ਪ੍ਰਭਾਸ ਨੇ ਵੈਂਕਟੇਸ਼ਵਰ ਸਵਾਮੀ ਮੰਦਰ ’ਚ ਮੱਥਾ ਟੇਕਿਆ

ਹੈਦਰਾਬਾਦ: ਅਦਾਕਾਰ ਪ੍ਰਭਾਸ ਦੀ ਫਿਲਮ ‘ਆਦਿਪੁਰਸ਼’ 16 ਜੂਨ ਨੂੰ ਰਿਲੀਜ਼ ਹੋ ਰਹੀ ਹੈ। ਪ੍ਰਭਾਸ ਨੇ ਇਸ ਫਿਲਮ ਦਾ ਟਰੇਲਰ ਜਾਰੀ ਹੋਣ ਤੋਂ ਪਹਿਲਾਂ ਅੱਜ ਤਿਰੂਪਤੀ ਜ਼ਿਲ੍ਹੇ ਦੇ ਤਿਰੂਮਲਾ ਵਿਚ ਸ੍ਰੀ ਵੈਂਕਟੇਸ਼ਵਰ ਸਵਾਮੀ ਮੰਦਰ ਵਿੱਚ ਮੱਥਾ ਟੇਕਿਆ ਤੇ ਪੂਜਾ ਅਰਚਨਾ ਕੀਤੀ। ਦੱਸਣਾ ਬਣਦਾ ਹੈ ਕਿ ਫਿਲਮ ‘ਆਦਿਪੁਰਸ਼’ ਰਾਮਾਇਣ ਦਾ ਰੂਪਾਂਤਰਣ ਹੈ ਤੇ ਇਸ ਫਿਲਮ ਦੇ ਨਿਰਦੇਸ਼ਕ ਓਮ ਰਾਊਤ ਹਨ। ਇਸ ਫਿਲਮ ਵਿੱਚ ਪ੍ਰਭਾਸ ਭਗਵਾਨ ਰਾਮ ਦੀ ਭੂਮਿਕਾ ਵਿੱਚ ਨਜ਼ਰ ਆਵੇਗਾ। ਪ੍ਰੋਡਕਸ਼ਨ ਹਾਊਸ ਟੀ-ਸੀਰੀਜ਼ ਨੇ ਆਪਣੇ ਅਧਿਕਾਰਤ ਟਵਿੱਟਰ ਪੇਜ ‘ਤੇ ਅੱਜ ਪ੍ਰਭਾਸ ਦੇ ਮੰਦਰ ਵਿਚ ਨਤਮਸਤਕ ਹੋਣ ਦੀਆਂ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਇਸ ਦੀ ਕੈਪਸ਼ਨ ਵਿਚ ਲਿਖਿਆ,’ਇੱਕ ਪਵਿੱਤਰ ਪਲ: ਪ੍ਰਭਾਸ ‘ਆਦਿਪੁਰਸ਼’ ਦੇ ਫਾਈਨਲ ਟਰੇਲਰ ਲਾਂਚ ਤੋਂ ਪਹਿਲਾਂ ਤਿਰੂਮਲਾ ਮੰਦਰ ‘ਚ ਆਸ਼ੀਰਵਾਦ ਲੈਂਦੇ ਹੋਏ। ਜੁੜੇ ਰਹੋ! ਵਿਸ਼ਵ ਭਰ ਦੇ ਸਿਨੇਮਿਆਂ ਵਿੱਚ 16 ਜੂਨ ਨੂੰ ਰਿਲੀਜ਼ ਹੋਵੇਗੀ #ਆਦਿਪੁਰਸ਼!” ਇਸ ਫਿਲਮ ਵਿੱਚ ਕ੍ਰਿਤੀ ਸੈਨਨ, ਸਨੀ ਸਿੰਘ, ਦੇਵਦੱਤਾ ਨਾਗੇ ਅਤੇ ਸੈਫ ਅਲੀ ਖਾਨ ਵੀ ਹਨ। ਇਹ ਫਿਲਮ 16 ਜੂਨ ਨੂੰ 3ਡੀ ਰੂਪ ਵਿੱਚ ਰਿਲੀਜ਼ ਹੋਵੇਗੀ। ਇਸ ਦਾ ਕੌਮਾਂਤਰੀ ਪ੍ਰੀਮੀਅਰ 13 ਜੂਨ ਨੂੰ ਨਿਊਯਾਰਕ ਦੇ ਟ੍ਰਿਬੇਕਾ ਫਿਲਮ ਫੈਸਟੀਵਲ ਮੌਕੇ ਹੋਵੇਗਾ। -ਪੀਟੀਆਈ