ਲਾਟਰੀ ਦਾ ਝਾਂਸਾ ਦੇ ਕੇ ਡੇਢ ਕਰੋੜ ਰੁਪਏ ਠੱਗੇ

ਨਿੱਜੀ ਪੱਤਰ ਪ੍ਰੇਰਕ
ਸ੍ਰੀ ਮੁਕਤਸਰ ਸਾਹਿਬ, 5 ਅਪਰੈਲ
ਪਿੰਡ ਰੁਖਾਲਾ ਦੇ ਰਹਿਣ ਵਾਲੇ ਹਰਭਗਵਾਨ ਸਿੰਘ ਕੋਲੋਂ ਲਾਟਰੀ ਦਾ ਝਾਂਸਾ ਦੇ ਕੇ ਡੇਢ ਕਰੋੜ ਰੁਪਏ ਠੱਗ ਲਏ ਗਏ। ਜਾਣਕਾਰੀ ਅਨੁਸਾਰ ਹਰਭਗਵਾਨ ਨੂੰ ਉਸ ਦੇ ਵਟਸਐਪ ਨੰਬਰ ’ਤੇ ਇੱਕ ਅਣਪਛਾਤੀ ਕਾਲ ਆਈ ਜਿਸ ਨੇ ਕਿਹਾ ਕਿ ਉਸ ਦੀ ਕਰੋੜ ਰੁਪਏ ਦੀ ਲਾਟਰੀ ਨਿਕਲੀ ਹੈ ਤੇ ਇਸ ਦੇ ਭੁਗਤਾਨ ਲਈ ਉਹ 20 ਹਜ਼ਾਰ ਰੁਪਏ ਅਦਾ ਕਰੇ। ਹਰਭਗਵਾਨ ਨੇ ਆਪਣੇ ਗੂਗਲ ਪੇਅ ਰਾਹੀਂ 20 ਹਜ਼ਾਰ ਰੁਪਏ ਟਰਾਂਸਫਰ ਕਰ ਦਿੱਤੇ। ਇਸ ਤੋਂ ਬਾਅਦ ਨੌਸਰਬਾਜ਼ਾਂ ਨੇ ਉਸ ਦਾ ਅਤੇ ਉਸ ਦੇ ਪਿਤਾ ਦਾ ਫੋਨ ਹੈਕ ਕਰ ਕੇ ਕਈ ਐਂਟਰੀਆਂ ਰਾਹੀਂ ਉਨ੍ਹਾਂ ਦੇ ਖਾਤੇ ’ਚੋਂ ਡੇਢ ਕਰੋੜ ਰੁਪਏ ਕਢਵਾ ਲਏ। ਪੀੜਤਾਂ ਨੇ ਥਾਣਾ ਕੋਟਭਾਈ ’ਚ ਸ਼ਿਕਾਇਤ ਦਰਜ ਕਰਵਾਈ ਹੈ। ਇਸ ਸਬੰਧੀ ਜਾਂਚ ਅਧਿਕਾਰੀ ਪਰਮਜੀਤ ਕੁਮਾਰ ਨੇ ਦੱਸਿਆ ਕਿ ਮੁੱਢਲੀ ਪੜਤਾਲ ਦੌਰਾਨ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਧੋਖਾਧੜੀ ਦਾ ਮਾਮਲਾ ਦਰਜ ਕਰ ਲਿਆ ਹੈ|