ਤਸਕਰ ਦੀ ਨਿਸ਼ਾਨਦੇਹੀ ’ਤੇ ਅਫੀਮ ਤੇ ਡਰੱਗ ਮਨੀ ਬਰਾਮਦ

ਇਥੇ ਸੀਆਈਏ ਸਟਾਫ਼ ਤੇ ਸਿਟੀ ਪੁਲੀਸ ਵੱਲੋਂ ਪੰਜ ਦਿਨ ਪਹਿਲਾਂ ਇੱਕ ਕਿਲੋਗ੍ਰਾਮ ਹੈਰੋਇਨ ਸਮੇਤ ਬਣੇ ਗਏ ਨਸ਼ਾ ਤਸਕਰ ਨੇ ਪੁਲੀਸ ਰਿਮਾਂਡ ਦੌਰਾਨ ਅਹਿਮ ਖੁਲਾਸੇ ਕੀਤੇ ਹਨ। ਮੁਲਜ਼ਮ ਕੋਲੋਂ ਪੜਤਾਲ ਤੋਂ ਬਾਅਦ ਪਿੰਡ ਮੁੰਡੀਆ (ਲੁਧਿਆਣਾ ) ’ਚੋਂ 2.6 ਕਿਲੋ ਅਫ਼ੀਮ, 200 ਗ੍ਰਾਮ ਹੈਰੋਇਨ ਤੇ ਇੱਕ ਲੱਖ ਰੁਪਏ ਡਰੱਗ ਮਨੀ ਬਰਾਮਦ ਕੀਤੀ ਹੈ। ਪ੍ਰੈਸ ਕਾਨਫਰੰਸ ਵਿਚ ਡੀਐੱਸਪੀ(ਡੀ) ਲਵਦੀਪ ਸਿੰਘ ਗਿੱਲ ਅਤੇ ਸੀਆਈਏ ਇੰਚਾਰਜ ਇੰਸਪੈਕਟਰ ਦਿਲਜੀਤ ਸਿੰਘ ਬਰਾੜ ਨੇ ਦੱਸਿਆ ਕਿ ਚਮਕੌਰ ਸਿੰਘ ਉਰਫ ਗੋਰਾ ਉਰਫ ਗੁਰਪ੍ਰੀਤ ਸਿੰਘ ਪਿੰਡ ਖੰਨਾ (ਫਿਰੋਜ਼ਪੁਰ) ਨੂੰ ਇੱਕ ਕਿਲੋ ਹੈਰੋਇਨ ਸਮੇਤ ਆਈ-20 ਕਾਰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਮੁਲਜ਼ਮ ਨੇ ਪੁਲੀਸ ਰਿਮਾਂਡ ਦੌਰਾਨ ਅਹਿਮ ਖੁਲਾਸੇ ਕਰਨ ਉੱਤੇ ਪੁਲੀਸ ਨੇ ਹਰਜੀਤ ਸਿੰਘ ਉਰਫ ਪੱਪੀ ਉਰਫ ਬਾਬਾ ਪਿੰਡ ਮੁੰਡੀਆ(ਲੁਧਿਆਣਾ) ਅਤੇ ਕੁਲਦੀਪ ਕੌਰ ਉਰਫ ਦੀਪੋ ਨਾਮ ਦੀ ਔਰਤ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਮੁਲਜ਼ਮ ਮਹਿਲਾ ਕੋਲੋਂ ਕੋਈ ਬਰਾਮਦਗੀ ਨਹੀਂ ਹੋਈ ਉਜ ਉਸਦੇ ਖ਼ਿਲਾਫ਼ ਪਹਿਲਾਂ ਵੀ ਨਸਾ ਤਸਕਰੀ ਦੋਸ਼ ਹੇਠ ਕੇਸ ਦਰਜ ਹਨ।