ਜਲ ਸਪਲਾਈ ਸਕੀਮ ਦੇ ਟਰਾਂਸਫਾਰਮਰ ਦਾ ਤੇਲ ਚੋਰੀ
ਪੱਤਰ ਪ੍ਰੇਰਕ
ਮੁਕੇਰੀਆਂ, 20 ਜੂਨ
ਇੱਥੇ ਬੀਤੀ ਰਾਤ ਚੋਰਾਂ ਨੇ ਪਾਵਰਕੌਮ ਦੇ ਦਾਤਾਰਪੁਰ ਉੱਪ ਮੰਡਲ ਅਧੀਨ ਆਉਂਦੀ ਕਸਬਾ ਦਾਤਾਰਪੁਰ ਦੀ ਜਲ ਸਪਲਾਈ ਸਕੀਮ ਦੇ 200 ਕੇ ਵੀ ਏ ਟਰਾਂਸਫਾਰਮਰ ਦਾ ਤੇਲ ਚੋਰੀ ਕਰ ਲਿਆ, ਜਿਸ ਕਾਰਨ ਸਕੀਮ ਦਾ ਟਰਾਂਸਫਾਰਮਰ ਸੜ ਜਾਣ ਕਾਰਨ ਪਾਣੀ ਦੀ ਸਪਲਾਈ ਠੱਪ ਹੋ ਗਈ। ਇਸ ਸਬੰਧੀ ਪਾਵਰਕੌਮ ਦੇ ਉੱਪ ਮੰਡਲ ਅਫਸਰ ਇੰਜਨੀਅਰ ਰਾਮ ਲਾਲ ਨੇ ਦੱਸਿਆ ਕਿ ਕੰਢੀ ਨਹਿਰ ਕਿਨਾਰੇ ਲਗਾਤਾਰ ਸੜਕੀ ਆਵਾਜਾਈ ਰਹਿੰਦੀ ਹੈ, ਜਿਸ ਕੋਲ ਪੈਂਦੀ ਜਲ ਸਪਲਾਈ ਸਕੀਮ ਦੇ ਟਰਾਂਸਫਾਰਮਰ ਦਾ ਤੇਲ 18-19 ਜੂਨ ਦੀ ਦਰਮਿਆਨੀ ਰਾਤ ਨੂੰ ਚੋਰਾਂ ਨੇ ਚੋਰੀ ਕਰ ਲਿਆ। ਤੇਲ ਚੋਰੀ ਹੋਣ ਕਾਰਨ ਟਰਾਂਸਫਾਰਮਰ ਸੜ ਗਿਆ, ਜਿਸ ਕਾਰਨ ਜਿੱਥੇ ਪਾਵਰਕੌਮ ਦਾ ਵੱਡਾ ਵਿੱਤੀ ਨੁਕਸਾਨ ਹੋਇਆ ਹੈ, ਉੱਥੇ ਹੀ ਕਰੀਬ 5 ਪਿੰਡਾਂ ਦੀ ਜਲ ਸਪਲਾਈ ਵੀ ਲੰਬਾ ਸਮਾਂ ਪ੍ਰਭਾਵਿਤ ਰਹੀ।
ਇਸ ਦੌਰਾਨ ਉੱਪ ਮੰਡਲ ਅਫ਼ਸਰ ਨੇ ਦੱਸਿਆ ਕਿ ਇਸ ਸਬੰਧੀ ਤਲਵਾੜਾ ਪੁਲੀਸ ਨੂੰ ਲਿਖਤੀ ਸੂਚਿਤ ਕਰਕੇ ਜਲ ਸਪਲਾਈ ਸਕੀਮ ਚਾਲੂ ਕਰਨ ਲਈ ਨਵਾਂ ਟਰਾਂਸਫਾਮਰ ਕਢਵਾਇਆ ਜਾ ਰਿਹਾ ਹੈ। ਉਨ੍ਹਾਂ ਪੁਲੀਸ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਚੋਰਾਂ ਨੂੰ ਜਲਦ ਤੋਂ ਜਲਦ ਗ੍ਰਿਫ਼ਤਾਰ ਕਰ ਕੇ ਟਰਾਂਸਫਾਰਮਰ ਦਾ ਤੇਲ ਚੋਰੀ ਹੋਣ ਦੀਆਂ ਵਾਰਦਾਤਾਂ ਨੂੰ ਠੱਲ ਪਾਈ ਜਾਵੇ।