ਪ੍ਰਨੀਤ ਕੌਰ ਨੇ ਲੋਕਾਂ ਦੀਆਂ ਮੁਸ਼ਕਲਾਂ ਸੁਣੀਆਂ

ਦੇਵੀਗੜ੍ਹ: ਇੱਥੋਂ ਨੇੜੇ ਰਜਵਾਹਿਆਂ ਦਾ ਵਾਧੂ ਪਾਣੀ ਘੱਗਰ ਵਿੱਚ ਪਾਉਣ ਲਈ ਬਣੀ ਖਾਂਟ ਦੇ ਨਾਲ ਵਸੇ ਲੋਕਾਂ ਦੀਆਂ ਲੋਕ ਸਭਾ ਮੈਂਬਰ ਪ੍ਰਨੀਤ ਕੌਰ ਨੇ ਸਮੱਸਿਆਵਾਂ ਸੁਣੀਆਂ। ਲੋਕਾਂ ਨੇ ਮੰਗ ਕੀਤੀ ਕਿ ਜਦੋਂ ਬਾਰਸ਼ ਪੈਂਦੀ ਹੈ ਤਾਂ ਇਸ ਖਾਂਟ ਵਿੱਚ ਭਾਰੀ ਮਾਤਰਾ ਵਿੱਚ ਪਾਣੀ ਆ ਕੇ ਘੱਗਰ ਦਰਿਆ ਵਿੱਚ ਡਿੱਗਦਾ ਹੈ। ਖਾਂਟ ਦੇ ਨਾਲ ਵਸੇ ਘਰਾਂ ਦੀਆਂ ਦੀਵਾਰਾਂ ਡਿੱਗਣ ਦਾ ਖਤਰਾ ਪੈਦਾ ਹੋ ਜਾਂਦਾ ਹੈ। ਇਸ ਲਈ ਇਸ ਖਾਂਟ ਵਿੱਚ ਵੱਡੇ-ਵੱਡੇ ਪਾਈਪ ਦੱਬੇ ਜਾਣ ਤਾਂ ਕਿ ਬਾਰਸ਼ ਦਾ ਪਾਣੀ ਇਨ੍ਹਾਂ ਪਾਈਪਾਂ ਰਾਹੀਂ ਘੱਗਰ ਦਰਿਆ ਵਿੱਚ ਚਲਿਆ ਜਾਵੇ। ਇਸ ਮੌਕੇ ਪ੍ਰਨੀਤ ਕੌਰ ਨੇ ਲੋਕਾਂ ਨੂੰ ਵਿਸ਼ਵਾਸ ਦੁਆਇਆ ਕਿ ਉਹ ਡਰੇਨਜ਼ ਵਿਭਾਗ ਦੇ ਅਧਿਕਾਰੀਆਂ ਨਾਲ ਗੱਲ ਕਰਨਗੇ ਅਤੇ ਇਸ ਖਾਂਟ ਵਿੱਚ ਵੱਡੇ ਪਾਈਪ ਦੱਬਣ ਲਈ ਉਨ੍ਹਾਂ ਨੂੰ ਕਹਿਣਗੇ। -ਪੱਤਰ ਪ੍ਰੇਰਕ