ਤਸਕਰਾਂ ਨੂੰ ਕਾਬੂ ਕਰਦਿਆਂ ਥਾਣੇਦਾਰ ਤੇ ਐੱਸਪੀਓ ਜ਼ਖਮੀ

ਗੁਰਦੀਪ ਸਿੰਘ ਭੱਟੀ
ਟੋਹਾਣਾ, 23 ਨਵੰਬਰ
ਇੱਥੋਂ ਦੀ ਸਦਰ ਪੁਲੀਸ ਨੇ ਪਿੰਡ ਅੱਕਾਂਵਾਲੀ ਦੀ ਹੱਦ ਵਿਚੋਂ ਕਾਰ ਸਵਾਰਾਂ ਤੋਂ 272 ਗਰਾਮ ਹੈਰੋਇਨ ਬਰਾਮਦ ਕੀਤੀ ਹੈ ਤੇ ਦੋ ਕਾਰ ਸਵਾਰਾਂ ਨੂੰ ਕਾਬੂ ਕਰ ਲਿਆ। ਨਸ਼ਾ ਤਸਕਰ ਜਦੋਂ ਪੁਲੀਸ ਵਿਚ ਘਿਰ ਗਏ ਤਾਂ ਉਨ੍ਹਾਂ ਵਿਚੋਂ ਇਕ ਨੇ ਫਰਾਰ ਹੋਣ ਦੀ ਕੋਸ਼ਿਸ਼ ਕੀਤੀ। ਇਸ ਦੌਰਾਨ ਜਦੋਂ ਕਾਰ ਚਾਲਕ ਨੇ ਕਾਰ ਨੂੰ ਬੈਂਕ ਕਰਕੇ ਭਜਾਈ ਤਾਂ ਕਾਰ ਪਿੱਛੇ ਦਰਖ਼ਤ ਨਾਲ ਜਾ ਟਕਰਾਈ, ਇਸ ਦੌਰਾਨ ਪੁਲੀਸ ਟੀਮ ਨੇ ਚਾਲਕ ਨੂੰ ਕ਼ਾਬੂ ਕਰ ਲਿਆ ਪਰ ਇਸ ਦੌਰਾਨ ਥਾਣੇਦਾਰ ਸੁਮੇਰ ਸਿੰਘ ਤੇ ਐਸਪੀ ਓ ਰੋਹਤਾਸ਼ ਨੂੰ ਹਸਪਤਾਲ ਭਰਤੀ ਕੀਤਾ ਗਿਆ ਹੈ।ਇਸ ਮੌਕੇ ਡੀਐਸਪੀ ਜਗਦੀਸ਼ ਕਾਜਲਾ ਮੌਕੇ ’ਤੇ ਪੁੱਜੇ ਤੇ ਜਦੋਂ ਕਾਰ ਦੀ ਤਲਾਸ਼ੀ ਲਈ ਗਈ ਤਾਂ 272 ਗ੍ਰਾਮ ਹੈਰੋਇਨ ਪਲਾਸਟਿਕ ਲਿਫਾਫੇ ਵਿਚੋਂ ਮਿਲੀ। ਡੀਐਸਪੀ ਨੇ ਦੱਸਿਆ ਕਿ ਤਸਕਰਾਂ ਦੀ ਪਛਾਣ ਮੰਗਲ ਸਿੰਘ ਪੁੱਤਰ ਗੋਵਿੰਦ ਸਿੰਘ ਪਿੰਡ ਪੀਰਾਂ ਵਾਲੀ ਢਾਣੀ (ਹਿਸਾਰ) ਤੇ ਦੂਜੇ ਤਸਕਰ ਦੀ ਸ਼ਨਾਖਤ ਗੁਰਦਾਸ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਪਿੰਡ ਢਾਣੀ ਨੂਰਪੁਰ (ਦਿਵਾਨਾ) ਵਜੋਂ ਹੋਈ ਹੈ।