ਪੱਕਾ ਮੋਰਚਾ: ਲੋਕਾਂ ਨੇ ਭੁੱਚੋ-ਨਥਾਣਾ ਸੜਕ ’ਤੇ ਆਵਾਜਾਈ ਰੋਕੀ

ਪੱਤਰ ਪ੍ਰੇਰਕ
ਨਥਾਣਾ, 1 ਅਕਤੂਬਰ
ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਵੱਲੋਂ ਪਾਣੀ ਦੀ ਨਿਕਾਸੀ ਨੂੰ ਲੈ ਕੇ ਚੱਲ ਰਹੇ ਪੱਕੇ ਮੋਰਚੇ ਦੇ 19ਵੇਂ ਦਿਨ ਅੱਜ ਲੋਕਾਂ ਨੇ ਨਥਾਣਾ-ਭੁੱਚੋ ਮੁੱਖ ਸੜਕ ’ਤੇ ਜਾਮ ਲਾ ਕੇ ਘੰਟਿਆਂਬੰਧੀ ਆਵਾਜਾਈ ਰੋਕੀ। ਸ਼ਾਮ ਸਾਢੇ ਸੱਤ ਵਜੇ ਤੱਕ ਇਹ ਜਾਮ ਲੱਗਿਆ ਹੋਣ ਕਾਰਨ ਰਾਹਗੀਰਾਂ ਨੂੰ ਭਾਰੀ ਪ੍ਰਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਨਗਰ ਪੰਚਾਇਤ ਦੇ ਅਧਿਕਾਰੀਆਂ ਨੇ ਭਲਕ ਤੋਂ ਨਿੱਜੀ ਦਖ਼ਲ ਨਾਲ ਮੋਟਰਾਂ ਚਲਵਾਉਣ ਦਾ ਭਰੋਸਾ ਦੇ ਕੇ ਆਵਾਜਾਈ ਬਹਾਲ ਕਰਵਾਈ। ਜਾਣਕਾਰੀ ਅਨੁਸਾਰ ਕੱਲ੍ਹ ਨਗਰ ਪੰਚਾਇਤ ਦੇ ਪ੍ਰਧਾਨ ਅਤੇ ਉਪ ਪ੍ਰਧਾਨ ਦੀ ਰੱਦ ਹੋਈ ਚੋਣ ਲਈ ਕੌਂਸਲਰ ਵਿਧਾਇਕ ਨੂੰ ਜ਼ਿੰਮੇਵਾਰ ਠਹਿਰਾ ਰਹੇ ਹਨ। ਖਫ਼ਾ ਹੋਏ ਕੌਂਸਲਰਾਂ ਨੇ ਦੋ ਦਿਨਾਂ ਤੋਂ ਪਾਣੀ ਦੀ ਨਿਕਾਸੀ ਵਾਲੀਆਂ ਮੋਟਰਾਂ ਬੰਦ ਕੀਤੀਆਂ ਹੋਈਆਂ ਹਨ।