ਕਿਸੇ ਸੰਸਦ ਮੈਂਬਰ ਨੇ ਨਾ ਲਈ ਬਟਾਲੇ ਦੀ ਸਾਰ: ਸ਼ੈਰੀ ਕਲਸੀ

ਦਲਬੀਰ ਸੱਖੋਵਾਲੀਆ
ਬਟਾਲਾ, 24 ਅਪਰੈਲ
ਫੋਕਲ ਪੁਆਇੰਟ ਐਸੋਸੀਏਸ਼ਨ ਬਟਾਲਾ ਵੱਲੋਂ ਲੋਕ ਸਭਾ ਹਲਕਾ ਗੁਰਦਾਸਪੁਰ ਤੋਂ ‘ਆਪ’ ਦੇ ਉਮੀਦਵਾਰ ਅਮਨਸ਼ੇਰ ਸਿੰਘ ਸ਼ੈਰੀ ਕਲਸੀ ਦੇ ਹੱਕ ਵਿੱਚ ਚੋਣ ਮੀਟਿੰਗ ਕੀਤੀ ਜਿਸ ’ਚ ਐਸੋੋਸੀਏਸ਼ਨ ਦੇ ਦਰਜਾ-ਬ-ਦਰਜਾ ਆਗੂਆਂ ਨੇ ਸ਼ਿਰਕਤ ਕਰਦਿਆਂ ਚੋਣ ’ਚ ਹਰ ਤਰ੍ਹਾਂ ਦੀ ਮੱਦਦ ਕਰਨ ਦਾ ਭਰੋਸਾ ਦਿੱਤਾ। ਇਸ ਮੌਕੇ ’ਤੇ ਉਮੀਦਵਾਰ ਸ੍ਰੀ ਕਲਸੀ ਨੇ ਹਾਜ਼ਰੀਨਾਂ ਨੂੰ ਭਰੋਸਾ ਦਿੱਤਾ ਕਿ ਜੇਕਰ ਉਹ ਜਿੱਤ ਗਏ ਤਾਂ ਬਟਾਲਾ ਉਦਯੋਗ ਨੂੰ ਮੁੜ ਤੋਂ ਲੀਹਾਂ ’ਤੇ ਲਿਆਉਣ ਲਈ ਸੰਸਦ ’ਚ ਆਪਣੀ ਆਵਾਜ਼ ਬੁਲੰਦ ਕਰਨਗੇ। ਇਸ ਮੌਕੇ ਫੋਕਲ ਪੁਆਇੰਟ ਐਸੋਸੀਏਸ਼ਨ ਬਟਾਲਾ ਵੱਲੋਂ ‘ਆਪ’ ਉਮੀਦਵਾਰ ਸ੍ਰੀ ਕਲਸੀ ਨੂੰ ਹਮਾਇਤ ਦੇਣ ਦਾ ਐਲਾਨ ਕੀਤਾ ਗਿਆ।
ਮੀਟਿੰਗ ’ਚ ਐਸੋਸੀਏਸ਼ਨ ਦੇ ਆਗੂ ਸੁਖਜਿੰਦਰ ਸਿੰਘ, ਭਾਰਤ ਭੂਸ਼ਣ, ਅਮਰਜੀਤ ਸਿੰਘ, ਰੋਹਿਤ ਮਾਂਟੂ, ਸਰਬਜੀਤ ਸਿੰਘ, ਰਮੇਸ਼ ਕੁਮਾਰ, ਮਨੀਸ਼ ਅਗਰਵਾਲ, ਗੁਲਸ਼ਨ ਕੁਮਾਰ, ਰੋਹਿਤ ਸਹਿਦੇਵ, ਵਿਵੇਕ ਸ਼ਰਮਾ ਸਮੇਤ ਵੱਡੀ ਗਿਣਤੀ ਵਿੱਚ ਸਨਅਤਕਾਰ ਹਾਜ਼ਰ ਸਨ। ਸ਼੍ਰੀ ਕਲਸੀ ਨੇ ਆਪਣੇ ਸੰਬੋਧਨ ਦੌਰਾਨ ਬਟਾਲਾ ਉਦਯੋਗ ਦੀ ਤਕਦੀਰ ਬਦਲਣ ਲਈ ਇੱਕ ਮੌਕਾ ਦੇਣ ’ਤੇ ਜ਼ੋਰ ਦਿੱਤਾ। ਉਨ੍ਹਾਂ ਸਪੱਸ਼ਟ ਸ਼ਬਦਾਂ ’ਚ ਕਿਹਾ ਕਿ ਜਿੱਤਣ ਉਪਰੰਤ ਜੇਕਰ ਉਹ ਕੰਮ ਨਹੀਂ ਕਰਨਗੇ ਤਾਂ ਉਹ ਫਿਰ ਤੋਂ ਵੋਟਾਂ ਮੰਗਣ ਲਈ ਜਨਤਾ ਦੀ ਕਚਹਿਰੀ ’ਚ ਨਹੀਂ ਜਾਣਗੇ।
ਉਨ੍ਹਾਂ ਦੱਸਿਆ ਕਿ ਫੋਕਲ ਪੁਆਇੰਟ ਦੀਆਂ ਸੜਕਾਂ ਲਈ ਪਹਿਲਾਂ ਹੀ 12 ਕਰੋੜ ਰੁਪਏ ਵਿਕਾਸ ਕਾਰਜਾਂ ’ਤੇ ਖਰਚ ਹੋ ਚੁੱਕੇ ਹਨ ਜਦੋਂਕਿ ਅਧੂਰੇ ਕੰਮ ਚੋਣਾਂ ਉਪਰੰਤ ਹੋ ਜਾਣਗੇ। ਉਨ੍ਹਾਂ ਲੰਘੇ ਦੋ ਸਾਲਾਂ ’ਚ ਆਪਣੀਆਂ ਪ੍ਰਾਪਤੀਆਂ ਤੋਂ ਜਾਣੂ ਕਰਵਾਉਂਦਿਆਂ ਦੱਸਿਆ ਕਿ ਬਟਾਲਾ ਦੇ ਚਹੁਮੁੱਖੀ ਵਿਕਾਸ ਲਈ ਬਹੁਤ ਕੰਮ ਕੀਤੇ ਜਾਣਗੇ। ਸ਼੍ਰੀ ਕਲਸੀ ਨੇ ਭਾਜਪਾ ਦੇ ਸੰਸਦ ਮੈਂਬਰ ਤੇ ਅਦਾਕਾਰ ਸੰਨੀ ਦਿਓਲ ਨੂੰ ਪੰਜ ਸਾਲਾਂ ’ਚ ਹਲਕੇ ਨੂੰ ਵਿਕਾਸ ਪੱਖੋਂ ਢਾਹ ਲਾਉਣ ਦੀ ਨਿਖੇਧੀ ਕੀਤੀ।