ਪਾਵਰਕੌਮ ਨੇ ਅਸੁਰੱਖਿਅਤ ਮੀਟਰਾਂ ਦੇ ਬਕਸੇ ਠੀਕ ਕੀਤੇ

ਭਗਵਾਨ ਦਾਸ ਸੰਦਲ
ਦਸੂਹਾ, 1 ਮਈ
ਇੱਥੇ ਸ਼ਹਿਰ ਦੇ ਕਈ ਬਾਜ਼ਾਰਾਂ ਤੇ ਮੁਹੱਲਿਆਂ ਵਿੱਚ ਅਸੁਰੱਖਿਅਤ ਢੰਗ ਨਾਲ ਲਟਕ ਰਹੇ ਮੀਟਰਾਂ ਦੇ ਬਕਸੇ ਅਤੇ ਨੰਗੀਆਂ ਤਾਰਾਂ ਲੋਕਾਂ ਲਈ ਜਾਨ ਦਾ ਖੌਅ ਬਣੀਆਂ ਹੋਈਆਂ ਸਨ। ਇਨ੍ਹਾਂ ਨੂੰ ਠੀਕ ਕਰਨ ਲਈ ਪਾਵਰਕੌਮ ਦੇ ਅਧਿਕਾਰੀਆਂ ਨੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਦੱਸਣਯੋਗ ਹੈ ਕਿ 29 ਅਪਰੈਲ ਨੂੰ ‘ਅਸੁਰੱਖਿਅਤ ਮੀਟਰਾਂ ਦੇ ਬਕਸਿਆਂ ਤੋਂ ਪਾਵਰਕੌਮ ਨੇ ਮੂੰਹ ਫੇਰਿਆ’ ਸਿਰਲੇਖ ਹੇਠ ‘ਪੰਜਾਬੀ ਟ੍ਰਿਬਿਊਨ’ ਵਿੱਚ ਛਪੀ ਖ਼ਬਰ ਮਗਰੋਂ ਪਾਵਰਕੌਮ ਨੇ ਕਾਰਵਾਈ ਸ਼ੁਰੂ ਕੀਤੀ ਹੈ। ਪਾਵਰਕੋਮ ਦੇ ਏਈਈ ਸੁਰਿੰਦਰ ਸਿੰਘ ਤੇ ਜੇਈ ਸੁਖਜਿੰਦਰ ਸਿੰਘ ਦੀ ਅਗਵਾਈ ਹੇਠਲੀ ਟੀਮ ਨੇ ਵੱਖ-ਵੱਖ ਥਾਵਾਂ ’ਤੇ ਮੀਟਰਾਂ ਦੇ ਲਟਕ ਰਹੇ ਬਕਸਿਆਂ ਦੀ ਪਛਾਣ ਕੀਤੀ। ਇਸ ਦੌਰਾਨ ਬਿਜਲੀ ਦੀਆਂ ਤਾਰਾਂ ਦੇ ਨੰਗੇ ਜੋੜ ਵੀ ਠੀਕ ਕੀਤੇ ਗਏ। ਏਈਈ ਸੁਰਿੰਦਰ ਸਿੰਘ ਨੇ ਕਿਹਾ ਕਿ ਮੀਟਰਾਂ ਦੇ ਬਕਸਿਆਂ ਦੀਆਂ ਖਾਮੀਆਂ ਨੂੰ ਦੂਰ ਕੀਤਾ ਜਾਵੇਗਾ। ਇਸ ਮੌਕੇ ਲਾਈਨਮੈਨ ਗੁਰਵਿੰਦਰ ਸਿੰਘ, ਹਰਦੇਵ ਸਿੰਘ, ਰਿੰਕੂ ਮਹਿਰਾ ਤੇ ਰਾਜੂ ਟੁਕਰਾਲ ਵੀ ਮੌਜੂਦ ਸਨ।