੇ। ਗੁਰਸ਼ਰਨ ਭਾਅ ਜੀ ਨੇ ਢੇਰਾਂ ਨਾਟਕ ਲਿਖੇ ਅਤੇ ਵਰਕਸ਼ਾਪ ਲਗਾ ਕੇ ‘ਧਮਕ ਨਗਾਰੇ’ ਦੀ ਨਾਟਕ ਦੀਆਂ ਰਿਹਰਸਲਾਂ ਹੋਈਆਂ। ਇਸ ਘਰ ਵਿੱਚ ‘ਪਲਸ ਮੰਚ’ ਦੀ ਪਹਿਲੀ ਆਡੀਓ ਕੈਸੇਟ ‘ਲੋਕ ਪੱਖੀ ਗੀਤ’ ਦੀ ਰਿਕਾਰਡਿੰਗ ਹੋਈ। ਇਸ ਵਿਚਲੇ ਕੌਮਾਂਤਰੀ ਗੀਤ ‘ਲਹਿਰਾਂ ਬਣ ਉੱਠੋ’ ਅਤੇ ਮੇਰੇ ਗੀਤ ‘ਦਿੱਲੀ ਦੀ ਹਕੂਮਤੇ’ ਵਰਗੇ ਗੀਤਾਂ ਦੀ ਗੂੰਜ਼ ਪਈ ਸੀ। ਇਹ ਘਰ ’ਚ ਮੁਲਕ ਦੇ ਨਾਮਵਰ ਰੰਗ ਕਰਮੀ, ਗਾਇਕ, ਫਿਲਮੀ ਕਲਾਕਾਰ, ਬਲਰਾਜ ਸਾਹਨੀ ਯਾਦਗਾਰੀ ਪ੍ਰਕਾਸ਼ਨ ਰਿਹਾ, ਜੋ ‘ਸਮਤਾ ਪੱਤ੍ਰਿਕਾ’ ਦਾ ਦਫ਼ਤਰ ਸੀ। ਇੱਥੇ ਵਿਦਵਾਨ ਡਾ. ਰਣਧੀਰ ਸਿੰਘ ਵਰਗੇ ਸਮਾਜਿਕ, ਆਰਥਿਕ ਅਤੇ ਰਾਜਨੀਤਕ ਸਰੋਕਾਰਾਂ ਸਬੰਧੀ ਚਿੰਤਨ ਕਰਦੇ ਰਹੇ ਹਨ।