ਜਿਉਣੇਕੇ ਵਿੱਚੋਂ ਪਾਕਿਸਤਾਨੀ ਨਾਗਰਿਕ ਕਾਬੂ

ਪੱਤਰ ਪ੍ਰੇਰਕ
ਤਰਨ ਤਾਰਨ, 12 ਅਪਰੈਲ
ਚੋਹਲਾ ਸਾਹਿਬ ਪੁਲੀਸ ਨੇ ਕੌਮੀ ਮਾਰਗ ਨੰਬਰ-54 ਤੋਂ ਪਿੰਡ ਜਿਉਣੇਕੇ ਨੇੜਿਓਂ ਇਕ ਪਾਕਿਸਤਾਨੀ ਨਾਗਰਿਕ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਹ ਕਾਰਵਾਈ ਏਐੱਸਆਈ ਹਰਜਿੰਦਰ ਸਿੰਘ ਦੀ ਅਗਵਾਈ ਵਾਲੀ ਪੁਲੀਸ ਪਾਰਟੀ ਵੱਲੋਂ ਕੀਤੀ ਗਈ। ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਪਾਕਿਸਤਾਨੀ ਨਾਗਰਿਕ ਦੀ ਸ਼ਨਾਖਤ ਨਿਸਾਰ ਅਹਿਮਦ ਪੁੱਤਰ ਕਰਮ ਦਾਦ ਵਾਸੀ ਡਾਕਖਾਨਾ ਡਰਹਾਲ ਜੰਡਲਾ, ਪਿੰਡ ਬਰਜਨ ਤਹਿਸੀਲ ਸਮਾਹਨੀ ਜ਼ਿਲ੍ਹਾ ਭੰਬਲਬੀ ਪਾਕਿਸਤਾਨ ਵਜੋਂ ਹੋਈ ਹੈ।
ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਨਿਸਾਰ ਕੋਲੋਂ ਕੁਝ ਵੀ ਬਰਾਮਦ ਨਹੀਂ ਹੋਇਆ। ਇਹ ਪਤਾ ਲੱਗਿਆ ਹੈ ਕਿ ਉਸ ਦੀ ਦਿਮਾਗੀ ਹਾਲਤ ਠੀਕ ਨਹੀਂ ਹੈ। ਉਹ ਅੱਡਾ ਜਿਉਣੇ ਵਿਚ ਘੁੰਮ ਰਿਹਾ ਸੀ। ਪੁਲੀਸ ਨੇ ਕੇਸ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।