ਸੰਘਰਸ਼ ਦੇ ਦੂਜੇ ਦਿਨ ਜ਼ਿਲ੍ਹਾ ਖੁਰਾਕ ਦਫ਼ਤਰ ਅੱਗੇ ਡਟੇ ਇੰਸਪੈਕਟਰ

ਗੁਰਦੀਪ ਸਿੰਘ ਲਾਲੀ
ਸੰਗਰੂਰ, 2 ਅਗਸਤ
ਇੰਸਪੈਕਟੋਰੇਟ ਫੂਡ ਸਪਲਾਈਜ਼ ਯੂਨੀਅਨ ਪੰਜਾਬ ਦੇ ਸੱਦੇ ’ਤੇ ਫੂਡ ਤੇ ਸਪਲਾਈ ਵਿਭਾਗ ਦੇ ਇੰਸਪੈਕਟਰ ਆਮ ਕੰਮਕਾਜ ਠੱਪ ਕਰਕੇ ਜ਼ਿਲ੍ਹਾ ਦਫ਼ਤਰ ਅੱਗੇ ਰੋਸ ਧਰਨੇ ਦੌਰਾਨ ਦੂਜੇ ਦਿਨ ਵੀ ਮੁੱਖ ਦਫ਼ਤਰ ਖ਼ਿਲਾਫ਼ ਗਰਜੇ ਅਤੇ ਬਿੱਲਾਂ ਦੀਆਂ ਅਦਾਇਗੀਆਂ ਨਾ ਹੋਣ ਤੋਂ ਖਫ਼ਾ ਇੰਸਪੈਕਟਰਾਂ ਨੇ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ।
ਧਰਨਾਕਾਰੀਆਂ ਨੇ ਚਿਤਾਵਨੀ ਦਿੱਤੀ ਕਿ ਜੇਕਰ ਮੰਗਾਂ ਦਾ ਜਲਦ ਹੱਲ ਨਾ ਕੀਤਾ ਗਿਆ ਤਾਂ ਤਿੱਖਾ ਸੰਘਰਸ਼ ਵਿੱਢਣ ਲਈ ਮਜਬੂਰ ਹੋਣਾ ਪਵੇਗਾ। ਧਰਨੇ ਨੂੰ ਸੰਬੋਧਨ ਕਰਦਿਆਂ ਯੂਨੀਅਨ ਦੇ ਸੂਬਾ ਜਨਰਲ ਸਕੱਤਰ ਰਾਜੇਸ਼ ਬਾਂਸਲ ਅਤੇ ਜ਼ਿਲ੍ਹਾ ਪ੍ਰਧਾਨ ਪੰਕਜ ਗਰਗ ਨੇ ਦੋਸ਼ ਲਾਇਆ ਕਿ ਇੱਕ ਸਾਲ ਤੋਂ ਫੀਲਡ ਸਟਾਫ਼ ਦੇ ਲਟਕ ਰਹੇ ਬਿੱਲਾਂ ਦੀ ਅਦਾਇਗੀ ਨਹੀਂ ਕੀਤੀ ਜਾ ਰਹੀ ਅਤੇ ਜਾਣਬੁੱਝ ਕੇ ਬੇਲੋੜੇ ਇਤਰਾਜ਼ ਲਗਾਏ ਜਾ ਰਹੇ ਹਨ।
ਧਰਨੇ ਦੌਰਾਨ ਸੰਘਰਸ਼ ਨੂੰ ਉਸ ਸਮੇਂ ਹੋਰ ਬਲ ਮਿਲਿਆ ਜਦੋਂ ਕਿ ਏਐੱਫਐੱਸਓ ਯੂਨੀਅਨ ਵਲੋਂ ਵੀ ਸੰਘਰਸ਼ ਦੀ ਹਮਾਇਤ ਕੀਤੀ ਗਈ ਅਤੇ ਏਐੱਫਐਸਓ ਸੁਖਦੀਪ ਕੌਰ ਅਤੇ ਪ੍ਰਿਥੀ ਸਿੰਘ ਵਲੋਂ ਧਰਨੇ ’ਚ ਸ਼ਮੂਲੀਅਤ ਕੀਤੀ। ਧਰਨੇ ’ਚ ਯੂਨੀਅਨ ਆਗੂ ਦਵਿੰਦਰ ਸਿੰਘ, ਗੁਰਿੰਦਰਪਾਲ ਸਿੰਘ, ਇੰਦਰਜੀਤ ਸਿੰਘ, ਰਸ਼ਮਿੰਦਰ ਸਿੰਘ ਮਲੇਰਕੋਟਲਾ, ਨਵਤੇਜ ਸਿੰਘ, ਸਰੰਗਾ ਗੁਪਤਾ, ਮੰਜੂ ਰਾਣੀ, ਰਮਨਜੀਤ ਸਿੰਘ ਲੌਂਗੋਵਾਲ, ਰੌਬਿਨ ਕੁਮਾਰ ਲਹਿਰਾਗਾਗਾ, ਤਰੁਣ ਕੁਮਾਰ ਮੂਨਕ, ਗੌਤਮ ਕੁਮਾਰ ਭਵਾਨੀਗੜ੍ਹ, ਨਰਿੰਦਰ ਸਿੰਘ ਚੀਮਾਂ ਆਦਿ ਸ਼ਾਮਲ ਸਨ।