ਕਾਵਿ ਕਿਆਰੀ

ਜੀ ਆਇਆਂ!

ਸ਼ੇਰ ਸਿੰਘ ਕੰਵਲ

ਨਵਿਆਂ ਵਰ੍ਹਿਆ

ਭਾਗੀਂ ਭਰਿਆ

ਸਾਡੇ ਆਂਗਣ ਆ।

ਲੱਪ ਕਿਰਨਾਂ ਦੀ

ਸੂਹਾ ਚਾਨਣ

ਸਾਡੀ ਝੋਲ਼ੀ ਪਾ।

ਅੱਥਰੂ ਸੁੱਕਣ

ਵੰਗਾਂ ਛਣਕਣ

ਮੌਲਣ ਵਿਗਸਣ ਚਾਅ।

ਪੁੰਗਰੇ ਪਿਆਰ

ਤੇ ਨਫ਼ਰਤ ਨੱਸੇ

ਐਸੇ ਢੋਅ ਢੁਕਾਅ।

ਹਾਲ਼ੀ ਪਾਲ਼ੀ

ਹੱਸਣ ਵੱਸਣ

ਭਰਵੀਂ ਫ਼ਸਲ ਉਗਾਅ।

ਮਿਹਨਤ ਫਲ਼ੇ

ਮੁਹੱਬਤ ਪਲ੍ਹਰੇ

ਰਹੇ ਨਾ ਕੋਈ ਘਟਾਅ।

ਚੱਲੇ ਨਾ ਗੋਲ਼ੀ

ਵੰਝਲੀ ਵੱਜੇ

ਜੱਗ ਵਿਚ ਸੁੱਖ ਵਰਤਾਅ।

ਨਵਿਆਂ ਵਰ੍ਹਿਆ

ਭਾਗੀਂ ਭਰਿਆ

ਸਾਡੇ ਆਂਗਣ ਆ…

ਨਵਾਂ ਸਾਲ ਮੁਬਾਰਕ

ਸੁਰਿੰਦਰ ਗਿੱਲ

ਅੰਤ ਦਸੰਬਰ ਦੀ ਇਹ ਆਥਣ

ਵਿਦਾ ਮੰਗਦੀ ਬੁੱਢੀ ਸਾਥਣ।

ਇਸ ਨੂੰ ਹੱਸ ਕੇ ਵਿਦਾ ਆਖੀਏ

ਜਸ਼ਨ ਮਨਾਈਏ

ਆਵਣ ਵਾਲੇ ਵਰ੍ਹੇ ਦੇ ਰਾਹ ‘ਤੇ ਅੱਖਾਂ ਲਾਈਏ।

ਕੱਲ੍ਹ ਜੋ ਸੂਰਜ ਚੜ੍ਹਨਾ, ਆਪਣਾ ਸੂਰਜ ਹੋਵੇ

ਲੋਕਾਂ ਦੀਆਂ ਅੱਖਾਂ ਵਿਚ ਸੂਹੇ ਸੁਪਨ ਪ੍ਰੋਵੇ।

ਨਵੇਂ ਵਰ੍ਹੇ ਦਾ ਸੂਹਾ ਸੂਰਜ

ਤੇਰੇ ਘਰ ਦੇ ਦਰ-ਦਹਿਲੀਜ਼ਾਂ, ਕਰੇ ਸੁਨਹਿਰੇ

ਮੇਰੇ ਘਰ ਦੇ ਦਰ-ਦਹਿਲੀਜ਼ਾਂ, ਕਰੇ ਸੁਨਹਿਰੇ

ਸਭਨਾਂ ਦੇ ਘਰ ਦਰ-ਦਹਿਲੀਜ਼ਾਂ, ਕਰੇ ਸੁਨਹਿਰੇ

ਸੁੰਨੀਆਂ ਛੱਤਾਂ ਹੇਠ ਨਾ ਕੈਦ ਰਹਿਣ ਮੁਸਕਾਣਾਂ

ਇੱਛਾਵਾਂ ‘ਤੇ ਕਦੇ ਨਾ ਲੱਗਣ, ਕਰੜੇ ਪਹਿਰੇ

ਮੇਰੇ ਪਿਆਰੇ ਦੇਸ਼ ਵਾਸੀਓ! ਮਿੱਤਰੋ!

ਸਭ ਨੂੰ ਨਵਾਂ ਸਾਲ ਮੁਬਾਰਕ।

ਸੰਪਰਕ: 99154-73505

ਨਵੇਂ ਸਾਲ ਦਾ ਸੋਨ ਸਵੇਰਾ

ਜਗਤਾਰ ਗਿੱਲ

ਨਵੇਂ ਸਾਲ ਦਾ ਸੋਨ ਸਵੇਰਾ ਖ਼ੁਸ਼ੀਆਂ ਲੈ ਕੇ ਆਵੇ

ਸੂਰਜ ਮਹਿਕਾਂ ਲੈ ਕੇ ਉੱਗੇ ਰਾਗ ਮੁਹੱਬਤ ਗਾਵੇ

ਨਵੇਂ ਸਾਲ ਦਾ ਸੋਨ ਸਵੇਰਾ ਧਰਤੀ ਨੂੰ ਮਹਿਕਾਵੇ

ਮੁੱਕ ਜਾਣ ਸਭ ਦੁੱਖ ਦਲਿੱਦਰ ਦੂਰ ਗ਼ਮਾਂ ਦੇ ਸਾਏ

ਨਵੇਂ ਸਾਲ ਦਾ ਸੋਨ ਸਵੇਰਾ ਘਰ ਘਰ ਖ਼ੁਸ਼ੀਆਂ ਵੰਡੇ

ਖਿੜਨੇ ਫੁੱਲ ਪਿਆਰਾਂ ਵਾਲੇ ਦੂਰ ਹੋਣ ਸਭ ਕੰਡੇ

ਨਵੇਂ ਸਾਲ ਦਾ ਸੋਨ ਸਵੇਰਾ ਅੱਖ ਪੂਰਬੋਂ ਪੁੱਟੇ

ਜੰਗਲ ਬੇਲੇ ਫ਼ਲ ਫ਼ੁੱਲ ਸਾਰੇ ਜਾਗਣ ਨੀਂਦੋਂ ਸੁੱਤੇ

ਨਵੇਂ ਸਾਲ ਦਾ ਸੋਨ ਸਵੇਰਾ ਆਵੇ ਕਰਮਾਂ ਵਾਲਾ

ਭਰਮ ਭੁਲੇਖੇ ਮੁੱਕਣ ਸਾਰੇ ਹੋਵੇ ਖ਼ੂਬ ਉਜਾਲਾ

ਨਵੇਂ ਸਾਲ ਦਾ ਸੋਨ ਸਵੇਰਾ ਮੁੱਖੋਂ ਘੁੰਡ ਉਠਾ ਕੇ

ਕੁਦਰਤ ਰਾਣੀ ਖਿੜ ਖਿੜ ਹੱਸੇ ਮੱਥੇ ਤਿਲਕ ਲਗਾ ਕੇ

ਨਵੇਂ ਸਾਲ ਦਾ ਸੋਨ ਸਵੇਰਾ ਮਹਿਕਾਂ ਲੈ ਕੇ ਆਵੇ

ਊਚਨੀਚ ਦੀਆਂ ਕੰਧਾਂ ਡਿੱਗਣ ਨਫ਼ਰਤ ਢਿੱਡੋਂ ਜਾਏ

ਨਵੇਂ ਸਾਲ ਦਾ ਸੋਨ ਸਵੇਰਾ ਦਿਲਾਂ ‘ਚੋਂ ਨਫ਼ਰਤ ਕੱਢੇ

ਸਾਰੇ ਇਕ ਬਰਾਬਰ ਦਿਸਣ ਕੀ ਛੋਟੇ ਕੀ ਵੱਡੇ

ਨਵੇਂ ਸਾਲ ਦਾ ਸੋਨ ਸਵੇਰਾ ਅੱਖ ਸੁਵੱਲੀ ਪੁੱਟੇ

ਇੱਕ ਦੂਜੇ ਨੂੰ ਪਾ ਗਲਵੱਕੜੀ ਸੀਨੇ ਲਾ ਕੇ ਘੁੱਟੇ

ਨਵੇਂ ਸਾਲ ਦਾ ਸੋਨ ਸਵੇਰਾ ਤੇਲ ਬਰੂਹੀਂ ਚੋਏ

ਇੱਕ ਦੂਜੇ ਨੂੰ ਗਲ ਨਾਲ ਲਾਈਏ ਚਿਰ ਤੋਂ ਵਿੱਛੜੇ ਹੋਏ

ਸੰਪਰਕ: 94647-80299