ਚੰਡੀਗੜ੍ਹ ’ਚ ਰਾਤ ਨੂੰ ਹੈਲੀਕਾਪਟਰ ਉਤਾਰਨ ਦੀਆਂ ਤਿਆਰੀਆਂ

ਆਤਿਸ਼ ਗੁਪਤਾ

ਚੰਡੀਗੜ੍ਹ, 6 ਜੂਨ

ਕੇਂਦਰੀ ਸ਼ਾਸਿਤ ਪ੍ਰਦੇਸ਼ ਚੰਡੀਗੜ੍ਹ ਦਾ ਪ੍ਰਸ਼ਾਸਨ ਪੰਜਾਬ ਤੇ ਹਰਿਆਣਾ ਦੀ ਸਾਂਝੀ ਰਾਜਧਾਨੀ ਵਿੱਚ ਰਾਤ ਸਮੇਂ ਹੈਲੀਕਾਪਟਰ ਉਤਾਰਨ ਦੀ ਯੋਜਨਾ ‘ਤੇ ਕੰਮ ਕਰ ਰਿਹਾ ਹੈ। ਇਸ ਸਬੰਧੀ ਯੂਟੀ ਪ੍ਰਸ਼ਾਸਨ ਵਿਸ਼ੇਸ਼ ਹੈਲੀਪੇਡ ਬਣਾਉਣ ਲਈ ਤਿਆਰੀ ਕਰ ਰਿਹਾ ਹੈ। ਅੱਜ ਯੂਟੀ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਦੀ ਮੀਟਿੰਗ ਗ੍ਰਹਿ ਸਕੱਤਰ ਨਿਤਿਨ ਯਾਦਵ ਦੀ ਅਗਵਾਈ ਹੇਠ ਹੋਈ। ਮੀਟਿੰਗ ਵਿੱਚ ਚੰਡੀਗੜ੍ਹ ਦੇ ਰਾਜਿੰਦਰਾ ਪਾਰਕ ਵਿੱਚ ਦਿਨ-ਰਾਤ ਹੈਲੀਕਾਪਟਰ ਉਤਾਰਨ ਲਈ ਹੈਲੀਪੇਡ ਬਣਾਉਣ ਬਾਰੇ ਵਿਚਾਰ-ਚਰਚਾ ਕੀਤੀ ਗਈ। ਇਸ ਦੌਰਾਨ ਰਾਜਿੰਦਰਾ ਪਾਰਕ ‘ਚ ਬਣਾਏ ਜਾਣ ਵਾਲੇ ਹੈਲੀਪੇਡ ਦੇ ਆਲੇ-ਦੁਆਲੇ ਸੁਰੱਖਿਆ ਪ੍ਰਬੰਧਾਂ ਨੂੰ ਪੁਖਤਾ ਕਰਨ ਬਾਰੇ ਵੀ ਵਿਚਾਰ-ਚਰਚਾ ਕੀਤੀ ਗਈ ਹੈ।

ਯੂਟੀ ਦੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੇ ਅੱਜ ਦੀ ਮੀਟਿੰਗ ਵਿੱਚ ਰਾਜਿੰਦਰਾ ਪਾਰਕ ਦੇ ਆਲੇ-ਦੁਆਲੇ ਸੁਰੱਖਿਆ ਪ੍ਰਬੰਧਾਂ ਨੂੰ ਸਖਤ ਕਰਨ ਬਾਰੇ ਵੀ ਵਿਚਾਰ ਚਰਚਾ ਕੀਤੀ ਗਈ। ਪੁਲੀਸ ਵੱਲੋਂ ਮੁੱਢਲੀ ਤਿਆਰੀਆਂ ਦੌਰਾਨ ਪਾਰਕ ਦੇ ਚਾਰੋਂ ਪਾਸੇ ਆਰਜ਼ੀ ਤੌਰ ‘ਤੇ ਕੰਡਿਆ ਵਾਲੀ ਤਾਰ ਲਗਾਉਣ ਤੇ ਇਕ ਗੇਟ ਬਣਾਉਣ ਬਾਰੇ ਫੈਸਲਾ ਕੀਤਾ। ਇਨ੍ਹਾਂ ਹੀ ਨਹੀਂ ਰਾਜਿੰਦਰਾ ਪਾਰਕ ‘ਚ ਰਾਤ ਸਮੇਂ ਹੈਲੀਕਾਪਟਰ ਉਤਾਰਨ ਲਈ ਲਾਈਟਿੰਗ ਦਾ ਪ੍ਰਬੰਧ ਕਰਨ ਦਾ ਵੀ ਫ਼ੈਸਲਾ ਕੀਤਾ ਗਿਆ ਹੈ। ਗੌਰਤਲਬ ਹੈ ਕਿ ਯੂਟੀ ‘ਚ ਦੋ ਸੂਬਿਆਂ ਦੇ ਮੁੱਖ ਮੰਤਰੀ ਰਹਿੰਦੇ ਹਨ ਤੇ ਉੱਤਰੀ ਭਾਰਤ ਦਾ ਪ੍ਰਸਿੱਧ ਪੀਜੀਆਈ ਹਸਪਤਾਲ ਹੋਣ ਕਰਕੇ ਕਈ ਵਾਰ ਰਾਤ ਸਮੇਂ ਹੈਲੀਕਾਪਟਰ ਉਤਾਰਨ ਦੀ ਜ਼ਰੂਰਤ ਪਈ ਹੈ। ਇਸ ਲਈ ਯੂਟੀ ਪ੍ਰਸ਼ਾਸਨ ਰਾਜਿੰਦਰਾ ਪਾਰਕ ਨੂੰ ਦਿਨ ਤੇ ਰਾਤ ਸਮੇਂ ਹੈਲੀਕਾਪਟਰ ਉਤਾਰਨ ਲਈ ਪੱਕੇ ਤੌਰ ‘ਤੇ ਵਰਤੋਂ ‘ਚ ਲਿਆਉਣ ਲਈ ਤਿਆਰੀ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ ਵੀ ਯੂਟੀ ਪ੍ਰਸ਼ਾਸਨ ਨੇ ਸ਼ਹਿਰੀ ਵਿਕਾਸ ਵਿਭਾਗ ਨੂੰ ਇੱਕ ਵੱਖਰਾ ਹੈਲੀਪੇਡ ਬਣਾਉਣ ਲਈ ਸਾਰੰਗਪੁਰ ਜਾਂ ਹੋਰਨਾਂ ਥਾਵਾਂ ‘ਤੇ ਥਾਂ ਉਪਲੱਬਧ ਕਰਵਾਉਣ ਦੇ ਆਦੇਸ਼ ਦਿੱਤੇ ਹਨ।