ਟੋਹਾਣਾ ਨੇੜੇ ਸ਼ਰਧਾਲੂਆਂ ਦੀ ਕਾਰ ਨੂੰ ਹਾਦਸਾ, 4 ਦੀ ਮੌਤ

ਪੱਤਰ ਪ੍ਰੇਰਕ
ਟੋਹਾਣਾ, 20 ਅਗਸਤ
ਨੌਹਰ-ਭਾਦਰਾ ਸੜਕ ’ਤੇ ਆਲਟੋ ਕਾਰ ਤੇ ਪਿੱਕਅੱਪ ਗੱਡੀ ਦੀ ਹੋਈ ਸਿੱਧੀ ਟੱਕਰ ਦੌਰਾਨ ਧਾਰਮਿਕ ਸਥਾਨ ਤੋਂ ਪਰਤ ਰਹੇ ਪੰਜ ਦੋਸਤਾਂ ਵਿੱਚੋਂ ਚਾਰ ਦੀ ਮੌਤ ਹੋ ਗਈ ਤੇ ਇਕ ਗੰਭੀਰ ਜ਼ਖ਼ਮੀ ਹੋ ਗਿਆ। ਰਾਜਸਥਾਨ ਦੀ ਹੱਦ ਵਿੱਚ ਪੈਂਦੇ ਗੋਗਾਮੈੜੀ ਥਾਣਾ ਪੁਲੀਸ ਨੇ ਹਿਸਾਰ ਦੇ ਆਈਜੀ ਦਫ਼ਤਰ ਵਿੱਚ ਹਰਿਆਣਾ ਨੰਬਰ ਦੀ ਕਾਰ ਦੇ ਹਾਦਸੇ ਬਾਰੇ ਜਾਣਕਾਰੀ ਦਿੱਤੀ।
ਮ੍ਰਿਤਕਾਂ ਦੀ ਪਛਾਣ ਹਿਸਾਰ ਵਾਸੀ ਅਨਿਲ (30), ਸੁਰਿੰਦਰ (32), ਕ੍ਰਿਸ਼ਨ (21), ਰਾਜੇਸ਼ (23), ਸਚਿਨ (24) ਵਜੋਂ ਹੋਈ ਹੈ। ਇਨ੍ਹਾਂ ਤੋਂ ਇਲਾਵਾ ਇਕ ਗੰਭੀਰ ਜਖ਼ਮੀ ਨੂੰ ਹਸਪਤਾਲ ਭਰਤੀ ਕਰਵਾਇਆ ਗਿਆ ਹੈ। ਪੁਲੀਸ ਮੁਤਾਬਕ ਪੰਜੇ ਦੋਸਤ ਪੂਜਾ ਕਰਨ ਤੋਂ ਬਾਅਦ ਸ਼ਨਿੱਚਵਾਰ ਰਾਤ ਨੂੰ ਘੁੰਮਣ ਬਾਹਰ ਨਿਕਲੇ ਸਨ ਕਿ ਰਾਤ 11 ਵਜੇ ਪਿਕਅੱਪ ਗੱਡੀ ਨਾਲ ਹਾਦਸਾ ਵਾਪਰ ਗਿਆ। ਸੂਚਨਾ ਮਿਲਦੇ ਹੀ ਮ੍ਰਿਤਕਾਂ ਦੇ ਪਰਿਵਾਰ ਗੋਗਾਮੈੜੀ ਥਾਣੇ ਪਹੁੰਚ ਗਏ।