ਐਨਟੀਏ ਨੇ ਨੀਟ-ਯੂਜੀ ਦੀ ਮੁੜ ਲਈ ਪ੍ਰੀਖਿਆ ਦਾ ਨਤੀਜਾ ਐਲਾਨਿਆ

ਨਵੀਂ ਦਿੱਲੀ, 1 ਜੁਲਾਈ
ਨੈਸ਼ਨਲ ਟੈਸਟਿੰਗ ਏਜੰਸੀ (ਐਨਟੀਏ) ਨੇ ਮੁੜ ਲਈ ਗਈ ਪ੍ਰੀਖਿਆ ਨੀਟ-ਯੂਜੀ ਦਾ ਨਤੀਜਾ ਅੱਜ ਐਲਾਨ ਦਿੱਤਾ ਹੈ। ਇਸ ਪ੍ਰੀਖਿਆ ਤੋਂ ਬਾਅਦ ਸਿਖਰਲਾ ਰੈਂਕ ਹਾਸਲ ਵਾਲੇ ਉਮੀਦਵਾਰਾਂ ਦੀ ਗਿਣਤੀ 67 ਤੋਂ ਘਟ ਕੇ 61 ਰਹਿ ਗਈ ਹੈ। ਇਹ ਪ੍ਰੀਖਿਆ ਗਰੇਸ ਅੰਕ ਹਾਸਲ ਕਰਨ ਵਾਲੇ 1,563 ਉਮੀਦਵਾਰਾਂ ਲਈ ਕਰਵਾਈ ਗਈ ਸੀ ਜਿਨ੍ਹਾਂ ਵਿਚੋਂ 813 ਵਿਦਿਆਰਥੀ ਪ੍ਰੀਖਿਆ ਦੇਣ ਆਏ ਸਨ। ਜ਼ਿਕਰਯੋਗ ਹੈ ਕਿ ਛੇ ਪ੍ਰੀਖਿਆ ਕੇਂਦਰਾਂ ਵਿਚ ਪ੍ਰੀਖਿਆ ਦੇਰੀ ਨਾਲ ਸ਼ੁਰੂ ਹੋਈ ਸੀ ਜਿਸ ਦੀ ਭਰਪਾਈ ਲਈ ਪਹਿਲਾਂ ਗਰੇਸ ਅੰਕ ਦਿੱਤੇ ਗਏ ਸਨ। ਇਸ ਵਿਚ 6 ਉਮੀਦਵਾਰਾਂ ਨੇ ਪੂਰੇ 720 ਅੰਕ ਪ੍ਰਾਪਤ ਕੀਤੇ ਸਨ। ਉਨ੍ਹਾਂ ਵਿੱਚੋਂ ਪੰਜ ਨੇ ਮੁੜ ਪ੍ਰੀਖਿਆ ਦਿੱਤੀ ਜਦੋਂਕਿ ਇੱਕ ਨੇ ਗਰੇਸ ਅੰਕਾਂ ਦਾ ਵਿਕਲਪ ਨਹੀਂ ਚੁਣਿਆ। ਇਨ੍ਹਾਂ ਪੰਜ ਉਮੀਦਵਾਰਾਂ ਵਿੱਚੋਂ ਕੋਈ ਵੀ ਮੁੜ ਪ੍ਰੀਖਿਆ ਵਿੱਚ 720 ਅੰਕ ਹਾਸਲ ਨਹੀਂ ਕਰ ਸਕਿਆ। ਪੀਟੀਆਈ