ਕੇਂਦਰ ਵਿੱਚ ਆਉਣ ’ਤੇ ਮਹਿਲਾ ਰਾਖਵਾਂਕਰਨ ਬਿੱਲ ਵਿੱਚ ਸੋਧ ਦਾ ਵਾਅਦਾ

ਜੈਪੁਰ, 23 ਸਤੰਬਰ
ਜੈਪੁਰ ਵਿੱਚ ਕਾਂਗਰਸ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਾਂਗਰਸ ਪ੍ਰਧਾਨ ਮਲਿਕਾਰਜੁਨ ਖੜਗੇ ਨੇ ਵਾਅਦਾ ਕੀਤਾ ਕਿ ਜੇਕਰ ਕਾਂਗਰਸ ਅਗਲੇ ਸਾਲ ਕੇਂਦਰ ਵਿੱਚ ਆਈ ਤਾਂ ਮਹਿਲਾ ਰਾਖਵਾਂਕਰਨ ਬਿੱਲ ਵਿੱਚ ਸੋਧ ਕੀਤੀ ਜਾਵੇਗੀ। ਉਨ੍ਹਾਂ ਦੋਸ਼ ਲਾਇਆ ਕਿ ਇਸ ਬਿੱਲ ਨੂੰ ਫੌਰੀ ਲਾਗੂ ਕਰਨ ਵਿੱਚ ਕੋਈ ਵੱਡਾ ਕਾਨੂੰਨੀ ਪੇਚ ਨਹੀਂ ਹੈ, ਪਰ ਭਾਜਪਾ ਇਸ ਨੂੰ ਦਸ ਸਾਲਾਂ ਲਈ ਲਟਕਾ ਕੇ ਰੱਖਣਾ ਚਾਹੁੰਦੀ ਹੈ। ਕਾਂਗਰਸ ਨੇ ਮੰਗ ਕੀਤੀ ਕਿ ਇਸ ਬਿੱਲ ਵਿੱਚ ਓਬੀਸੀ ਸ਼੍ਰੇਣੀ ਦੀਆਂ ਔਰਤਾਂ ਨੂੰ ਵੀ ਸ਼ਾਮਲ ਕੀਤਾ ਜਾਵੇ। ਕਾਂਗਰਸ ਆਗੂ ਨੇ ਮਹਿਲਾ ਰਾਖਵਾਂਕਰਨ ਬਿੱਲ ਲਿਆਉਣ ਪਿੱਛੇ ਨਰਿੰਦਰ ਮੋਦੀ ਸਰਕਾਰ ਦੀ ਨੀਅਤ ’ਤੇ ਸਵਾਲ ਚੁੱਕਦਿਆਂ ਕਿਹਾ ਕਿ ਭਾਜਪਾ ਔਰਤਾਂ ਲਈ ਰਾਖਵਾਂਕਰਨ ਲਾਗੂ ਨਹੀਂ ਕਰਨਾ ਚਾਹੁੰਦੀ। ਖੜਗੇ ਨੇ ਕਿਹਾ ਕਿ ਸਰੋਜਿਨੀ ਨਾਇਡੂ ਕਾਂਗਰਸ ਦੀ ਪਹਿਲੀ ਮਹਿਲਾ ਪ੍ਰਧਾਨ ਸੀ ਅਤੇ ਭਾਜਪਾ ਦੱਸੇ, ‘‘ਬੀਤੇ 100 ਸਾਲਾਂ ਵਿੱਚੋਂ ਕੋਈ ਔਰਤ ਭਾਜਪਾ ਜਾਂ ਆਰਐੱਸਐੱਸ ਦੀ ਪ੍ਰਧਾਨ ਬਣੀ ਹੈ?’’ -ਪੀਟੀਆਈ