ਫਰਜ਼ੀ ਪੁਲੀਸ ਵਾਲਿਆਂ ਵਿੱਚੋਂ ਇਕ ਕਾਬੂ

ਗੁਰਬਖਸ਼ਪੁਰੀ
ਤਰਨ ਤਾਰਨ, 22 ਨਵੰਬਰ
ਇੱਥੋਂ ਦੇ ਨੂਰਦੀ ਅੱਡਾ ਦੇ ਇਕ ਦੁਕਾਨਦਾਰ ਦੇ ਘਰ ਅੱਜ ਠੱਗੀ ਮਾਰਨ ਲਈ ਆਏ ਤਿੰਨ ਫਰਜ਼ੀ ਪੁਲੀਸ ਵਾਲਿਆਂ ਵਿੱਚੋਂ ਇਕ ਨੂੰ ਪਰਿਵਾਰ ਨੇ ਆਸ ਪਾਸ ਦੇ ਲੋਕਾਂ ਦੀ ਮਦਦ ਨਾਲ ਕਾਬੂ ਕਰ ਲਿਆ ਅਤੇ ਦੋ ਮੌਕੇ ਤੋਂ ਫਰਾਰ ਹੋ ਗਏ| ਡੀਐੱਸਪੀ ਕਮਲਮੀਤ ਸਿੰਘ ਨੇ ਦੱਸਿਆ ਕਿ ਨੌਸਰਬਾਜ਼ ਪੁਲੀਸ ਵਾਲੇ ਕੱਪੜਿਆਂ ਵਿੱਚ ਦੁਕਾਨਦਾਰ ਬਰਿੰਦਰ ਸਿੰਘ ਦੇ ਘਰ ਆਏ ਅਤੇ ਉਨ੍ਹਾਂ ਤੋਂ ਕੁਝ ਦਸਤਾਵੇਜ਼ਾਂ ਦੀ ਮੰਗ ਕੀਤੀ। ਸੀਸੀਟੀਵੀ ਕੈਮਰੇ ਲੱਗੇ ਹੋਣ ਬਾਰੇ ਪਤਾ ਲੱਗਣ ’ਤੇ ਮੁਲਜ਼ਮ ਘਬਰਾ ਗਏ ਅਤੇ ਉਨ੍ਹਾਂ ਮੌਕੇ ਤੋਂ ਫਰਾਰ ਹੋਣ ਸੀ ਕੋਸ਼ਿਸ਼ ਕੀਤੀ| ਇਕ ਨੂੰ ਆਸ ਪਾਸ ਦੇ ਲੋਕਾਂ ਨੇ ਕਾਬੂ ਕਰ ਲਿਆ ਅਤੇ ਦੋ ਫਰਾਰ ਹੋ ਗਏ| ਡੀਐੱਸਪੀ ਨੇ ਦੱਸਿਆ ਕਿ ਕਾਬੂ ਕੀਤੇ ਗਏ ਮੁਲਜ਼ਮ ਦੀ ਸ਼ਨਾਖਤ ਬਲਜੀਤ ਸਿੰਘ ਲੁਹਾਰਕਾ (ਅੰਮ੍ਰਿਤਸਰ) ਦੇ ਤੌਰ ’ਤੇ ਕੀਤੀ ਗਈ ਹੈ ਜਦਕਿ ਫਰਾਰ ਹੋਣ ਵਾਲਿਆਂ ’ਚ ਨੰਗਲੀ ਪਿੰਡ ਦੇ ਰੋਡਾ ਅਤੇ ਸੁਖਦੇਵ ਸਿੰਘ ਸ਼ਾਮਲ ਹਨ। ਇਸ ਸਬੰਧੀ ਮੁਲਜ਼ਮਾਂ ਖਿਲਾਫ਼ ਸਥਾਨਕ ਥਾਣਾ ਸਿਟੀ ਦੀ ਪੁਲੀਸ ਨੇ ਕੇਸ ਦਰਜ ਕਰ ਲਿਆ ਹੈ|