ਪਰਾਗ ਮਾਸਟਰਜ਼: ਪ੍ਰਗਨਾਨੰਦਾ ਤੇ ਅਰਵਿੰਦ ਵਿਚਾਲੇ ਬਾਜ਼ੀ ਡਰਾਅ

ਪਰਾਗ: ਭਾਰਤੀ ਗਰੈਂਡਮਾਸਟਰ ਆਰ ਪ੍ਰਗਨਾਨੰਦਾ ਨੇ ਪਰਾਗ ਮਾਸਟਰਜ਼ ਸ਼ਤਰੰਜ ਟੂਰਨਾਮੈਂਟ ਦੇ ਪੰਜਵੇਂ ਗੇੜ ਵਿੱਚ ਹਮਵਤਨ ਅਰਵਿੰਦ ਚਿਦੰਬਰਮ ਨਾਲ ਡਰਾਅ ਖੇਡਿਆ। ਹੁਣ ਦੋਵੇਂ ਬਾਕੀਆਂ ਨਾਲੋਂ ਇੱਕ-ਇੱਕ ਅੰਕ ਅੱਗੇ ਹਨ। ਅਰਵਿੰਦ ਅਤੇ ਪ੍ਰਗਨਾਨੰਦਾ ਦੇ 3.5-3.5 ਅੰਕ ਹਨ, ਜਦਕਿ ਚੀਨ ਦਾ ਸਿਖਰਲਾ ਦਰਜਾ ਪ੍ਰਾਪਤ ਵੇਈ ਯੀ, ਨੈਦਰਲੈਂਡਜ਼ ਦਾ ਅਨੀਸ਼ ਗਿਰੀ, ਵੀਅਤਨਾਮ ਦਾ ਕੁਆਂਗ ਲਿਮ ਲੀ ਅਤੇ ਜਰਮਨੀ ਦਾ ਵਿਨਸੈਂਟ ਕੀਮਰ ਉਨ੍ਹਾਂ ਤੋਂ ਇੱਕ-ਇੱਕ ਅੰਕ ਪਿੱਛੇ ਹਨ। ਬਾਕੀ ਚਾਰ ਖਿਡਾਰੀ ਸਾਂਝੇ ਤੌਰ ’ਤੇ ਛੇਵੇਂ ਸਥਾਨ ’ਤੇ ਹਨ। ਦਸ ਖਿਡਾਰੀਆਂ ਦੇ ਰਾਊਂਡ ਰੌਬਿਨ ਟੂਰਨਾਮੈਂਟ ਵਿੱਚ ਹਾਲੇ ਵੀ ਚਾਰ ਗੇੜ ਬਾਕੀ ਹਨ। ਅੱਜ ਸਿਰਫ ਵੇਈ ਯੀ ਨੇ ਸੈਮ ਸ਼ੈਂਕਲੈਂਡ ਨੂੰ ਹਰਾਇਆ, ਜਦਕਿ ਬਾਕੀ ਸਾਰੀਆਂ ਬਾਜ਼ੀਆਂ ਡਰਾਅ ਰਹੀਆਂ। -ਪੀਟੀਆਈ