ਅਤਿ ਦੀ ਗਰੀਬੀ ’ਚੋਂ ਲੰਘ ਰਹੀ ਹੈ ਪਾਕਿਸਤਾਨ ਹਾਕੀ ਫੈਡਰੇਸ਼ਨ: 6 ਮਹੀਨਿਆਂ ਤੋਂ ਖ਼ਿਡਾਰੀਆਂ, ਮੁਲਾਜ਼ਮਾਂ ਤੇ ਕੋਚਾਂ ਨੂੰ ਨਹੀਂ ਕੀਤਾ ਭੁਗਤਾਨ

ਲਾਹੌਰ, 3 ਫਰਵਰੀ
ਪਾਕਿਸਤਾਨ ਹਾਕੀ ਫੈਡਰੇਸ਼ਨ (ਪੀਐੱਚਐੱਫ) ਵਿੱਚ ਸੰਕਟ ਗੰਭੀਰ ਹੋ ਰਿਹਾ ਹੈ। ਫੈਡਰੇਸ਼ਨ ਇਸ ਵੇਲੇ ਅਤਿ ਦੀ ਗਰੀਬੀ ’ਚੋਂ ਲੰਘ ਰਹੀ ਹੈ। ਇਸ ਕੌਮੀ ਸੰਸਥਾ ਨੇ ਛੇ ਮਹੀਨਿਆਂ ਤੋਂ ਆਪਣੇ ਕਰਮਚਾਰੀਆਂ ਨੂੰ ਤਨਖਾਹ ਨਹੀਂ ਦਿੱਤੀ ਹੈ। ਪੀਐੱਚਐੱਫ ਦੇ ਲਾਹੌਰ ਸਥਿਤ ਹੈੱਡਕੁਆਰਟਰ ਅਤੇ ਕਰਾਚੀ ਵਿੱਚ ਸਬ-ਆਫਿਸ ਵਿੱਚ ਸਾਰੇ ਕਰਮਚਾਰੀ ਛੇ ਮਹੀਨਿਆਂ ਤੋਂ ਤਨਖਾਹਾਂ ਦੀ ਉਡੀਕ ਕਰ ਰਹੇ ਹਨ। 80 ਤੋਂ ਵੱਧ ਦਫ਼ਤਰੀ ਅਤੇ ਹੋਰ ਮੁਲਾਜ਼ਮਾਂ ਨੂੰ ਤਨਖਾਹ ਨਹੀਂ ਮਿਲੀ ਤੇ ਕੋਈ ਮੈਡੀਕਲ ਲਾਭ ਨਹੀਂ ਮਿਲ ਰਿਹਾ ਹੈ, ਜਿਸ ਕਾਰਨ ਉਨ੍ਹਾਂ ਦਾ ਬੁਰਾ ਹਾਲ ਹੈ। ਕੌਮੀ ਸੀਨੀਅਰ ਖਿਡਾਰੀਆਂ ਨੂੰ 4-5 ਮਹੀਨਿਆਂ ਤੋਂ ਉਨ੍ਹਾਂ ਦੀ ਇਕਰਾਰਨਾਮੇ ਦੀ ਤਨਖਾਹ ਜਾਂ ਭੱਤੇ ਦਾ ਭੁਗਤਾਨ ਕੀਤਾ ਗਿਆ ਹੈ। ਪਾਕਿਸਤਾਨ ਦੇ ਕਪਤਾਨ ਇਮਾਦ ਸ਼ਕੀਲ ਬੱਟ ਅਤੇ ਕੁਝ ਹੋਰ ਖਿਡਾਰੀਆਂ ਨੇ ਵੀ ਆਪਣੇ ਰੋਜ਼ਾਨਾ ਦੇ ਬਕਾਏ ਦਾ ਭੁਗਤਾਨ ਨਾ ਕਰਨ ਦੇ ਮੁੱਦੇ 'ਤੇ ਝੜਪ ਕੀਤੀ ਸੀ। ਬੱਟ ਨੇ ਧਮਕੀ ਵੀ ਦਿੱਤੀ ਕਿ ਜਦੋਂ ਤੱਕ ਬਕਾਏ ਦਾ ਭੁਗਤਾਨ ਨਹੀਂ ਕੀਤਾ ਜਾਂਦਾ, ਉਦੋਂ ਤੱਕ ਅਗਲੇ ਮੈਚ ਨਹੀਂ ਖੇਡਗੇ। ਸੂਤਰਾਂ ਮੁਤਾਬਕ ਫੈਡਰੇਸ਼ਨ ਨੇ ਖਿਡਾਰੀਆਂ, ਮੁਲਾਜ਼ਮਾਂ, ਕੋਚਾਂ ਤੇ ਹੋਰਾਂ ਦੇ 8 ਕਰੋੜ ਰੁਪਏ ਦੇਣੇ ਹਨ।