ਪ੍ਰਿਯੰਕਾ ਨੇ ਪਿਤਾ ਦੀ ਬਰਸੀ ਨਮਿਤ ਪੂਜਾ ਕਰਵਾਈ

ਮੁੰਬਈ: ਅਦਾਕਾਰਾ ਪ੍ਰਿਯੰਕਾ ਚੋਪੜਾ ਨੇ ਆਪਣੇ ਪਿਤਾ ਦੀ ਬਰਸੀ ਨਮਿਤ ਵਿਸ਼ੇਸ਼ ਪੂਜਾ ਕਰਵਾਈ। ਵੈੱਬ ਸੀਰੀਜ਼ ‘ਸਿਟਾਡੇਲ’ ਦੀ ਅਦਾਕਾਰਾ ਨੇ ਇੰਸਟਾਗ੍ਰਾਮ ‘ਤੇ ਪੂਜਾ ਦੇ ਪੰਡਾਲ ਤੋਂ ਆਪਣੀ ਧੀ ਮਾਲਤੀ ਮੈਰੀ ਨਾਲ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਪਹਿਲੀ ਤਸਵੀਰ ਵਿੱਚ ਮਾਲਤੀ ਕਿਸੇ ਦਾ ਹੱਥ ਫੜ ਕੇ ਤੁਰਦੀ ਦਿਖਾਈ ਦੇ ਰਹੀ ਹੈ। ਪ੍ਰਿਯੰਕਾ ਨੇ ਇਸ ਦੀ ਕੈਪਸ਼ਨ ਵਿੱਚ ਲਿਖਿਆ, ”ਕਿਸੇ ਨੇ ਬਹੁਤ ਸਹੁਣਾ ਲਹਿੰਗਾ ਪਾਇਆ ਹੋਇਆ ਹੈ।” ਤਸਵੀਰ ਵਿੱਚ ਉਸ ਨੇ ਹਲਕੇ ਗੁਲਾਬੀ ਰੰਗ ਦੇ ਲਹਿੰਗੇ ਨਾਲ ਦੁਪੱਟਾ ਲਿਆ ਹੋਇਆ ਹੈ।ਦੂਜੀ ਤਸਵੀਰ ਵਿੱਚ ਮਾਲਤੀ ਜ਼ਮੀਨ ਤੋਂ ਫੁੱਲ ਚੁੱਕਦੀ ਨਜ਼ਰ ਆ ਰਹੀ ਹੈ। ਇਸ ਦੀ ਕੈਪਸ਼ਨ ਵਿੱਚ ਪ੍ਰਿਯੰਕਾ ਨੇ ਲਿਖਿਆ, ”ਪੂਜਾ ਦਾ ਸਮਾਂ। ਤੁਹਾਡੀ ਯਾਦ ਆ ਰਹੀ ਹੈ ਨਾਨਾ।” ਇਸੇ ਤਰ੍ਹਾਂ ਇੱਕ ਹੋਰ ਤਸਵੀਰ ਵਿੱਚ ਕਿਸੇ ਨੇ ਮਾਲਤੀ ਨੂੰ ਉਸ ਦੇ ਨਾਨੇ ਦੀ ਤਸਵੀਰ ਅੱਗੇ ਚੁੱਕਿਆ ਹੋਇਆ ਹੈ, ਜਿਸ ਹੇਠਾਂ ‘ਬਾਜੀਰਾਓ ਮਸਤਾਨੀ’ ਦੀ ਅਦਾਕਾਰਾ ਨੇ ਲਿਖਿਆ, ”ਤੁਹਾਡੀ ਯਾਦ ਆ ਰਹੀ ਹੈ ਪਿਤਾ ਜੀ।” ਪ੍ਰਿਯੰਕਾ ਦੇ ਕੰਮ ਦੀ ਗੱਲ ਕਰੀਏ ਤਾਂ ਹਾਲ ਹੀ ਵਿੱਚ ਉਸ ਦੀ ਵੈੱਬ ਸੀਰੀਜ਼ ‘ਸਿਟਾਡੇਲ’ ਰਿਲੀਜ਼ ਹੋਈ ਹੈ, ਜਿਸ ਦਾ ਨਿਰਮਾਣ ਰੂਸੋ ਬ੍ਰਦਰਜ਼ ਨੇ ਕੀਤਾ ਹੈ। ਇਸ ਤੋਂ ਇਲਾਵਾ ਉਹ ਆਉਣ ਵਾਲੀ ਫਿਲਮ ‘ਜੀ ਲੇ ਜ਼ਰਾ’ ਵਿੱਚ ਆਲੀਆ ਭੱਟ ਅਤੇ ਕੈਟਰੀਨਾ ਕੈਫ ਨਾਲ ਸਕਰੀਨ ਸਾਂਝੀ ਕਰਦੀ ਨਜ਼ਰ ਆਵੇਗੀ। ਫਿਲਮ ਦਾ ਨਿਰਦੇਸ਼ਨ ਫਰਹਾਨ ਅਖਤਰ ਕਰੇਗਾ। ਇਸ ਦੀ ਸ਼ੂਟਿੰਗ ਹਾਲੇ ਸ਼ੁਰੂ ਨਹੀਂ ਹੋਈ। -ਏਐੱਨਆਈ