ਪੀਲੀਭੀਤ ਦੇ ਲੋਕਾਂ ਨੇ ਭਾਜਪਾ ਨੂੰ ਹਰਾਉਣ ਦਾ ਫ਼ੈਸਲਾ ਕੀਤਾ: ਅਖਿਲੇਸ਼ ਯਾਦਵ

ਪੀਲੀਭੀਤ, 12 ਅਪਰੈਲ
ਸਮਾਜਵਾਦੀ ਪਾਰਟੀ ਦੇ ਪ੍ਰਧਾਨ ਅਖਿਲੇਸ਼ ਯਾਦਵ ਨੇ ਕਿਹਾ ਹੈ ਕਿ ਕੇਂਦਰ ਦੀ ਭਾਜਪਾ ਸਰਕਾਰ ਨੇ ਕਿਸਾਨਾਂ ਦੀ ਤਾਕਤ ਅੱਗੇ ਝੁਕਦਿਆਂ ਤਿੰਨ ਕਾਲੇ ਖੇਤੀ ਕਾਨੂੰਨ ਰੱਦ ਕੀਤੇ ਸਨ। ਉਨ੍ਹਾਂ ਦੋਸ਼ ਲਾਇਆ ਕਿ ਦੇਸ਼ ’ਚ ਮਹਿੰਗਾਈ ਦਾ ਮੁੱਖ ਕਾਰਨ ਭਾਜਪਾ ਵੱਲੋਂ ਚੋਣ ਬਾਂਡਾਂ ਰਾਹੀਂ ਉਗਰਾਹੇ ਗਏ ਪੈਸੇ ਹਨ। ਪਾਰਟੀ ਉਮੀਦਵਾਰ ਭਗਵਤ ਸਰਨ ਗੰਗਵਾਰ ਦੀ ਹਮਾਇਤ ’ਚ ਰੈਲੀ ਨੂੰ ਸੰਬੋਧਨ ਕਰਦਿਆਂ ਅਖਿਲੇਸ਼ ਨੇ ਕਿਹਾ ਕਿ ਪੀਲੀਭੀਤ ਦੇ ਲੋਕਾਂ ਨੇ ਭਾਜਪਾ ਨੂੰ ਹਰਾਉਣ ਦਾ ਮਨ ਬਣਾ ਲਿਆ ਅਤੇ ਪਾਰਟੀ ਡਰੀ ਹੋਈ ਹੈ। ਚੋਣਾਂ ਦੇ ਐਲਾਨ ਮਗਰੋਂ ਉੱਤਰ ਪ੍ਰਦੇਸ਼ ’ਚ ਯਾਦਵ ਦੀ ਇਹ ਪਹਿਲੀ ਚੋਣ ਰੈਲੀ ਹੈ। ਚੋਣ ਬਾਂਡਾਂ ਅਤੇ ਨੋਟਬੰਦੀ ਦੇ ਮੁੱਦੇ ’ਤੇ ਭਾਜਪਾ ਸਰਕਾਰ ਨੂੰ ਘੇਰਦਿਆਂ ਉਨ੍ਹਾਂ ਕਿਹਾ ਕਿ ਦੋਵਾਂ ਰਾਹੀਂ ਭਾਜਪਾ ਨੇ ਆਪਣੇ ਕਾਲੇ ਧਨ ਨੂੰ ਸਫ਼ੈਦ ਕਰ ਲਿਆ ਹੈ। ਪੀਲੀਭੀਤ ’ਚ ਭਾਜਪਾ ਉਮੀਦਵਾਰ ਜਿਤਿਨ ਪ੍ਰਸਾਦ ਬਾਰੇ ਟਿੱਪਣੀ ਕਰਦਿਆਂ ਉਨ੍ਹਾਂ ਕਿਹਾ ਕਿ ਨਵਾਂ ਉਮੀਦਵਾਰ ਮੈਦਾਨ ’ਚ ਉਤਾਰਿਆ ਗਿਆ ਹੈ ਜੋ ਇਹ ਆਖਦਾ ਹੈ ਕਿ ਜੇਕਰ ਉਸ ਨੂੰ ਪਤਾ ਹੁੰਦਾ ਕਿ ਉਹ ਇਥੋਂ ਚੋਣ ਲੜਨ ਵਾਲਾ ਹੈ ਤਾਂ ਉਸ ਨੇ ਪੀਲੀਭੀਤ ਨੂੰ ਮੁੰਬਈ ਬਣਾ ਦੇਣਾ ਸੀ ਪਰ ਇੰਜ ਕਰਨ ਦੀ ਲੋੜ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਪ੍ਰਸਾਦ ਨੂੰ ਪੀਡਬਲਿਊਡੀ ਮੰਤਰੀ ਬਣਾਇਆ ਗਿਆ ਸੀ ਅਤੇ ਉਸ ਦੇ ਵਿਭਾਗ ਨੇ ਭ੍ਰਿਸ਼ਟਾਚਾਰ ਦੇ ਸਾਰੇ ਰਿਕਾਰਡ ਤੋੜ ਦਿੱਤੇ ਹਨ। ਅਰਵਿੰਦ ਕੇਜਰੀਵਾਲ ਤੇ ਹੇਮੰਤ ਸੋਰੇਨ ਦੀ ਗ੍ਰਿਫ਼ਤਾਰੀ ਬਾਰੇ ਉਨ੍ਹਾਂ ਕਿਹਾ ਕਿ ਭਾਜਪਾ ਆਖ ਰਹੀ ਹੈ ਕਿ ਉਹ ਚੋਣਾਂ ’ਚ 400 ਸੀਟਾਂ ਜਿੱਤਣਗੇ ਪਰ ਉਹ ਇੰਨੇ ਡਰੇ ਹੋਏ ਹਨ ਕਿ ਦਿੱਲੀ ਤੇ ਝਾਰਖੰਡ ਦੇ ਮੁੱਖ ਮੰਤਰੀਆਂ ਨੂੰ ਜੇਲ੍ਹਾਂ ’ਚ ਸੁੱਟ ਦਿੱਤਾ ਹੈ। -ਪੀਟੀਆਈ

ਕੋਸ਼ਾਂਬੀ ਅਤੇ ਕੁਸ਼ੀਨਗਰ ਸੀਟਾਂ ਲਈ ਸਪਾ ਨੇ ਉਮੀਦਵਾਰ ਐਲਾਨੇ

ਲਖਨਊ: ਸਮਾਜਵਾਦੀ ਪਾਰਟੀ (ਸਪਾ) ਨੇ ਕੋਸ਼ਾਂਬੀ ਅਤੇ ਕੁਸ਼ੀਨਗਰ ਸੀਟਾਂ ਲਈ ਆਪਣੇ ਉਮੀਦਵਾਰਾਂ ਦੇ ਨਾਮ ਐਲਾਨ ਦਿੱਤੇ ਹਨ। ਸੋਸ਼ਲ ਮੀਡੀਆ ’ਤੇ ਸਾਂਝੀ ਕੀਤੀ ਗਈ ਜਾਣਕਾਰੀ ਮੁਤਾਬਕ ਪਾਰਟੀ ਨੇ ਪੁਸ਼ਪੇਂਦਰ ਸਰੋਜ ਨੂੰ ਕੋਸ਼ਾਂਬੀ ਅਤੇ ਅਜੈ ਪ੍ਰਤਾਪ ਸਿੰਘ ਉਰਫ਼ ਪਿੰਟੂ ਸੈਂਥਵਾਰ ਨੂੰ ਕੁਸ਼ੀਨਗਰ ਤੋਂ ਉਮੀਦਵਾਰ ਬਣਾਇਆ ਹੈ। ਪੁਸ਼ਪੇਂਦਰ ਸਮਾਜਵਾਦੀ ਪਾਰਟੀ ਦੇ ਕੌਮੀ ਜਨਰਲ ਸਕੱਤਰ ਇੰਦਰਜੀਤ ਸਰੋਜ ਦੇ ਪੁੱਤਰ ਹਨ। -ਪੀਟੀਆਈ