ਤੇਲ ਟੈਂਕਰ ਦੀ ਕਾਰ ਤੇ ਪਿਕਅੱਪ ਵੈਨ ਨਾਲ ਟੱਕਰ, ਚਾਰ ਹਲਾਕ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 11 ਨਵੰਬਰ
ਦਿੱਲੀ-ਜੈਪੁਰ ਹਾਈਵੇਅ ’ਤੇ ਗੁਰੂਗ੍ਰਾਮ ਦੇ ਸਿਧਰਾਵਾਲੀ ਪਿੰਡ ਨੇੜੇ ਇੱਕ ਤੇਲ ਟੈਂਕਰ ਨੇ ਇਕ ਕਾਰ ਤੇ ਇਕ ਪਿਕਅੱਪ ਵੈਨ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਘੱਟੋ-ਘੱਟ ਚਾਰ ਵਿਅਕਤੀਆਂ ਦੀ ਮੌਤ ਹੋ ਗਈ। ਪੁਲੀਸ ਨੇ ਫਰਾਰ ਟੈਂਕਰ ਡਰਾਈਵਰ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੁਲੀਸ ਨੇ ਦੱਸਿਆ ਕਿ ਇਹ ਹਾਦਸਾ ਬੀਤੀ ਰਾਤ ਕਰੀਬ 11.50 ਵਜੇ ਪਿੰਡ ਸਿਧਰਾਵਾਲੀ ਨੇੜੇ ਵਾਪਰਿਆ। ਉਨ੍ਹਾਂ ਦੱਸਿਆ ਕਿ ਜੈਪੁਰ ਵਾਲੇ ਪਾਸੇ ਤੋਂ ਆ ਰਹੇ ਟੈਂਕਰ ਨੇ ਡਿਵਾਈਡਰ ਤੋੜ ਕੇ ਹਾਈਵੇਅ ਦੇ ਦੂਜੇ ਪਾਸੇ ਇੱਕ ਕਾਰ ਅਤੇ ਪਿਕਅੱਪ ਵੈਨ ਨੂੰ ਟੱਕਰ ਮਾਰ ਦਿੱਤੀ। ਪੁਲੀਸ ਨੇ ਦੱਸਿਆ ਕਿ ਕਾਰ ਭਿਵੜੀ ਵੱਲ ਜਾ ਰਹੀ ਸੀ ਅਤੇ ਅੰਦਰ ਸੀਐਨਜੀ ਸਿਲੰਡਰ ਹੋਣ ਕਾਰਨ ਇਸ ਨੂੰ ਅੱਗ ਲੱਗ ਗਈ। ਇਸ ਦੌਰਾਨ ਕਾਰ ਵਿੱਚ ਸਵਾਰ ਤਿੰਨ ਵਿਅਕਤੀ ਝੁਲਸ ਗਏ। ਮ੍ਰਿਤਕਾਂ ਦੀ ਪਛਾਣ ਜਤਿੰਦਰ ਵਾਸੀ ਸਮਾਲਖਾ, ਪਾਣੀਪਤ, ਲੋਕੇਸ਼ ਸੈਣੀ ਵਾਸੀ ਅਨਾਜ ਮੰਡੀ, ਜੀਂਦ ਅਤੇ ਪਵਨ ਦੂਬੇ ਵਾਸੀ ਬਿਹਾਰ ਵਜੋਂ ਹੋਈ ਹੈ। ਸਹਾਇਕ ਸਬ-ਇੰਸਪੈਕਟਰ ਵਿਨੋਦ ਕੁਮਾਰ ਨੇ ਦੱਸਿਆ ਕਿ ਕਾਰ ’ਚ ਸਵਾਰ ਤਿੰਨੇ ਲੋਕ ਮਾਨੇਸਰ ’ਚ ਇਕ ਪ੍ਰਾਈਵੇਟ ਕੰਪਨੀ ’ਚ ਕੰਮ ਕਰਦੇ ਸਨ ਅਤੇ ਇਕ ਵਿਕਰੇਤਾ ਨੂੰ ਤੋਹਫਾ ਦੇਣ ਲਈ ਗੁਰੂਗ੍ਰਾਮ ਤੋਂ ਰਾਜਸਥਾਨ ਦੇ ਭਿਵੜੀ ਜਾ ਰਹੇ ਸਨ। ਉਨ੍ਹਾਂ ਦੱਸਿਆ ਕਿ ਇਸ ਮਗਰੋਂ ਟੈਕਰ ਪਿਕਅੱਪ ਵੈਨ ਨਾਲ ਟਕਰਾ ਗਿਆ, ਜਿਸ ਕਰਾਨ ਵੈਨ ਡਰਾਈਵਰ ਦੀ ਵੀ ਮੌਤ ਹੋ ਗਈ। ਉਸ ਦੀ ਪਛਾਣ ਤ੍ਰਿਲੋਕ ਸ਼ਰਮਾ ਵਾਸੀ ਪਟੌਦੀ, ਗੁਰੂਗ੍ਰਾਮ ਵਜੋਂ ਹੋਈ ਹੈ। ਪੁਲੀਸ ਬੁਲਾਰੇ ਸੁਭਾਸ਼ ਬੋਕੇਨ ਨੇ ਕਿਹਾ, ‘‘ਜਦੋਂ ਸਾਡੀ ਟੀਮ ਮੌਕੇ ’ਤੇ ਪਹੁੰਚੀ ਤਾਂ ਕਾਰ ਸੜ ਕੇ ਸੁਆਹ ਹੋ ਗਈ ਸੀ ਅਤੇ ਤਿੰਨ ਲੋਕ ਸੜ ਚੁੱਕੇ ਸਨ। ਪਿਕਅੱਪ ਵੈਨ ਦੇ ਡਰਾਈਵਰ ਦੀ ਵੀ ਮੌਕੇ ’ਤੇ ਹੀ ਮੌਤ ਹੋ ਗਈ।’’ ਉਨ੍ਹਾਂ ਦੱਸਿਆ ਕਿ ਤੇਲ ਟੈਂਕਰ ਦਾ ਡਰਾਈਵਰ ਫ਼ਰਾਰ ਹੋ ਗਿਆ। ਉਸ ਖ਼ਿਲਾਫ਼ ਕੇਸ ਦਰਜ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।