ਪਾਵਰਕੌਮ ਵੱਲੋਂ ਬਿਜਲੀ ਚੋਰੀ ਰੋਕਣ ਲਈ ਮੁਹਿੰਮ ਤੇਜ਼

ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 24 ਸਤੰਬਰ
ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਦੇ ਲੁਧਿਆਣਾ ਕੇਂਦਰੀ ਜ਼ੋਨ ਵੱਲੋਂ ਵੱਖ-ਵੱਖ ਸਰਕਲਾਂ ਦੀਆਂ ਟੀਮਾਂ ਨੇ ਬਿਜਲੀ ਚੋਰੀ ਨੂੰ ਨੱਥ ਪਾਉਣ ਲਈ ਸ਼ੁਰੂ ਕੀਤੀ ਮੁਹਿੰਮ ਤਹਿਤ ਵੱਖ ਵੱਖ ਇਲਾਕਿਆਂ ਵਿੱਚ ਚੈਕਿੰਗ ਕਰਕੇ ਬਿਜਲੀ ਚੋਰੀ ਦੇ 220 ਕੇਸ ਫੜੇ ਹਨ ਅਤੇ ਕੁੱਲ 57 ਲੱਖ ਰੁਪਏ ਦਾ ਜੁਰਮਾਨਾ ਵਸੂਲਿਆ ਹੈ। ਕੇਂਦਰੀ ਜ਼ੋਨ ਦੇ ਚੀਫ਼ ਇੰਜਨੀਅਰ ਇੰਦਰਪਾਲ ਸਿੰਘ ਦੀ ਅਗਵਾਈ ਹੇਠ ਟੀਮਾਂ ਨੇ 4092 ਕੁਨੈਕਸ਼ਨਾਂ ਦੀ ਜਾਂਚ ਕੀਤੀ, ਜਿਨ੍ਹਾਂ ਵਿੱਚ ਪੂਰਬੀ ਸਰਕਲ ਦੇ 127 ਕੁਨੈਕਸ਼ਨ, ਪੱਛਮੀ ਸਰਕਲ ਦੇ 1594 ਕੁਨੈਕਸ਼ਨ, ਸਬ ਅਰਬਨ ਸਰਕਲ ਦੇ 844 ਕੁਨੈਕਸ਼ਨ ਅਤੇ ਖੰਨਾ ਸਰਕਲ ਦੇ 1527 ਕੁਨੈਕਸ਼ਨ ਸ਼ਾਮਲ ਸਨ।
ਚੀਫ਼ ਇੰਜਨੀਅਰ ਨੇ ਦੱਸਿਆ ਕਿ ਚੈਕਿੰਗ ਦੌਰਾਨ ਟੀਮਾਂ ਨੇ 220 ਕੁਨੈਕਸ਼ਨ ਅਜਿਹੇ ਫੜੇ, ਜਿਨ੍ਹਾਂ ਵਿਚੋਂ 78 ਕੁਨੈਕਸ਼ਨ ਬਿਜਲੀ ਚੋਰੀ 6 ਕੁਨੈਕਸ਼ਨ ਬਿਜਲੀ ਦੀ ਦੁਰਵਰਤੋਂ (ਯੂਯੂਈ) ਅਤੇ 136 ਕਨੈਕਸ਼ਨ ਗੈਰ ਕਾਨੂੰਨੀ ਤਰੀਕੇ ਨਾਲ ਸਪਲਾਈ (ਯੂਈ) ਤੇ ਹੋਰਨਾਂ ਮਾਮਲਿਆਂ ਨਾਲ ਜੁੜੇ ਸਨ। ਇਨ੍ਹਾਂ 220 ਕੇਸਾਂ ਵਿੱਚ ਟੀਮਾਂ ਨੇ 57.04 ਲੱਖ ਰੁਪਏ ਦੇ ਜੁਰਮਾਨੇ ਵਸੂਲੇ ਹਨ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ 220 ਕੇਸਾਂ ਵਿੱਚੋ 94 ਕੇਸ ਸਬ ਅਰਬਨ ਸਰਕਲ, 73 ਕੇਸ ਖੰਨਾ ਸਰਕਲ, 42 ਕੇਸ ਪੱਛਮੀ ਸਰਕਲ ਅਤੇ 11 ਕੇਸ ਪੂਰਬੀ ਸਰਕਲ ਵਿੱਚੋਂ ਸਨ।
ਇਸ ਮੁਹਿੰਮ ਦੌਰਾਨ ਸਭ ਤੋਂ ਵੱਧ ਕੁਨੈਕਸ਼ਨ ਪੱਛਮੀ ਸਰਕਲ 1594 ਅਧੀਨ ਚੈੱਕ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ ਕਾਰਜਕਾਰੀ ਇੰਜਨੀਅਰ (ਅਗਰ ਨਗਰ) ਦਲਜੀਤ ਸਿੰਘ ਦੀਆਂ ਵਿਸ਼ੇਸ਼ ਕੋਸ਼ਿਸ਼ਾਂ ਸਦਕਾ ਸਿਰਫ਼ ਅਗਰ ਨਗਰ ਡਵੀਜ਼ਨ ਅੰਦਰ 469 ਕੁਨੈਕਸ਼ਨ ਚੈੱਕ ਕੀਤੇ ਗਏ।
ਇੰਜ. ਇੰਦਰਪਾਲ ਸਿੰਘ ਨੇ ਸਪਸ਼ਟ ਕੀਤਾ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਅਤੇ ਬਿਜਲੀ ਮੰਤਰੀ ਹਰਭਜਨ ਸਿੰਘ ਈਟੀਓ ਦੀ ਅਗਵਾਈ ਹੇਠ ਸਰਕਾਰ ਸੂਬੇ ਅੰਦਰ ਬਿਜਲੀ ਚੋਰੀ ਉੱਪਰ ਨੱਥ ਪਾਉਣ ਲਈ ਵਚਨਬੱਧ ਹੈ ਅਤੇ ਸੀਐਮਡੀ ਇੰਜ. ਬਲਦੇਵ ਸਿੰਘ ਸਰਾਂ ਤੇ ਡਾਇਰੈਕਟਰ ਵੰਡ ਡੀਪੀਐਸ ਗਰੇਵਾਲ ਦੀਆਂ ਬਿਜਲੀ ਚੋਰੀ ਦੀ ਅਲਾਮਤ ਨੂੰ ਖ਼ਤਮ ਕਰਨ ਵਾਸਤੇ ਕੁੰਡੀ ਲਗਾਉਣ ਵਾਲੇ ਖਪਤਕਾਰਾਂ ਖਿਲਾਫ ਸਖ਼ਤ ਕਾਰਵਾਈ ਕਰਨ ਦੀਆਂ ਹਦਾਇਤਾਂ ਹਨ। ਉਨ੍ਹਾਂ ਕਿਹਾ ਕਿ ਵਿਭਾਗ ਆਪਣੇ ਖਪਤਕਾਰਾਂ ਨੂੰ ਨਿਰਵਿਘਨ ਬਿਜਲੀ ਦੀ ਸਪਲਾਈ ਦੇਣ ਵਾਸਤੇ ਇਸ ਦੀ ਚੋਰੀ ਉਪਰ ਨੱਥ ਪਾਉਣਾ ਚਾਹੁੰਦਾ ਹੈ। ਇਹ ਤਹਿਤ ਆਉਂਦੇ ਦਿਨਾਂ ਦੌਰਾਨ ਮੁਹਿੰਮ ਨੂੰ ਹੋਰ ਵੱਡੇ ਪੱਧਰ ਤੇ ਚਲਾਇਆ ਜਾਵੇਗਾ ਅਤੇ ਉਨ੍ਹਾਂ ਨੇ ਬਿਜਲੀ ਦੀ ਖਪਤ ਸਬੰਧੀ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ ਖਪਤਕਾਰਾਂ ਨੂੰ ਸਖ਼ਤ ਕਾਰਵਾਈ ਦੀ ਚਿਤਾਵਨੀ ਵੀ ਦਿੱਤੀ ਹੈ।