ਪੀਯੂ ਬਚਾਓ ਮੋਰਚਾ: ਪੁਲੀਸ ਨੇ ਪਾੜਿ੍ਹਆਂ ’ਤੇ ਡਾਂਗਾਂ ਵਰ੍ਹਾਈਆਂ

ਕੁਲਦੀਪ ਸਿੰਘ
ਚੰਡੀਗੜ੍ਹ, 13 ਨਵੰਬਰ
ਪੰਜਾਬ ਯੂਨੀਵਰਸਿਟੀ ਬਚਾਓ ਮੋਰਚੇ ਵੱਲੋਂ ਕੈਂਪਸ ਵਿੱਚ ਅੱਜ ਪੈਦਲ ਪ੍ਰਦਰਸ਼ਨ ਕਰ ਰਹੇ ਵਿਦਿਆਰਥੀਆਂ ’ਤੇ ਚੰਡੀਗੜ੍ਹ ਪੁਲੀਸ ਵੱਲੋਂ ਡਾਂਗਾਂ ਵਰ੍ਹਾਈਆਂ ਗਈਆਂ। ਮਹਿਲਾ ਪੁਲੀਸ ਦੀ ਅਣਹੋਂਦ ਕਰ ਕੇ ਪੁਰਸ਼ ਕਰਮਚਾਰੀਆਂ ਅਤੇ ਅਧਿਕਾਰੀਆਂ ਨੇ ਵਿਦਿਆਰਥਣਾਂ ਨਾਲ ਵੀ ਧੱਕਾਮੁੱਕੀ ਕੀਤੀ। ਰੋਹ ਵਿੱਚ ਆਏ ਪ੍ਰਦਰਸ਼ਨਕਾਰੀ ਵਿਦਿਆਰਥੀਆਂ ਨੇ ਵਾਈਸ ਚਾਂਸਲਰ, ਕੇਂਦਰ ਸਰਕਾਰ ਅਤੇ ਚੰਡੀਗੜ੍ਹ ਪੁਲੀਸ ਖ਼ਿਲਾਫ਼ ਨਾਅਰੇ ਲਗਾਉਂਦਿਆਂ ਸੰਘਰਸ਼ ਤੇਜ਼ ਕਰਨ ਦਾ ਐਲਾਨ ਕੀਤਾ।
ਪਿਛਲੇ ਕਰੀਬ 25 ਦਿਨਾਂ ਤੋਂ ਅਣਮਿਥੇ ਸਮੇਂ ਲਈ ਧਰਨੇ ’ਤੇ ਬੈਠੇ ਪੰਜਾਬ ਯੂਨੀਵਰਸਿਟੀ ਬਚਾਓ ਮੋਰਚੇ ਵੱਲੋਂ ਅੱਜ 13 ਨਵੰਬਰ ਨੂੰ ਉਪ ਕੁਲਪਤੀ ਦੀ ਰਿਹਾਇਸ਼ ਦੇ ਘਿਰਾਓ ਦਾ ਪ੍ਰੋਗਰਾਮ ਦਿੱਤਾ ਗਿਆ ਸੀ। ਉਸ ਰਸਤੇ ’ਚ ਚੰਡੀਗੜ੍ਹ ਪੁਲੀਸ ਨੇ ਬੈਰੀਕੇਡ ਲਗਾ ਦਿੱਤੇ ਤਾਂ ਵਿਦਿਆਰਥੀਆਂ ਨੇ ਮਾਰਚ ਦਾ ਰੁਖ਼ ਅਚਾਨਕ ਬਦਲ ਕੇ ਲਾਅ ਆਡੀਟੋਰੀਅਮ ਵਿੱਚ ਚੱਲ ਰਹੇ ‘ਪੰਜਾਬ ਵਿਜ਼ਨ-2047’ ਪ੍ਰੋਗਰਾਮ ਵੱਲ ਕਰ ਲਿਆ। ਪ੍ਰੋਗਰਾਮ ਵਿੱਚ ਬਦਲਾਅ ਦੀ ਅਗਾਊਂ ਜਾਣਕਾਰੀ ਨਾ ਹੋਣ ਕਰ ਕੇ ਚੰਡੀਗੜ੍ਹ ਪੁਲੀਸ ਅਤੇ ’ਵਰਸਿਟੀ ਦੀ ਸਕਿਉਰਿਟੀ ਨੂੰ ਭਾਜੜ ਪੈ ਗਈ।
ਸਟੂਡੈਂਟਸ ਸੈਂਟਰ ਦੀ ਪਾਰਕਿੰਗ ’ਚ ਪਹੁੰਚਣ ਤੱਕ ਦੂਜੇ ਪਾਸਿਓਂ ਡੀਐੱਸਪੀ ਗੁਰਮੁਖ ਸਿੰਘ ਦੀ ਅਗਵਾਈ ਹੇਠ ਪਹੁੰਚੀ ਪੁਲੀਸ ਫੋਰਸ ਨੇ ਵਿਦਿਆਰਥੀਆਂ ਨੂੰ ਰਸਤੇ ਵਿੱਚ ਰੋਕ ਲਿਆ ਅਤੇ ਪੁਲੀਸ ਨੇ ਵਿਦਿਆਰਥੀਆਂ ’ਤੇ ਖੂਬ ਡੰਡਾ ਵਰ੍ਹਾਇਆ। ਵਿਦਿਆਰਥੀ ਆਗੂ ਰਿਮਲਜੋਤ ਸਿੰਘ ਨੇ ਸਟੂਡੈਂਟਸ ਸੈਂਟਰ ’ਤੇ ਸੰਬੋਧਨ ਕਰਦਿਆਂ ਦੱਸਿਆ ਕਿ ਪੁਲੀਸ ਅਧਿਕਾਰੀ ਵੱਲੋਂ ਵਿਦਿਆਰਥੀਆਂ ’ਤੇ ਗੋਲ਼ੀ ਚਲਾਉਣ ਦੀ ਕਥਿਤ ਧਮਕੀ ਤੱਕ ਦੇ ਦਿੱਤੀ ਗਈ। ਉਨ੍ਹਾਂ ਵਿਦਿਆਰਥੀ ਸਾਹਿਬਜੀਤ ਸਿੰਘ ਦੀ ਪਿੱਠ ’ਤੇ ਡਾਂਗ ਦਾ ਨਿਸ਼ਾਨ ਦਿਖਾਇਆ। ਇਸ ਦੌਰਾਨ ਵਿਦਿਆਰਥਣਾਂ ਮਨਮੀਤ ਕੌਰ ਅਤੇ ਸਾਰ੍ਹਾ ਦੇ ਵੀ ਡਾਂਗਾਂ ਵੱਜੀਆਂ।

ਧਰਨੇ ਵਿੱਚ ਪੁੱਜੇ ਡੀਐੱਸਡਬਲਿਯੂ ਨੂੰ ਨਕਾਰਿਆ

ਲਾਠੀਚਾਰਜ ਹੋਣ ਉਪਰੰਤ ਪੁਲੀਸ ਦੀ ਮਦਦ ਨਾਲ ਧਰਨੇ ਵਿੱਚ ਪਹੁੰਚੇ ਡੀਐੱਸਡਬਲਿਯੂ ਅਮਿਤ ਚੌਹਾਨ ਨੇ ਮੋਰਚੇ ਦੀ ਪੰਜ ਮੈਂਬਰੀ ਕਮੇਟੀ ਦੀ ਮੀਟਿੰਗ ਉਪ ਕੁਲਪਤੀ ਨਾਲ ਕਰਵਾਉਣ ਦੀ ਗੱਲ ਆਖੀ ਤਾਂ ਵਿਦਿਆਰਥੀਆਂ ਨੇ ਇਸ ਨੂੰ ਨਾਕਾਰਦਿਆਂ ਉਨ੍ਹਾਂ ਨੂੰ ਧਰਨੇ ਵਾਲੀ ਥਾਂ ’ਤੇ ਬੁਲਾਉਣ ਦੀ ਮੰਗ ਰੱਖੀ।

ਵਾਈਸ ਚਾਂਸਲਰ ਦੇ ਬਿਆਨ ਦਾ ਵਿਰੋਧ

ਇੱਥੇ ਧਰਨੇ ਵਿੱਚ ਸ਼ਾਮਲ ਪ੍ਰੋ. ਮਨਜੀਤ ਸਿੰਘ, ਵਿਦਿਆਰਥੀ ਆਗੂਆਂ ਰਿਮਲਜੋਤ ਸਿੰਘ, ਅਸ਼ਮੀਤ ਸਿੰਘ, ਸੰਦੀਪ, ਗਗਨਦੀਪ ਸਿੰਘ, ਸਾਰ੍ਹਾ, ਜ਼ੋਬਨ, ਹਰਪੁਨੀਤ ਕੌਰ, ਸਾਬਕਾ ਵਿਦਿਆਰਥੀ ਆਗੂ ਅਮਨਦੀਪ ਕੌਰ, ਪ੍ਰੋ. ਸੁਧੀਰ ਮਹਿਰਾ, ਸੈਨੇਟਰ ਆਈਪੀਐੱਸ ਸਿੱਧੂ, ਸੰਦੀਪ ਸੀਕਰੀ, ਸੁਰਿੰਦਰ ਸਿੰਘ ਸੰਧੂ, ਰਵਿੰਦਰ ਸਿੰਘ ਧਾਲੀਵਾਲ ਬਿੱਲਾ ਆਦਿ ਨੇ ਵਾਈਸ ਚਾਂਸਲਰ ਦੇ ਉਸ ਬਿਆਨ ਦੀ ਨਿਖੇਧੀ ਕੀਤੀ ਜਿਸ ਵਿੱਚ ਉਨ੍ਹਾਂ ਕਿਹਾ ਕਿ ਵਿਦਿਆਰਥੀਆਂ ਦਾ ਸੈਨੇਟ ਚੋਣਾਂ ਨਾਲ ਕੋਈ ਸਰੋਕਾਰ ਨਹੀਂ। ਵਿਦਿਆਰਥੀਆਂ ਅਤੇ ਸੈਨੇਟਰਾਂ ਨੇ ਕਿਹਾ ਕਿ ਵਿਦਿਆਰਥੀਆਂ ਕਰ ਕੇ ਹੀ ਯੂਨੀਵਰਸਿਟੀ ਹੈ।